1 Maccabaeus 4

Emmau ah kahdohnak

4 Gorgias cu ke ralkap thongnga le thim mi rang ralkap thongkhat kha a hruai hna i zan ah an chuak; 2aa tinh mi cu Judahmi hna riahbuk kha an i rin lo kar ah va tuk ding a si, khualipimi nih lam kha an hruai. 3Judas cu an biathli kha a theih caah a ralkap hna kha a hruai hna i Emmaus i siangpahrang ralkapbu kha doh awkah aa thawh ve, 4a ralkap hna cu an riahbuk leng ah hmunhma an la dih. 5Gorgias cu Judas riahbuk kha a phan i aho hmanh a hmuh ti hna lo caah Jew pawl kha tlangpar hna ah khan a kawl hna. Amah nih, “Kan ṭhawl dih cang a si hih,” tiah a ti. 6Khuadei kate ah khin Judas cu minung thongthum he nelrawn ah an va phan diam cang; hi hna cu an duh ngai ko nain ralthuam le vainam cu an ngei lo. 7Jentailmi hna riahbuk cu a fek ngai mi ralhau le a velchum in rang ralkap hna he an va hmuh hna; annih cu raltuk thiamthiam an si.  

8Judas nih a mi hna cu, "An milu kha ṭih hna hlah u, cun an in doh hna tikah hnulei ah kir hlah u.  9Faro nih thazaang he a dawi hna tikah rilisen ah khan kan pupa hna cu zei tin dah khamh an rak si ti kha philh hlah u. 10Cun, a tu Vancung ah khin au hna u sih: kan zawn a kan ruah ahcun  kan pupa hna cu thisen biakamnak he a theihṭhan hna lai i nihin ah a kan rat hnawh mi, hi ralkapbu cu a hrawh ko lai;  11Cu tikah cun miphun vialte nih Israel kha a khamh i a tlanh mi  Pa pakhat a um ti cu fiang tein an hngalh lai," tiah a ti hna.

12Ramdangmi hna cu cung ah an hun zoh, Jew hna anmahlei an rat kha an hmuh hna tikah, 13an riahbuk in an hung chuak. Judas ralkap hna cu muko an tum i 14 an i tu.  Jentailmi pawl cu an sung i rawnlei ah an zam, 15hnu aa thlai mi hna cu vainam in an thi dih. Cun Kezar le Idumaea le Azotus le Jamnia nelrawn hna tiang an dawi hna i ral cu thongthum tluk an thi.

16An dawi mi hna cu an ngol, Judas cu a mi hna he a kir i 17 a mi hna kha "Hranchaw hna cu chia ko u; zei tin tiah kan hmai ah doh awk ral a um rih. 18Gorgias le a ralkap hna cu kan pawngkam tlangpar ah an um rih. Kan ral hna kha doh hmasa u sih law; cu hnu ah hranchaw cu hnangam tein nan pumh khawh lai," tiah a ti hna. 19Biachim a dih maw dih lo ti ah khin ral phukhat an hung lang, tlangcung khin an rak bih hna. 20An hawile hna kha an ṭhio hna i an riahbuk an khangh cang ti kha an hmuh tikah – zei tin tiah an hmuh mi meikhu nih khan thil si ning cu a fianter - 21 an lau tuk cang; cu lawng si lo in Judas a ralkap, hmunrawn ah an i tlar ko kha an hmuh rih hna tikah; 22 Filistinmi hna ram ah an zam dih hna. 23Cu tikah Judas cu an riahbuk kha ramh awkah a rak kir, sui le ngun tampi, aihre le sendung rong a ngei mi thil tampi le adang thil mansung tampi hna he an kalpi hna. 24An rak kirpah ah Jew hna cu, “Amah cu a ṭha i a dawtnak cu zungzal in a hmun,” ti in Vancung thangṭhatnak hla cu an sak 25Kha ni ah khan Israel nih philh khawh lo luatnak a hmuh cang. 26A luat mi ram dangmi hna nih Lisia cu thil si ning vialte kha an chimh. 27Thawngpang nih a lauter i a khuaruah a har tuk, zei cah tiah Israel i thil a cang mi cu aa tinh ning a si ti lo, cun a theipar cu siangpahrang nih nawl a rak pek mi he a lettalam ngai a si.

Lysias A voikhatnak ralhranh

28A hmai kum ah Jew hna hloh dih ding timhtuahnak he ralkap thongsawmruk le thim mi rang ralkap thongnga hna kha a ceerpi hna. 29Idomaea ah khan an kal i Beth- Zur ah umhmun an khuar; cuka ah cun Judah nih ralkap thonghra hna he a rak ton hna. 30An ralkap thazaang kha a hmuh tikah hiti hin thla a cam: "Maw Israel Khamhtu, na min cu thangṭhat si ko seh! Nang cu na sal David kut in a ṭhawng ngai mi paralṭha tuknak kha a khuai dih tu le Filistinmi hna riahbuk cu Saul fapa Jonathan le a hriam-kengtu kut ah a chantu na si. 31Mah bantuk khan hi kahdohnak zong hi na mi Israel kut in khuai dih ve ko; an ralkap le an rang ralkap hna nih hin ningzahnak lawng pe hna seh! 32An ralbawi ah thlalaunak tuh law milu tam an i bochannak cu vaivuanhter in sunghter ko hna. 33Nangmah an daw mi hna vainam in saam dih hna law na min a hngal mi vialte nih na thangṭhatnak hla cu an sak lai," tiah a ti. 34Kaphnih ralkap cu an i tu i Lysias ralkap hna cu hmaitonh in an i tuknak ah thongnga an thi hna. 35A ralkap hna an zamnak le Judas ralkap hna ralṭhat ning le hmaizah awk tlak in thi ding le nung ding timhcia in an um kha a hmuh tikah Lysias cu Antiok ah khan a kir, cuka ah cun Judea ram tuk ṭhan ding ah ralkap tam deuh, hlanchom ralkap pawl kha a khawmh hna.

