SIRACH 27

27 Mi tampi cu a miak hmuh duh ah an sual cang, rum aa ruahchan mi cu a mit a chinh a herh. 2Dumkulh tung cu lung pahnih karlak ah thlak a si bang in sualnak zong cu zuar le cawk karlak ah aa tenh ve. 3Pathian ṭihzahnak ah fek tein a hram a bunh lo mi inn poh cu a tlu zau lai.

Biachim ning

4Hnom cu fingrilh in an kaltak tawn; cu bantuk in mi pakhat i chamhbaunak cu bia a chimnak ah a lang. 5Umsernak mei nih umsertu i um cu a hneksak bang in mi cu biaruahnak in hneksak a si. 6A thei in khua zei dum i a si ti hngalh khawh a si bantuk in mi pakhat i lungthin cu a bia nih a rawi.  7Mi cu zei hmanh a chim hlan ah va thangṭhat hlah, zei tin tiah hika ah hin amah cu hneksak a si

Ziaza ṭhatnak

8Ṭhatnak na kawl ahcun na hmuh lai, cun puai hnipuan bang in i hruk ko. 9Vate cu an phun he an i komh bang in biatak ti mi cu a daw mi hna sin ah a um ve. 10Chiandeih nih sa kha a bawh bang in sualnak nih palh hmang pawl kha a bawh ve hna. 11Pathian a hngal mi he bia ruah cu fimnak a si zungzal, nain mihrut cu thlapa bang aa thleng ko. 12Mihrut na len tikah a caan zoh, nain mifim hna he cun caan la. 13Mihrut hna bia i ruah cu huat a tlai tuk, an sual lungthin he an nihnak cu a thang ko. 14Chiatserh hmang hna bia nih sam a dirter, an aukhuannak nih na hna a phih lai. 15Mipuarthau hna i sikvelhnak nih thisen a chuah, cun an i volhpamhnak cu theih a nuam lo ngai.

Biathli

16Biathli phuannak nih zumhtlak a sinak kha a buar cang, a duh mi hawikom phun cu a hmu bal ti lai lo. 17Na hawi cu va daw law zumhtlak in um; sihmanhsehlaw a biathli na phuan sual ahcun a sin ah va kal ti hlah, 18zei cah tiah mi pakhat nih adang pakhat kha a thahnak in a hrawh bang na innpa hawikomhnak cu na thah cang, 19na kutdong karlak in vate cu na thlah sual cang bang in na hawi cu na kalter cang i na tlai ṭhan kho bal ti lai lo. 20Dawi len hlah, hlat tuk a phan cang, rap in a luat mi sakhi bang a tli diam cang. 21Hliamhma cu men khawh a si i sualnak cu ngaihthiam khawh a si, sihmanhsehlaw biathli a phuangtu ca ah cun ruahchannak a um ti lo.

Depdetnak

22A mit a ṭhep len cang mi cu thil ṭha lo tuah aa tim mi a si, aho hmanh nih an thlauh kho ti lo. 23 Na hmai ah cun khuaihliti bang a thlum, na bia kha a kaa in an thangṭhat len; sihmanhsehlaw na hnu ah cun chim ding adang a ngei, cun na bia kha tluknak ah a hman. 24Huattlai tampi ka hmuh cang, nain amah tluk in huat a tlai mi an um lo i Bawipa zong nih a huat ve. 25Van ah lung a chep mi cu amah lu cung lila ah aa cheh bang in rawiphiarnak cu kaphnih in a fahter.  26Khor a co mi cu amah lila a tla lai i rap a chia mi cu amah lila aa foih lai.

27Chiatnak a tuah mi poh cu khua zei in a rat ti hngalh lo in chiatnak nih a tlunh lai. 28Nihsawhnak le sersatnak hna cu mi porhlaw hna i nunzia a si, sihmanhsehlaw chiandeih nih a sa a bawh bang in teirul chamnak nih a hngah ko hna. 29Biaknaklei aa zuam mi hna tlaknak ah aa lawm mi poh cu rap nih a foih hna lai, cun an thih hlan ah nganfahnak nih a tlunh hna lai.

Lungtlin lonak

30Lungfahnak le thinhunnak zong hi hruh thil an si i misual cu an pahnih i an saya a si.