Fimnak 7

Solomon cu midang bantuk a si ve ko

7 1 Keimah zong mikip bang in a thi ding mi, vawlei in ser mi hmasa minung i tefa ka si ve. Nu pakhat paw chung ah thisa in rak ser mi ka si, 2 khika ah thlahra chung, thisen chung in taksa ah ka cang-minung ci le nuamhnak i theipar, zan hawikom ka si ve; 3Keimah zong, ka chuahka ahcun hawi dawpcio thli kha ka dawp i mi vialte a cawi mi ṭuang cung ah ka rak tla ve; cun midang bantuk in hmasa bik aw ka chuahmi cu “ṭahnak” a si ve. 4 Puanlum in an ka hlawm i ralring tein an ka pom. 5Aho siangpahrang hmanh zei thawhkehnak hlei a ngei lo; 6zei cah tiah nunnak chung luhnak lam cu pakhat a si i chuahnak lam zong pakhat lawng a si.

Solomon nih Fimnak cung i a ngeih mi upatnak

7Cucaah thla ka cam i lungfiannak an ka pek; ka hal i Fimnak thlarau ka sin ah a rak phan.8Amah cu Bawi ṭhiangṭhunh le Bawiṭhutdan hna nakin ka sunhsak deuh; amah he tahchunh ahcun rumnak cu zei hmanh a si lo. 9Amah tluk a sunglawi mi zei lungvar hmanh ka hmu lo; amah he tahchunh ahcun sui hna cu thetsefang pakhat men an si, cun amah pawng ah cun ngun hi nawncek men a si. 10Ngandamnak le dawhnak nakin amah cu ka duh deuh, ceunak nakin ka tlaihchan deuh, zei cah tiah a ceunak a ziam bal lo. 11Amah ka komh i thil ṭha vialte ka sin ah a rak phan, cun amah kut ah cun relcawk lo rumnak a um. 12Hi vialte nih an ka lawmhter; zei tin tiah annih cu Fimnak nih a chuahpi hna, kha caan lio ah amah cu an nu a si kha ka rak hngal lo. 13Biatak ngai in ka cawn mi cu zalen ngai in ka chanhchin. Zei tluk in dah a rum ti cu ka thup bang lai lo. 14Zei cah tiah amah cu minung hna ca ah a dih kho lomi chawva a si; cun hi thil a hmu mi hna nih Pathian hawikomhnak kha an co; cawnpiaknak laksawng in a ra mi a si.

Pathian fimchimhnak ca nawlnak

15 Amah nih a ka duhpi bang in ka chim khawhnak hnga le ka hmuh mi laksawng hna he aa tlak ning in ruahnak ka ngeih khawh nakhnga Pathian nih thluachuah ka pe hram ko seh, zei cah tiah amah cu Fimnaklei lamhruaitu le mifim hna lamchimtu a si; 16zei cah tiah kannih vialte, biatak in, kanmah le kan robia hna hi, cun cathiamnak in le nunpinak in hngalhnak vialte cu amah kut chung ah kan um dih. 17Amah he a um mi le a nung mi hna kong, vawlei si ning le a chung thil hna an cawlcangh ning, 18 caan an i thawknak, a laifang le a donghnak, nicaan aa thlennak le khuacaan an i channak, 19 kum aa mernak le arfi hna an umtu ning, 20saṭil hna nun ning le sahrang hna theihhngalhnak, thlarau hna huham le minung thluak kal ning, thingkung phun liangluang le thinghram hna chung i sii hna lungfiannak ca ah a si. 21Atu zei zongte, thuh mi he a lang mi he ka hngalh dih cang, zei  cah tiah zei zongte khua a khangtu Fimnak nih a ka cawnpiak cang.

Fimnak thangṭhatnak

22Zei cah tiah amah chung ah a fim mi, a thiang mi, a ce mi, aa cawhṭhup mi, a nem i a thuk mi, a cawl mi, a kerkoi mi, lem khawh lo mi, a tleu mi, hliam khawh lo mi, a siang mi, a zer mi, 23kham kho lo mi, a tling mi, minung phun he aa kom mi, a fek mi, hngatchan a tlak mi, hnahnawh khawh lo mi, zei zong tuah kho, zei zongte hlathlai dihtu, hngalhnak vialte a hlattu, a thiang le a nem bik mi thlarau a um.

24 Zei cah tiah Fimnak cu a cawl kho mi zei thil nak hmanh in a rang deuh; a thian tuk caah zei zongte chung ah a lut i a hlat dih. 25Amah cu Pathian ṭhawnnak thaw a si; Lianngan Bik sunparnak i thiang mi a chuahnak a si; cucaah a thiang lo mi zei hmanh a chung ah a lut kho lo. 26Zei cah tiah amah cu zungzal ceunak hmanthlak a si, a nung mi Pathian ṭhawnnak thlalang thiang le a ṭhatnak mui a si.

27Amah te lawng a si nain zei zongte a tuah khawh; amahte cun aa thleng lo nain leicung cu a tharchuah; cun, chankhat hnu chankhat in thlarau thiang hna chung ah a lut i annih kha Pathian hawi le profet ah a ser hna; 28 zei tin tiah Pathian nih cun Fimnak he khua a sa mi lawng kha a dawt hna. 29 A ngaite ti ahcun, amah cu ninu nakin a tleu deuh, arfi bu vialte a tei dih hna; ceunak he tahchunh ahcun amah cu pakhatnak a si, 30zei cah tiah ceunak cu muihnak hmai ah a kun a hau nain ṭhat lonak nih Fimnak cu a tei kho lo.