Biakinnpi pekchanhnak

36Cu tikah Judas le a unau hna nih, "Atu kan ral hna cu an sung cang, hmunthiang kha thianh i pekchanhnak tuah awkah kai hna u sih,” tiah an i ti. 37Cucaah ralkap dihlak in an timlamh i Zion Tlang ah an kaipi hna.  38Hmunthiang cu a king, biakṭheng an buar, kutka hna cu an ciam dih, cun ramlak le tlangcung hna bantuk bawi hna inntual ah ram an kho i thil chiahnak innkhaan hna cu an rak rawh dih kha an va hmuh. 39An hnipuan an thleh, leidip an lu ah an i phulh i fak pi in an ṭap. 40Vawlei ah khan an bawk i muko an tum tik in Vancung ah fak pi in an au.

       41Cun Judas nih hmunthiang a thianh dih hlan lo khualipi kha ṭha tein congh awkah a cah hna. 42Cun dotla tlangbawi hna le Phungbia a ṭanhtu hna kha a thim hna, 43 annih cu hmunthiang kha thianh awk le Thurhnom lungtum hna kha a thiang lo mi hmun ah ṭhial awk a si.

44Cun an buar mi khangh thawinak biakṭheng cu zei tin tuah ding ti kha an ceih i 45annih nih, Jentailmi hna nih an rak thurter cang caah a hnu i lung ṭha lo in um nakin atu ah hrawh ding kha an hna a tla hna. Cucaah an ṭheh i 46a lung hna cu Umnak tlangbo i hmunrem pakhat ah an chiah hna, anmah kha zei tin tuah awk dah a si lai ti a chimtu ding prophet a chuah hlan lo an hngah ko.  47Phungbia nih a chim bang in, saih lo mi lung kha an lak i a hlun he i tlar in biakṭheng thar pakhat an dirh. 48A thiang mi Hmun le Umnak chunglei hna kha an khumh ṭhan i tualpi cu an thianh. 49A thiang mi thilthar hna kha an ser, cu Biakinnpi chung ah cun mei-vannak tung, rimhmui khanghnak biakṭheng le cabuai hna cu an chiah hna. 50Biakṭheng cung ah cun rimhmui an khangh i mei cu an van hna, cun hi hna nih  hin Biakinnpi chung cu an ceuh. 51Cabuai cung ah khan changreu hlum cu an chiah, puanzar cu an thlai hna, cuti cun an rian vialte cu an lim hna.

52148 kum, thla kuanak thla, Chislev thla, nikul le ninganak ni ah tuante in an tho i 53an ser mi khangh thawinak biakṭheng thar cung ah khan a phung ning in thawinak an pekchanh. 54Jentailmi hna nih an rak thurter kum, ni le caan hrimhrim ah khan, hlathiang, tingtang, thanglawi le sumsel thawng he biakṭheng pekchanhnak cu an tuah. 55Mi vialte cu lukun in an biak i hlawhtlinnak a rak petu hna Vancung kha an thangṭhat.56Biakṭheng pekchanhnak puai cu niriat chung an tuah, lunglawm thanuam in khangh thawinak, khuathianh thawinak le lawmh thawinak cu an pekchanh hna.  57Biakinn hmai cu luchin le sui thil phunphun in an ṭamh, kutka le chawva inn hna cu an tharchuah i a kutka tiang an tuah.  58Mipi lak ah khan lawmhnak cu a dong kho lo; zei cah tiah Jentailmi hna nih an rak pek mi ningzahnak cu a thiang cang. 59Judas cu a unau hna he tonpumhnak a ngei mi Israel ningpi he biakṭheng pekchanhnak puai cu kumfatin a khuacan te ah lunglawm thanuam ngai in Chislev thla nikul le ninga ni thawk in niriat chung tuah zungzal ding ah zulhphung pakhat a serpiak hna.

60 Cun, Zion tlang velchum ah khan, a fek mi innsang a ngei mi vanpang sangsang hna kha an sak rih hna; cucu hlan ah Jentail hna nih an rak tuah tawn bang in rang he an lut i khua chung ah zomhtaihnak he an i cit kha kham awkah a si. 61Judas nih khualipi vengtu ralkap kha a chiah hna. Beth-Zur zong kha fek tein a kulh, cuti cun mi nih Idumaealei in a ra mi ral hna in an kham khawh hna lai.