2 Maccabaeus 4
IV. ANTIOCHUS EPIFANES KUTTANG GRIK PHUNG
AUPINAK LE HREMNAK
Biakinn zohkhenhtu Simon i tuahsernak ṭha lo hna
4 Biakinn chawva kong bia dik lo a chimtu le a ram a rawitu ti in cung ah kan rak chim cang mi Simon nih khan Heliodorus tukvelhnak kong ah Onias ṭuanvo a ngei i hi vanchiatnak cu amah nih a tlunter mi a si ti in Onias cu a thangchiat. 2Atu Simon nih khualipi a bawmchantu, a miphun a dirkamhtu le phunglam hna a ṭanhtu mipi ṭhatnak ral a si ti in a chim ngam. 3An i huatralnak cu a fah chin caah Simon a mi cheukhat nih lainawnnak tiang an tuah, 4hi tikah, Onias nih an i ralnak cu zei tluk in ṭih a nun ti kha a hngalh i Menestheus fapa Apollonius, Coele-Siria le Fonisia ralbawi lu bik hna nih Simon kha chiatnaklei ah tha a pek ti kha a theih tikah 5siangpahrang kha a phun hawi hna sual a puhtu thangchiatnak va chim awkah si lo in mipi dihlak le pumpak ca ṭhatnak lungthin he a va ton. 6 Simon nih a hruh ṭhat lonak kha a ngol lo ahcun siangpahrang i thlaknak um lo in uknak cu ningcang tein a si kho ti lo ti kha a hmuh.
Tlangbawi ngan Jason nih Grik nunphung a luhpi.
7Seleucus cu hi nunnak in a chuak i Antiochus bantuk Epifanes nih ram uknak rian a hun chaan tikah Onias naupa Jason nih a upa tlangbawi ngan sinak kha a chuh ai; 8Ngun tangka ṭalen zathum sawmruk leng ah a dang ngunkhuai in a lut ding ṭalen sawmriat pek ding biakamnak he siangpahrang kha a va fuh. 9Cun siangpahrang nih lentecelhnak innpi saknak le mino hmunpi tuahnak nawl, cun Jerusalem i Antiochus chungtel hna cazin laknak nawl a pek a si ahcun adang ṭalen zakhat le sawmnga pek chap ding bia aa kam rih. 10Jason cu siangpahrang nih a hna a tlakpi i nawlngeihnak a hmuh cangka in a phunhawi hna sin ah Grik nunzia kha a luhpi colh. 11Johan thawng in siangpahrang nih Jewmi a rak pek mi hna zalawnnak kha a lakpiak hna. Johan cu Eupolemus i fapa a si i amah cu a hnu ah cun hawikomhnak le ṭanṭinak tuah awkah Rommi hna sin ah rak thlah mi kha a si, cun a phung ning in dirh mi zung vialte kha a hrawh i Phungbia he aa kalh mi phungthar kha a chuahpi. 12A tuahsernak cu zei tluk tiang dah a si ti a si ahcun ralhruang khuapi hram hrimhrim ah khan lentecelhnak innpi a sak, bawiphun fale hna kha Grik lukhuh kha i khuh awkah tha a pek hna. 13Pathian a hngal lo mi le tlangbawi deu a si lo bang in Jason chiatnak cu donghni a ngei ti lo, 14Grik nunzia nih a runh tuk cang hna i tlangbawi hna hmanh nih biakṭheng hmai ah rian an ṭuan duh ti lo; Biakinn kha hnon, a raithawinak kha tlolh in darkhuang tum thawng an theih cangka Phungbia nih a thlauh mi, lentecelhnak tual i chiti phawtnak ah i tel ding in khulrang in an chuak cang. 15Annih cu an pupa hna nih an sunsak mi upatnak kha zei rel lo in Grik sunparnak tu kha a ţha bik ah an hmuh cang. 16Asinain hi hna cu anmah harnak a petu an si; an hngar ngai mi nunphung a ngeitu hna le zei zongte ah an nun an cawn mi hna cu tlawmpal ah an ral le anmah thattu ah an i cang lai. 17Ahnu ah thil a cang hnga mi hna nih an hmuhsak lai bangin, Pathian phunglam buar cu thil hmete a si lo.
