SIRACH 44

B: TUANBIA

Pupa hna thangṭhatnak

44 Cun minthang hna, kan pupa hna cu an chan a changchang in thangṭhat hna usih.  2Bawipa nih sunparnak kha tampi in a rak ser cang, a hlanpi in a lianghngannak cu a rak langhter cang. 3A cheu cu siangpahrang sinak in nawl an ngei i an ṭhawn caah an min a thang; adang cu a fim ngai mi ruahnak petu hna an si i profet bia kha tampi in an chim. 4Adang cu mipi kha ruahnak ṭha peknak, mipi ruahnak an hngalhnak le an cawnpiak mi mifim hna bia thawng in an hruai hna. 5A cheu cu hla an phan i tuanbia kha an chimh hna; 6adang cu an rum an ṭhawng i an innte ah hnangam tein an um.

7Hi vialte cu an chan minung hna nih an upat hna i an chan i sunparnak an si. 8 Cheukhat an min cu a hmun i an thangṭhatnak hla cu atu tiang sak an si rih. 9Sihmanhsehlaw acheu cu an philh lonak zei hmanh a taang lo i a rak um bal lo mi bang an lo cang. Atu annih cu a rak nung bal lo mi bantuk an si, cu bantuk in an tefa hna zong an si ve.  

10Sihmanhsehlaw hika ah hin an tuahsernak a taang rih mi min cazin cu an si. 11An tefa hna ah khan anmah an rosung, an fale hna cu a um zungzal. 12An tefa hna cu nawlbia kha fek tein an i tlaih, cun an fale i fale hna zong cutin an tuah ve. 13An ciruang cu a hmun camcin lai i an sunparnak cu a ziam bal lai lo. 14An ruak cu daihnak he an vui hna i an min cu chankhat hnu chankhat a nung. 15Mi nih an fimnak kha an thanh lai i mipi pumhnak ah an thangṭhatnak puai cu an tuah lai.

Enoch

16Enoch cu Bawipa lung a tong i van ah cawi a si, amah cu chankhat hnu chankhat lungthlennak ca ah zohchunh awktlak a si.

Noah

17Noah cu a dingfel tuk mi a si, amah cu dantatnak caan ah roco a si: ti a lianh tikah khan amah thawng in vawlei ah hin minung phun a tang. 18Ser mi kip cu ti in hrawh a si ti lai lo ti mi, a hmun mi thisen biakamnak cu amah he tuah a rak si.

Abraham

19Miphun tampi hna i pupa ngan, Abraham, sunparnak ah amah he aa tluk mi an um rih lo. 20Amah cu Cungnung Bik i Phungbia kha a zulh i amah he thisen biakamnak a rak ser. Mah thisen biakamnak cu a thisen in a fehter i hneksak caan ah zumhtlak a si kha a langhter. 21Cucaah Pathian nih a tefa hna sin in miphun vialte kha thluachuah pek awkah chiatserh in bia aa kam, cucu annih kha leidip zat karhter awk le a tefa hna cu arfi bang cawisan awkah a si, an ram kha rili khattelei in a dang khattelei tiang, cun Tivapi in vawlei dongh tiangkha ro ca i pek awkah a si

Isaac le Jacob

22Cun, a pa Abraham hmai zoh in Isaac zong kha, ‘Miphun vialte i thluachuahnak,’ cu a cung ah a fehter; 23thisen biakamnak cu Jacob lu cung ah a khin.  A thluachuahnak in amah cu a fehter chinchin i hmunram kha ro ca ah a pek; kha ram cu a cheu hna i miphun hleihnih hna lakah a phawt hna.