2 Maccabaeus 5

Voihnihnak Izip dohnak

5 Hi caan hrawng ah hin Antiochus cu Izip kha a voihnihnak tuk awkah aa tim ṭhan.  2Cu lio ah ni sawmli dengmang khualipi cung ah  hmelchunhnak a lang:  Van ah khin suithuam he rangcittu hna cu an i chaih len; ralthuam tling he fei le nam ralkap hna, 3raltuk awkah aa tim na, aa do na, aa kham na, fei khawh thawng le i khamh thawng, tleuzukmak in a lek mi vainam hna; thal an kah mi thawng le sui mui in a ceu mi an hriamnam hna an zuan len kha an hmuh. 4Cucaah mikip nih hi langhnak cu hmelchunhnak ca a si nakhnga thla an cam.

Jason ralthawhnak; Antiochus Epifanese nih a den

5Cu hnu ah Antiochus cu a thi cang ti  mi bia vaivuan ruang ah Jason cu a tlawm bik minung thongkhat aa hruai hna i khualipi kha ruah lo pi in a tuk. Khualipi vanpang cu a vih i khualipi kha lak a timh tikah Menelaus cu ralhrau khuapi ah khan aa dor. 6Sihmanhsehlaw Jason cu zangfahnak um lo in a khuami hna kha a saam dih hna; a ngaingai ti ahcun mah rammi tuknak in teinak hmuh cu zatlaknak ngan bik a si ti kha a hngal rih lo, a mi hna tei i pangpar oihnak hmuh cu a ral hna tei bantuk in a hmu mi a lo.   7Cutin a tuah hmanh ah a nawlngaihnak cu a humhim kho hlei lo, a ruahnak ṭha lo nih amah kha mualphonak dah ti lo cu zei ṭhatnak hmanh a pe lo i, a hnu ah cun Ammaniti mi hna lak ah khan aa dor. 8Cuti cun a chiatnak cu a ngol: Arab bawi Areta nih bia a ceih, khuakhat hnu khuakhat a zaam, nawl ngai lo ti in an huat, a miphun hawi le a phunṭanh hna a thattu ti in an fih, Izip ram ah an ṭhawl i, 9a rualchan hna an si caah huhphenhnak ruahchan in rili in Lacedaemoniami hna sin ah a zaam.  Rammi hna tampi ram dang ah a ṭhawltu cu ramdang ah a thi ko; 10Mi tampi kha phum lo in a chiatu cu hraamtu ngei lo le ruak vuitu um lo, a pupa hna thlanhmun ah hmun ngei lo in a thi ko.  

11Thil si ning kha siangpahrang nih a theih tikah, Jew pawl an tho cang ti in a ruah. Cucaah sahrang bang, thinhun in Izipt in a hung chuak i khualipi kha phomh hram a thawk. 12Cu hnu ah a ralkap hna kha zaangfahnak um lo in an ton mi poh sam dih ding le an inn ah aa thup mi vialte caan dih ding in nawl a pek hna. 13Cucaah mino ti lo upa ti lo nu ti lo ngakchia ti lo nungak ti lo bawhte ti lo in thahnawnnak a um. 14 Hi nithum chung ah hin thongsawmriat hrawng hliamhma an pu, thong sawmli hrawng thih ṭha lo in an thi i cu zat hrawng cu sal ah an zuar hna.

Biakinn ramhnak

15Hi vial in a lung a tling rih lo, phungbia le a ram rawitu Menelaus kha lamhruaitu ah i ser in vawleicung ah a thianghlim bik mi chung ah a lut ngam rih, 16a kut thur pi in thil thianghlim kha a tongh hna, a kut thur pi in adang siangpahrang hna nih hmun thiang sunparnak, dawhnak le sunlawinak ca an hlut mi kha a lak hna.

17A ruam a kai tuknak ah  Antiochus nih Bawipa cu khuami sualnak ruang ah chikkhatte lawng a hmun thiang cung ah a thin a hung ti kha a hngal lo.  18Sualnak tampi chung ah rak i ciah hna hlah seh law Antiochus zong, Heliodorus bang in Seleucus siangpahrang nih chawkuang zoh awk a rak thlah ah khan a phak cangka in fung in an rak tuk i a ruamkainak cu an rak ngolter diam cang hnga. 19Sihmanhsehlaw Bawipa nih cun minung kha hmun thiang ca ah thim lo  in hmun thiang tu kha minung ca ah a rak thim caah; 20cu bang in, hmun thiang zong nih minung cung a tlung mi harsatnak aa hrawm hnu ah a caan a phan tikah minung siṭhatnak cu aa hrawm ve te ko lai; voikhat Lianngan bik nih a thinhun in a rak hnon nain a lung a tluan ṭhan tikah Lianngan bik Bawipa nih a sunparnak vialte cu a pek ṭhan ko lai.

 21Antiochus cu tangka ṭalen thongkhat le zariat kha Biakinn chung in a lak hnu ah Antioch ah a rannak in a kir; amah le amah kha ramro ah tilawng in kal ding le rili cu ke in tan ding a tuah kho bang aa cawisang i aa porhlaw. 22Sihmanhsehlaw ram kha harnak pek awkah bawi ṭha lo kha a chiahtak hna: Jerusalem ah cun a chuahnak in Phrygia miphun a si mi Philip kha a chiahtak, amah cu a nun ning in amah a thlahtu nakin a sual deuh mi a si, 23Gerizim tlang ah cun Andornicus lawng si lo in, a rammi hna kha midang hna nakin a lalhnawh deuh mi Menelaus kha a chiahtak.

Ralbawi ngan Apollonius cawlcanghnak hna

24Jew hna kha a huat tuk hna nak ah siangpahrang nih a ralbawi ngan Apollonius cu ralkap thongkul le thonghnih he pasalṭha vialte thah i nu le ngakchia hna kha zuar dih ding ah a thlah.  25Jerusalem a phak tikah daihnak minung bang aa umter, Sabbath ni tiang a hngak, Jew hna rianṭuan an i dinh kha caanṭha la in a mi hna cu hriam he a certer hna; 26 anmah a rak zoh mi vialte kha vainam in an saam hna, cun khua chung ah an lut i mi kha tam lakte an thah hna.

 27Sihmanhsehlaw Makabi ti zong in hngalh mi Judas cu midang pakua tluk he thetse ram ah aa zuk. Fingtlang par ah cun ramsa bantuk in a hawile hna he an um; cun an i thurter nakhnga lo thingram dah ti lo zei hmanh an ei lo.