18Tair khuapi ah kumnga dan voikhat tuah mi lentecelhnak a um i siangpahrang zong a kai ve, cu lio ahcun 19miṭha lo Jason nih Hercules sin thawinak pekchanh awkah Grik ngun tangka zathum kha rak phorh awkah Jerusalem i Antiochus aiawhtu kha a thlah hna. Phaisa a phor mi hna hmanh nih mah bantuk phaisa raithawinak ah hman cu a dik lo ti kha an hngalh i adang a dih mi ca hman awk ah an chiah. 20Cucaah phaisa kha a kuatu nih Hercules sin raithawinak ca a ti nain a phortu hna ruahnak peknak thawng in, ralkap tilawng dotthum saknak caah an hman.
Antiochus Epifanes cu Jerusalem ah sunglawi ngai in an don
21Siangpahrang Filometor nupi ṭhitnak puai ah i tel ve awkah Menestheus fapa Apollonius cu Izipt ram ah an thlah. Kha pa cu ka cung ah a lung a tling lo ti a hngalh tikah Antiochus cu a himnak kha a kawl cang: cucaah Joppa ah a ra. Cu hnu ah Jerusalem ah a kal, 22Mahka ah cun amah kha Jason le khualipimi nih sunglawi ngai in an don, cun amah kha meifar i put in an hlorh. Cu hnu ah a ralkap he Fonisia ram ah a kal.
Menelaus cu tlangbawi ngan ah a cang
23Kumthum hnu ah Jason nih a cunglei kan chim cang mi Simon naupa Menelaus kha phaisa va pek awk le thil biapi dangdang hna ah lung i hmuhnak tuah awkah siangpahrang sin ah a thlah. 24Sihmanhsehlaw siangpahrang hmai a chuah tikah Menelaus nih siangpahrang kha lenglei a nawlngaihnak zoh in a thangṭhat len, cun Jason a kuat mi nak tam in ngun tangka ṭalent zathum a pekchap caah amah nih tlangbawi ngan sinak kha a hmuh. 25Amah cu siangpahrang nawlpeknak he a rak kir tikah tlangbawi ngan he aa tlak mi thil zei hmanh ngei lo, miṭha lo i thinhunnak le sahrang i thinlinhnak kha a hun i chap. 26Cuti cun a naupa a dirhmun a rak chuttu Jason cu adang pakhat nih a chuh ve caah amah cu Ammaniti ah aa dor ve. 27Menelaus cu tlangbawi ngan rian kha a hmu nain siangpahrang sin ah pek awk aa kam mi phaisa kha a pe kho ti lo, 28Sostratus, Khualipi ralbawi, ngunkhuai kholh lawng a rian a si mi nih khan atu le atu leiba a cawh cang. A hnu ah cun an pahnih in siangpahrang hmai ah an auh hna. 29Menelaus cu a naupa Lysimachus kha amah tlangbawi ngan rian rawltu i a chiahtak lio ah Sostratus nih Sypriotmi hna ralbawi Crates kha amah aiawh in rak cawlcang ding ah a kaltak.
