Judit 9

Judith thlacamnak

9 Judith cu vawlei ah khan aa hlonh, a lu cu vutcam a phulh, aa hruk mi buri lawng kha nganh in Bawipa sin ah aw thang pi in a au. Cu lio ah Jerusalem ah khan zanlei zihmui khangh thawinak cu Pathian Biakinnpi ah khan an pekchanh liopi a si ve.

Judith nih: 

2Ka pu Simeon i Bawipa Pathian, nangmah nih amah cu ramdangmi hna teirul cham awkah hriamnam kha na rak pek, annih cu ngaknu thiang kha ningzahter awkah a taisawm an phoihpiak, atai lang lak in a hni an hlimpiak, a paw cu an thurhnomh i mual an photer, nangmah nih, “Hihi cu a si awk a si lo,” na ti nain an tuah ko. 3Hi ruang ah hin an hruaitu hna cu thah awkah na chanh hna i an rawiphiarnak lungthin nih a buar mi an ihkhun cu thisen in an rawi.  Sal cu an bawi hna he na den hna i an bawi hna cu an sinum hna he na den hna. 4An nupile hna cu kalpi awk le an fale hna cu sal i tlaih awk le an hranchaw hna cu nangmah an ṭanhtu na dawt mi na fapa hna le an kut ah aa neh mi an thisen a hua tuk mi hna le nangmah sin ah bawmhnak a rak halmi hna lak i phawt ding ah na canter  hna.

Maw Pathian, keimah Pathian, atu hi nuhmei nu i thlacamnak cu rak ngai hram ve ko; 5zei tin tiah, nangmah nih a liamcia caan, cun atu caan le a si lai ding mi caan na ser hna.  Atu a si mi, a si lai ding mi cu nangmah nih lai na rel hna i a si cang mi zong nangmah nih na rak timhtuah mi a si. 6Na tinh mi thil hna cu hmailei hoih in an dir ko; annih nih, ‘Zoh hmanh, hika ah kan um ko,”tiah an ti. Zei cah tiah, na lam hna cu timhcia dih an si i na biakhiahnak hna cu hngalhcianak he tuah mi an si. 7Ralkap tampi he, Assiria mi hna khi hei zoh hna hmanh, annih cu an rangtum hna le an cungcuang hna ah khin sunparnak an i lak i an ke-ralkap thazaang hna ah khin an i porhlaw. Phaw le fei le an likuk le chai hna kha an i bochan i ralkap-tlar pipi hna a khuai khotu, 10nangmah cu Bawipa na si le 8nangmah lawng Bawipa na si kha an in cohlang lo.

 Na ṭhawnnak in an puarthaunak hna cu deng hna law na thin hun in an thazaang cu chat ko. Zei cah tiah annih cu na hmunthiang hna kha buar i na min thiang a umnak na biakṭheng hna cu thurhnomh awk le na cabuai kil hna kha thlongh awkah aa tim mi an si. 9An luannak cu hmu in na thinlinhnak cu an lu cung ah toih law ka lung chung ka ngeih mi thangzaang cu hi nuhmei nu kut ah chia ko. 10Ka hmur hlenthiamnak in sal cu a bawipa he tu law a bawipa cu a sinum he tu ve ko. An ruamkainak cu nuhmei nu kut in khiak ko. 

11Na thazaang cu milu ah a um lo i na ṭhawnnak cu miṭhawng hna cung ah a um lo; zei cah tiah nang cu mitoidor hna i Pathian, hrem mi hna bawmtu, a derthawm mi hna chanhtu, hnon mi hna dornak, lungdong mi hna khamhtu na si. 12Ka pa i Pathian,17Israel roco hna i Pathian, Van le vawlei sertu Bawipa, zeizong vialte i Siangpahrang, zaangfahnak in ka thlacamnak cu rak ngai ko sawh.  13Cu bantuk ṭihnung khua a khang mi hna, na thisen biakamnak a doh mi hna, na umnak hmunthiang a doh mi hna, Zion Tlang a doh mi hna le na fale hna inn a doh mi hna kha hliam in thah awkah biachim thiamnak hmurka ka pe ko sawh. 14Cun ramkip le miphunkip kha zeizong tuah kho Pathian na sinak le nangmah hlei cun Israel nih hupphengtu dang an ngei ti lo ti kha langhter ko cang,’ tiah thla a cam.