ESTHER 10

Modekai thangṭhatnak

10 Ahasueras cu tlangram lawng si lo in Mediteranean tikulh zong kha ngunkhuai a kholhchih hna. 2Siangpahrang a lianhnganak le ṭhawnnak le Modekai a rian a kaiter ning kong vialte cu Media le Persia Siangpahrang hna cawlcanghnak Cauk ah khan an khumh dih.

3Jew miphun Modekai cu siangpahrang Ahasueras a changtu a si. Amah cu Jew miphun hna lak ah ṭihzah ngai mi a si, a unau a thongthong nih van in an zoh, amah cu a mi hna siṭhatnak kha a kawl i a miphun dihlak ṭhatnak caah a ṭuanmi a si.

1Cun Modekai nih, “Hi vialte cu Pathian nih a tuah mi a si.  2Hi thil vialte kong ka mang cu ka philh lo, a zapi in an tling dih: 6tivapi ah aa cang mi tivate, a ceu mi khuaceu, nika le tilian: Esther cu tivapi a si- siangpahrang nih a ṭhit i siangpahrangnu a ṭuanter.  7Limkeng pahnih cu keimah le Haman kan si.  8Miphun hna cu Jew miphun hna min hloh awkah aa kawm mi hna an si. 9Pakhatte lawng miphun, keimah cu  Pathian sin ah a au i khamhnak a hmu mi Israel miphun hna an si.  A si, Bawipa nih a mi cu a khamh cang hna, Bawipa nih kan ral vialte in a kan luatter cang, Pathian nih miphun dang hna lak ah a cang i a si bal lo mi khuaruahharnak le hmelchunhnak cu a tuah cang hna.  

10 Hmailei thil a si ding mi pahnih kha a sawh, pakhat cu a miphun ca le adang pakhat cu miphun dang hna cung buaktlak in a cang ding mi thil kha a sawh. 11 Hi thil pahnih hna cu miphun dang hna i tel in, Pathian nih ri a khiah ni, suimilam le caan ah an cang. 12 Hiti hin Pathian nih a miphun cu a philh lo i a roco cu thiam a coter; cun annih ca ah hi ni hna, Adar thla i ni hleithumnak ni le ni hleilinak ni hna cu, Israel fale hna lak ah chankhat hnu chankhat le a zungzal in a cang ding mi Pathian hmai ah i tonpumhnak, lawmhnak le thanuamnak ni hna si awkah an si.

Hi cauk Krik in an leh mi kong chinchiahnak

Ptolemi le Kleopatra an pen kum hleilinak ah tlangbawi le Levimi ka si aa ti mi Dositheus, cun a fapa Purim kong ca hna cu an chuahpi hna. Ptolemi fapa Lisimakhus nih a leh mi cu annih nih a hmaan ti tehte an khaan. Amah cu Jerusalem i a um mi unau hna lak i pakhat a si.