Onias thahnak
30Hiti thil a can lio ah hin Tarsus le Millasmi hna cu ral an tho; zei cah tiah an khuapi hna cu lawmman ca ah siangpahrang nuchun Antichis kha an rak pek. 31Siangpahrang cu mah bia daihter awkah rianrang in a chuak i a bawingan pakhat a si mi Andronicus kha amah aiawhtu ah a chiahtak. 32Menelaus cu caan ṭha aa lak i Biakinn chung i sui hrai tampi kha a lak hna i Andronicus kha a pek, cun adang cu Tyre le pawngkam khua hna ah khan a zuar hna. 33Thil si ning kha fiang tein a theih tikah Onias cu Antiok pawng Dafne i hmunthiang ah khan a va dor i amah kha ngunkhuai a kholh. 34Menelaus nih a thli tein Andronicus kha Onias hloh awkah a fial. Andronicus nih Onias kha a kawl, cun amah kha a orhlei kam ah ṭhutter ding ti biakamnak in a hlen, Onias nih a zum tuk lo nain hmunthiang in chuah awkah a lemsoi khawh, cu tikah dinnak vialte hnuchit in amah kha a thah colh. 35 A phichuak cu a dik lo in hi pa a thah ruang ah Jewmi hna lawng si lo in miphun dang hna zong an thin a hung i amah kha an fih cang.
36Siangpahrang cu Cilisia in a rak kir tikah khualipi i Jew hna le kha lainawnnak huatnak ah aa hrawm ve mi Grikmi hna zong nih cohlan khawh a si lo mi Onias nawnnak kong kha nawlnak an tuah. 37Antiochus cu a ngaih a chia i a zaang a fak tuk, cun mithipa fimnak le zawnruahnak kha a ruat i a lung a ṭha hrim lo. 38 Siangpahrang cu a thin a hung tuk i Andornicus kha a puansen a phoihpiak, a thilpuan vialte a thlehpiak i khualipi lamthluan ah a vahpi i Onias a rak thahnak hun hrimhrim ah khan lainawng pa cu a thah ve i Bawipa nih amah he aa tlak mi daantatnak kha a pek.
Lysimachus cu an ramchung mipi ralthawhnak ah an thah.
39Atu, Menelaus bawmhnak he Lysimachus cu khualipi chung ah a thurhnom firnak tampi an tuah, cu thil cu mikip nih an theih tikah mipi cu ral an tho, zei cah tiah amah nih sui kheng le hrai hna kha tampi a fir cang hna. 40Mipi cu ṭih an nun tuk cang tikah Lysimachus nih minung thawngnga tluk kha hriamnam a pek hna i mipi kha hrang ngai in an kham hna. Hi ralkapbu cu a kum a upa cang i hruhnak tampi a tuah cang mi nih a hruai hna. 41Hi thil ṭha lo hna cu Lysimachus rianṭuannak a si ti kha an hun hngalh tikah lung aa char na, thingtan a la na le zapei khat leidip aa ţhuam na ti in Lysimachus minung hna cu an zuan hnawh hna i 42mi tampi kha an hliam hna; tlawmpal kha an thah hna i an ṭhio dih hna; Pathian chawva firtupa zong kha ngunkuang pawng ah an thahchih.
Menelaus nih din lonak kha a cawk
43Hi ruang ah hin Menelaus cu taza an cuai, 44Tyre ah siangpahrang a rat tikah Hlutdaw chungtel pathum nih bia cu an chuahpi. 45Menelaus cu a sunglei a panh ti kha aa hmuh tikah, amahlei ṭang in siangpahrang kha a lem khawh naklai tangka tampi pek ding in Dorimenes fapa Ptolomy kha bia a kamh. 46Ptolomy nih siangpahrang cu chikkhat i dinhta ding phun in leng ah a sawm i a lung i thlen ding in a chimh; 47siangpahrang nih ṭhat lonak vialte hrampi a si mi Menelaus kha sual biaceihnak in a luatter i amah taza a cuaitu miding hna tu kha thih daan a pek hna; annih cu Scythianmi hna sin hmanh ah chuahpi si hna seh law daantat an ing lai lo. 48Khualipi le khuate hna le biakinn thil thiang hna ca i an nunnak a pe mi, mi hna cung ah a dik lo mi daantatnak pek awk ah khul a rang tuk. 49Tyre khuami cheukhat hmanh nih hi bantuk sualnak an hmuh tikah an thin a hun tuk caah an ruak topinak ca ah chawva tampi an chuah. 50Menelaus cu nawl a ngei peng ko, a chia chinchin i a minung hawi i ral ngan bik ah aa chuah ko.