SIRACH 31

Rumnak hna

31    1Rumnak nih a chuahpi mi hngilh lonak nih mi pakhat cu a khing a zorter; a chuahpi mi lungretheinak nih aa hngilhter kho lo. 2Chun i lungretheihnak nih fakpi zawtnak bang a mitkuh thawtnak a thah. 3Mirum cu ngut lo in a ṭuan i tangka cu a khon, cun aa dinh tikah thil ṭhaṭha he a khat; 4Misifak cu a ṭuan zungzal ve nain a paw hmanh ṭhaṭhi in aa cawm kho lo, cun aa din tikah a si a fak chinchin.

5Tangka a duh mi ca ah sualnak hrial cu a fawi lo, a miak a kawl mi cu a rawk lai.  6Mi tampi cu sui ruang ah an rawk cang; an ratpi mi rawhnak cu amah tein a fiang ko, 7 Cun a duh tuk mi ca ah sui cu rap a si i mihrut vialte cu an i foih dih ko. 8Sualnak a ngei lo mi le sui hnu a zul rih lo mi mirum cu milunglawm an si. 9A ho dah a si, lawmhnak bia ka va chimh lai, zei ti tiah a mi hna lak ah khuaruahhar thil a tuah kho cang. 10Aho dah hi hneksaknak cu a tong i hlawhtlinnak he a chuak kho? Aa lungsi tuk lai. Aho dah sualnak caan ṭha a ngei nain a sual lo, palhnak caan ṭha a ngei nain a palh lo?  11A rumnak cu a hmun lai i mibupi nih a siannak cu an conglawmh lai.

Rawlei ningcang

 12Rawl thawthaw an hunnak cabuai ah na ṭhut tikah na orkhutnak cu langhter hlah, ‘Ei ding a tam khawh ning!’ ti hlah. 13Hakkauh mit ngeih cu a ṭha lo ti kha philh hlah; mit nakin a chia deuh mi thilnung a um ti hnga maw? - cucaah pei a ṭah zungzal cu. 14 Na inn ngeitu mit nih a ngiat mi sa cu va la hlah, a kheng ah va purhchih hlah.

 15Na khual nih a herh mi cu nangmah tein va kawl law fim ngai in cawlcang. 16Nu le pa nih chimhhrin mi bang an i hunh mi rawl kha va ei, namchan tuk in ei hlah. 17Zoh dawh ah ei dih hmasa i zuam, ram tuk in nung hlah, na hawi a lung na fahter sual lai, 18cun mi an ei hlan ah va ei hlah.

19 Khim tein a ei tawn mi ca ah tlawmte aa za ko; ihkhun ah a zau tik zong ah a thawchuah a nuam. 20A zafang einak nih mitku a thawtter, lungtho ngai in tuante ah a tho. 21Lungdongh, hnabei dongh le hngilh khawh lo ti mi hna cu orkhu hna nih an tuar ding mi a si.  Tam tuk an in eiter ahcun leng ah va lua ta, cun naa ning lai. 22 Ka fa, zei rel lo in ka um hlah, ka bia hmual cu na hngalh te ko lai. Na cawlcanghnakkip ah a tawkzawn hngal law na zaw lai lo. 23Rawl thawthaw a ei mi cu mi nih an thangṭhat hna i mingei ah an ruah mi hna zong a hmaan, 24sihmanhsehlaw mikip nih a khiar mi inn ngeitu cung ah an lung a um i a khiarnak kong cu an ceih lengmang.

Mitsur zu

25Zu din ah na ṭhawnnak va langhter hlah, zei cah tiah zu cu mi tampi ca ah a rak ṭha ti lo.  26Mei nih thir si ning kha a langhter, miporhlaw hna bia an i al tikah zu nih an lungthin a langhter ve. 27A tawkzawn thiam ahcun zu nih nunnak a pek. Zu a um lo ahcun nunnak cu zei tin dah man a ngeih hnga? Minung lung nuamhter awkah a um mi a si. 28 A caan le a zatawk hngalh ahcun zu cu lungthin a nuamhter.

29Sihmanhsehlaw tam tuk din tikah lungfahnak, thinhunnak le ralṭhatnak an hung chuak.  30 Zu ritnak nih mihrut kha amah rawhnak ca ah a thin a hunter, thongh aa timh ah khan a tha a tla cang. 31 Zu din lio ah na mileng kha a thin va khenh hlah, cun aa nuamh lio ah va capo hlah, rian fial hlah, cun leiba cawhnak in a ing va puanter hlah.