2 Maccabaeus 13

Antiochus V le Lysias hna ralthawhnak. Menelaus ṭihnung thihnak

13 Kum 149 ah khan Antiochus Eupator cu a ralkap hna he Judea ram kha an rat hnawh,  2 cun amah he khan a saya le a bawi luban Lysias zong, cun Grik ralkap 120,000, rang ralkap 5,300 le raltuknak ca vui 22 le hlawksau namkuai ṭemhchih mi rangleng zathum he an si ti kha an theih.

3Cun Menelaus zong a hun i fon ve i Antiochus kha zer ngai in a ram ca ṭhatnak si lo in amah rian hmuh ṭhannak ca ah a nawlchih len.  4Sihmanhsehlaw Siangpahrang hna i siangpahrang nih Antiochus cu michiahru cung ah a thin a hunter, cun Lysias nih siangpahrang kha Menelaus cu buainak hrampi a si ti kha fiang tein a hmuhter. Antiochus nih Menelaus cu Beroea ah kalpi i khika ah an khua phung ning in thah awkah nawl a pek hna. 5 Mah hmun ah cun dongsawmnga a sang mi innsang pakhat a um i a kam in a chunglei a ṭum mi hleihlak a um i a laifang cu vutcam in a khat dih. 6Pathian thil serhsat sualnak asilole lainawn sualnak a tuah mi an um ahcun mah innpar ah an kaipi i rawkral ding in a chung ah an thlak tawn hna. 7 Biaknak a kaltak mi Menelaus zong cutin an tuah ve, an vui lo. 8Hihi amah aa tlak mi biaceihnak cu a si ko; zei cah tiah amah nih khan a thianghlim mi biakṭheng, mei le vutcam hna a rak buar cang hna caah amah zong vutcam in a thi ve ko.

Modein pawng Jew hna thlacamnak le hlawhtlinnak

       9Cu hnu ah a lungthin cu ruahnak ṭha lo in a khat i siangpahrang cu Jew hna kha a pa chan ah a rak cang bal lo mi thil chiakha bik kha hmuhsak hna awkah a rak i thawh.  10Hi kong kha Judas nih a theih tikah a mi hna cu Bawipa nih anmah kha an Phungbia, an pupa ram le an Biakinn thiang hrawhpiaknak ding rawhralnak a tong mi hna bawmh ding, 11cun a mi hna cu an thaw an chuahka te, chiatnak in a min a thang mi ramdangmi hna kuttang an tlak nakhnga lo nawl ding ah, cu hlan nakin chun he zan he thlacam deuh ding in a nawl hna. 12An dihlak in a chim mi bia kha an ngaih, nithum chung rawl an ulh i vawlei ah an bawk, cun mitthli he zaangfah thiam Bawipa sin ah awkhat tein ngol lo in an hal. Cu hnu ah Judas nih thazaang a pek hna i amah naih ah um ding in a chimh hna.

13Upa hna he adang tein biaruahnak a ngeih hna hnu ah Siangpahrang cu a hung chuak i khualipi lak kha hngak lo in, Bawipa bawmhnak he, zeizongte tluanter awkah aa tim. 14Zeizongte cu Leicung Sertu kut ah a chanh hnu le a mi hna kha  phunglam, Biakinn, khualipi, an ram le an nunphung hna ca ah ralṭha in thih tiang tuk ding ah tha a pek hna hnu ah a ralkapbu cu Modein pawng  ah a riahpi hna. 15 A mi hna kha, "Teinak cu Pathian sin in, " ti mi biathli a pek hna hnu ah siangpahrang thlam nganpi kha ralṭha bik mino phukhat hna he zaan ah a va nam. Mah riakbuk chung ah khan minung 2,000 tluk cu an saam hna, a mi hna nih raltuknak vui ngan bik pakhat cu aa cittupa he an thah. 16 An riahbuk cu ṭih-launak le tuaitamnak in an khahter hnu ah 17 khua a vun dei ah khin hlawhtling ngai in an kir ṭhan. Bawipa nih Judas a pek mi humvennak thawng in cu tluk cun thil an tuah khawh.

Antiochus cu Jew hna he remdaihnak tuah aa zuam

18Siangpahrang cu Jew hna ngamhsannak kha a teh cang caah atu cu an umnak kha a thluak in lak ding aa zuam. 19 A fek ngai mi Jew hna ralhau pakhat a si mi Beth–Zur kha a fuh; sihmanhsehlaw, amah cu an rak kham, an tei i an khirh.

       20 Judas nih ralvengtu hna kha an herh mi vialte a pek hna; sihmanhsehlaw, Jew ralkapbu chung in Rhodoka an ti mi nih ral hna kha thawng a pek tawn hna. 21 Mahpa cu an hngalh tikah an tlaih i a phut ning in daan an pek.  22 Avoihnihnak ah siangpahrang nih Beth– Zur ralvengtu hna kha remnak za a chanh hna, an biakamnak zong a cohlan ve, a kir, cun Judas le a mi kha a tuk hna; asinain a sung rih hoi. 23 Cu hnu ah amah rian a rak chawngchung ding a chiahtak mi Filip cu Antioch ah ral a tho cang ti kha an chimh. Hi nih hin a khuaruah a harter ngai, cucaah Jew pawl hna he biaruahnak a tuah, hnatlaknak an ngei i zei thil a tlun zong ah a biakam hmunhter ding in chiat aa serh. 24Hnatlaknak an ngeih caah raithawinak a pekchanh, Biakinn kha a upat i a thiang mi hmun hna ca ah siang ngai in a hlu a pek ve.

       25 Makabi kha ṭha tein a cohlan, dawtnak in a cohlan i Hegemonides kha Ptolemai in Carreniami hna ram tiang uknak a pektak i 26 amah cu Ptolemai khuami hna sin ah a kal, khika hmun i mi hna nih an hnatlaknak cu an hna a tla lo; thinhung ngai in an phunzai i  hrawh ṭhan an duh. 27Lysias cu dawnhhlei cung ah a kai i hnatlaknak kha dirkamh in bia a chim tikah an hna a tla ṭhan i an lung a ton ṭhan hna. Cu hnu ah amah cu Antioch ah aa zuk. Siangpahrang ral a tuknak le a kir ṭhannak tuanbia cu hi vialte hi an si ko.