Tobit 1

         TOBIT

 1.1 Tobit i tuanbia, amah cu Aduel, amah cu Ananiel i fapa, amah cu Tobiel i fapa, amah cu Naftali phun le Asiel ciruang a si mi Gabael fapa a si. 2 Amah cu Assyria siangpahrang Shalmanesar chan ah Thisbe in ralzaam pakhat a si. Thisbe cu Chaklei Galile Kedesh –Naftali thlanglei kap, Hazor cung, nitlaklei in zeimawzat aa hlatnak, Shefat chaklei kap ah khan a um.

I: RALZAAM TOBIT

3 Keimah, Tobit cu ka nunchung vialte biatak le ṭhatnak tuahnak lam a rak zul mi ka si. Keimah bang Assyria ram Nineveh ah a zaam mi ka unau le ka rammi hna kha bawmhnak tampi ka rak pek hna. 4 Ka no lio caan, Isreal ram i ka rak um lio ah hin, keimah ka pupa hna a si mi Naftali phun cu a ningpi in David Chung le Jerusalem - hihi cu Isreal miphun vialte raithawinak ca i thim mi khualipi a si, hika ah hin Biakinnpi-Pathian umnak hmun - a ra lai mi chan vialte ca ah sak le pekchanh mi a rak si ko-nain cucu an rak chuahtak. 5 Ka unau le Naftali Chung dihlak cu Israel siangpahrang Jeroboam nih Dan ah a rak derh mi cawfa zuk kha Galilee tlangkip ah khan thawinak an rak pekchanh tawn. 

            6 Israel fale vialte zungzal a ṭemchih mi Phungbia tlinter awkah atu le atu keimah lawngte in Jerusalem ah biaknak khualtlawn kaa thawh tawn. Jerusalem ah cun thlaithar le fater, saṭil cheuhra cheukhat le meh hmasa tuuhmul thawhlawm hna he kaa hnawh tawn. 7 Hi hna cu biakṭheng ca ah Aaron fale a si mi tlangbawi hna cu ka pek tawn hna. Jerusalem i rianthiang a ṭuan mi Levi mi hna cu mitsur zu, fangvoi, Oliv, taleti thei le thingthei dangdang hna i cheuhra cheukhat cu ka pek tawn hna. Kumruk pehzulh in ka tangka chung in a voihnihnak cheuhra cheukhat cu ka lak i kum fatin Jerusalem ah ka va pek tawn. 8 A voithumnak cheuhra cheukhat cu ngakṭah le nuhmei le Israelmi hna lak ah khua a sa ve mi khual hna kha ka pek tawn hna; annih kha kumthum dan ah laksawng in voikhat ka put tawn hna. Kan ei tikah Moses phunglam le a kan hringtu Ananiel i a nu Deborah i forhfialnak kha kan zulh; zei cah tiah ka pa nih a ka thihtak i ngahṭah ka si. 9 Ka hung cut tikah kan phun chung in nu pakhat, amin ah Anna an ti mi kha, ka ṭhit; fapate pakhat a ka hrinpiak i a min ah Tobias ka sak. 

           10 Assyria ram i ṭhawlnak a phanh tikah Nineveh ah an ka hruai. 11 Ka unau le ka phun-hawi vialte cu lawkimi hna rawl kha an ei, sihmanhselaw keimah tu cu lawkimi hna rawl ei lo ding kaa ralring ngai. 12. Cun ka Pathian kha ka lungthin dihlak in ka rak zumh caah, 13 Cungnung Bik nih Shalmanesar mithmai ṭha a ka hmuhter i siangpahrang eidin a chantu ah ka cang. 14. A thih tiang Media ah ka tlawng tawn i amah aiawh in cuka ah cun chawleh chawhrawlnak ka tuah tawn, cun ngun tangka ṭalen pahra tlum songkhoi hna kha Media ram i Rhages khua ah a um mi Gabrias unau Gabael sin ah a miak hmuh ding in ka rak chiahtak.

           15. Siangpahrang Shalmaneser a thih tikah a fapa Sennacherib nih a chaan. Media lam cu an khar i khika ah ka kal kho ti lo. 16 Shalmaneser chan ah cun ka phun hawi hna kha atu le atu ka pekṭhenh tawn hna; 17 Rawl a ṭam mi kha rawl ka pek hna i hnipuan a ngei lo mi kha hnipuan ka pek hna. Cun Nineveh vanpang in an hlonh mi ka phun hawi hna ruak kha ka hmuh tikah ka vui hna.

           18, Sennacherib nih a thah mi hna zong kha ka vui hna. Sennacherib cu Van siangpahrang nih thangchiatnak a chim mi ruang ah dan a tat i Judaea ram in ningcang lo in a rak kir tikah a thinhun in Israelmi kha tampi in a thah hna. Cucaah an ruak kha vui awk ah ka fir tawn hna; Sennacherib nih a kawl hna i a hmu kho hna lo. 19 Nineveh khuami pakhat cu siangpahrang sin ah a kal i a thli tein a vuitu cu keimah ka si kha a va chimh. Keimah kong kha siangpahrang nih a theih i keimah cu thah awkah mi nih an ka kawl cang ti kha ka hngalh tikah ka ṭih i ka zam. 20 Ka thilri vialte cu an tlaih i ram ngunkuang ca ah an lak dih; ka nupi Anna le ka fapa Tobias hna dah ti lo zei hmanh a tang lo. 

          21 Ni sawmli a rauh hlan ah siangpahrang cu a fapa pahnih hna nih an thah, annih cu Ararat tlang ram ah an zaam. A fapa Esarhaddon nih a chaan. Ka unau Anael fapa Ahikar cu a pennak uktu cazin tlai luban ah a thim i zungrian tawlreltu ṭuanvo a pek. 22 Ahikar nih a ka nawlpiak i Nineveh khuapi ah kirnak nawl ka hmuh, zei tin tiah Ahikar cu Assyria siangpahrang Sennacherib tang ah khan hraitlai luban, a cakhenh kengtu, uktu le chawkeng a rak si, cun Esarhaddon nih a zung ah a ṭhutter; amah cu ka chungkhat, ka tupa a si.