Judit 15

15 Thlam chung i a um mi hna cu thawngpang an theih tikah an lau tuk. 2ṭihphannak in an khat i hmunkhat ah um kho ti lo in tlangcung le nelrawn ti lo in an hmuh mi lam poh zul in an zam cio cang. 3Bethulia pawngkam, chikkhat idornak thlam in ral a vengtu hna zong an zaam ve. Cu tikah Israel raltuk minthang hna nih an dawi hna. 4Uzziah nih khan Betomasthaim, Bebai, Khoba, Kola le Israel ram vialte hna kha thil si ning thawng thanh ding le ral hna kha dawi i ningzahter ding fial awkah an sin ah mi a thlah hna. 5Israelmi hna cu thawngpang kha an theih tikah annih kha mi pakhat cung tlakhnawh bang an tlak hnawh hna i Khoba lam ah khan an saam dih hna. Jerusalem khuami hna le tlangcungmi hna zong ral riahbuk i thil a cang mi kha an theih ve tikah hmunkhat in an zuan hnawh ve hna. Cun Kilead le Galilee nih a siarlei in an rak tuk ve hna i Damaska le a ram pawng tiang ṭha lo in an den hna. 6Adang Bethulia khuami hna nih Assiriami hna i riahbuk kha an tlaak hnawh i an thilri cu tam lakte an lakpiak hna. 7Thahnawnnak in a rak kir mi Israelmi hna zong nih a tang mi kha an thah rih hna. An thillri cu tampi an rak khon caah tlangram khuate hna zong nih khan hranchaw tampi an i lak ve.

Lawmhnak

8 Tlangbawi ngan Joakim le Jerusalem ah a um mi Israel upa hna i khongsil chungtel vialte cu bawipa nih Israel cung ah a toih mi thluachuahnak zoh awk le Judith kha ton i amah kha lawmhnak bia chimh awkah an ra. 9Amah inn kha an rak phak tikah an dihlak aw khat tein:

Nangmah cu Jerusalem sunparnak na si! Nangmah cu Israel sunparnak na si! Nangmah cu kan miphun i a ngan bik mi upatnak na si! 10 

Hi vialte hi na kut in na tuahnak thawng in Israel cu a limhang na kaiter i Pathian nih na tuah mi cu thlua a chuah cang.  Zeizong tuah kho Bawipa nih nangmah cu a ra lai mi caan chung vialte thluachuahnak in pe hram ko seh,” tiah an ti.

Cun mi vialte nih khan, “Amen!  an ti cio.

11Riahbuk an hranh cu ni sawmthum chung a rau. Annih nih Judith kha Holoferni thlam, sui hrai dihlak, a ngunkheng hna ti a dinnak hrai hna le a ṭhutdan le a cabuai vialte kha an pek. Judith zong nih hi thil vialte cu aa lak, a khacer cung khat lak in a khinh, a cawleng kha a chuah i a cung ah a pumh hna. 12 Israel minu vialte cu amah ton awkah rianrang in an rak chuak i a phuphu in an lam i amah kha upatnak an rak pek. Judith cu a kut in mitsur hnah bor kha a lak i a hnu a zul mi nu hna cu a phawt hna, 13amah le a hawile hna cu Olive pangpar ṭhi kha an i oih. Cun cuti a tlar in an kalnak hmai ah khan a chuak i nu pawl kha hmai in a laampi hna. Israelmi pa vialte hna cu hriamnam an i putpah in pangpar ṭhi kha an i oih i, Pathian hla sakbu in an zulh hna.  14Israelmi hna laifang ah a um mi Judith cu hi lawmhnak hla kha a phan i mi bupi nih hi hla cu an sak.