Tobit 9

Tobit 9:1-6

IX: NUPI ŢHITPUAI

 1 Cu hnu  ah Tobias cu Raphael sin ah aa mer. 2 Amah kha, unaupa, Azarias, sin-um pali le kalauk pahnih i ṭhit hna law Rhages ah i thawh u. 3Gabael inn ah va kal, phaisa cohlannak cahnah hi va pe, cun phaisa kong cu va hlathlai tuah; cun nupi ṭhitpuai ah nangmah he rat ve ding ah va sawm.  4Ka pa cu nithla a rel cang lai ti cu na hngalh ko, a lungre thei lo in nikhat te hmanh ka liamter kho ti lo. 5Raguel cu a tuah ding mi kha amah tein bia aa kam cang kha na hmuh; a biakamnak cu ka zulh a herh,’ tiah a ti. Cucaah Raphael cu sin-um pali le kalauk pahnih hna he Media ram i Rhages ah aa thawh. Gabael inn ah an i ṭhum; Raphael cu phaisa cohlannak catlap kha a hmuhter. Tobit fapa Tobias nupi ṭhitnak kong kha a chimh i amah cu nupiṭhit puai ah a sawm chih. Gabael nih phaisa songkhoi cu a chuah i a relpiak hna- cakhenh hna cu an hmaan ko – cun kalauk cung ah an chuan. 6 Zingka tuante ah puai ah an i thawh, Raguel inn an va phak tikah Tobias cu zanriah a rak ei ko kha an va hmuh. Gabael chawnh awkah a tho, Gabael cu a mitthli a tla i amah kha hiti hin thluachuahnak a pek, ‘Soi awk a um lo mi, a tuah mikip ah a ding i a siang mi pa i fapa, thluachuahnak hmu ko! Bawipa nih van thluachuah cu nangmah, na nupi, na nupi i nu le pa hna cu in pe hram hna seh! Ka unau Tobit i a nung mi muithlam a ka hmuhtertu Pathian cu thangṭhat si ko seh!’ tiah a ti