II: TOBIT A MIT A CAW

2. 1.Cu caah Esarhaddon a pen lio ah khan ka kir ṭhan i ka nupi Anna le ka fapa Tobias cu an ka pek ṭhan. Kan Penticost puai ni (Zarh hna puai) ah cun zanriah thawthaw kan ngei. Rawl ei awkah ka ṭhu; 2 cabuai cu an ser i meh a phunphun an rak chiah. Cun ka fapa Tobias cu, ‘Ka fapa, va kal law Nineveh i kan unau ralzaam hna lak ah midingfel, a si fak mi pakhatkhat kha va kawl, cun ka rawl hrawn awkah rak chuahpi. Ka fapa, na rak kir hlan lo poh cu kan hngah lai,’ ka ti. 3 Cu caah Tobias cu kan unau hna lak i misifak mizeimaw kawl awkah a chuak, sihmanhsehlaw a rak kir i keimah kha, ‘Ka pa,’a ti i keimah nih, ‘Hoihlaw Ka fapa, zei dah?’ tiah ka leh. Amah nih, ‘Ka pa, kan rammi pakhat cu atu naite hrim ah khan an thah; an hnuh i bazaar ah an hlonh; khika ah a um rih ko,’ ti in a peh. 4 Hmakhatte ah ka tho, ka rawl cu tong lo in ka kaltak, mipa cu bazaar pawng in ka lak i ka khaan pakhat ah ka chiah, vui awkah nitlak ka hngah. 5 Ka rak lut ṭhan, ka kut kaa ṭawl i ngaihchia in ka ei. 6 Bethel kong ah profet Amos nih a rak chim mi bia kha a ka theihter ngai, a ti mi cu: 

‘‘Nan puai hna cu ngaihchiatnak ah le nan hlasak thawng vialte hna cu ṭahramnak ah ka thlen hna lai,

 ’Cun ka ṭap. 7 Ni a tlak tikah ka chuak i thlaan cu ka cawh i ka vui. 8 Ka innpa hna nih an ka nihsawh i keimah cu, ‘Zoh hmanh, zei hmanh a ṭih ti lo. (Nan theih ding mi cu hi bantuk hrimhrim ruang ah hin ka lu man an rak phalh cang ti kha a si) ‘Cu hlan ah voikhat a rak zaam cang nain atu zong mithi a vui ṭhan hoi hi,’ an ti.

 9 Mah zaan ah cun kaa kholh; inntual ah ka va chuak i tual vanpang hram ah cun ka zau.Khua a sat caah ka hmai kaa huh lo. 10 Ka lu cung vanpang ah pithlung an um kha ka hngal lo, an ek sapi cu ka mit chung ah an rung tla. Hi nih hin ka mit chung ah a bo rangte a canter, sibawi hna sin ah ka kal. Sihmansehlaw an ka thlop deuhdeuh, ka mit cu a caw deuhdeuh, cun a donghnak ah ka mit a caw lan ko. Kumli chung khua ka hmu lo; ka unau hna cu keimah ca ah an ngaih a chia ngaingai; cun Ahikar nih, Elymais ah aa ṭhial tiang, kumhnih chung a ka cawm.

11 Cu tikah ka nupi Anna cu nurian kha a thawk cang; la a thlur i thiam a tah; a tahcia hna cu a va pek hna i a man kha aa lak tawn. 12 Atu Distros thla nisarihnak ni ah khan puanthaan pakhat tah a dih i a cah mi hna kha a va pek hna. A man kha tling tein an pek dih, cun an biakam bang in meheh fate kha laksawng ah an chapchih. 13 Meheh fate inn a rak phanh tikah a awn cang. Ka nupi cu ka auh i amah kha, ‘Hi saṭil hi khua zei in dah a rat? Fir mi a si sual ah! A ngeitu kha pe ṭhan ko; fir mi chawva einak nawl kan ngei lo,’ tiah ka ti. 14 Amah nih, ‘A si lo, ka nihlawh leng ah an ka chap mi a si,’ tiah a ti. Amah kha ka zum lo i a ngeitu pek ṭhan awkah ka chimh (Amah kha ka zahpi ngaingai). Cu tikah amah nih, ‘Na pekṭhenhnak vialte le thilṭha na tuah mi vialte cu khua zei ah dah an si dih? Zei dah na hmuh ṭhan ti cu mikip nih an hngalh,’ tiah a ka leh.