ESTHER 4

Mordekai le Esther nih harnak in luat khawhnak ding an i zuam

4 Modekai nih thil si ning vialte a theih tikah a hnipuan kha a thleh i buri le vutcam he a um. Cu hnu ah a chuak i khualipi lai ah cun fakpi le lungkuai in a ṭap, 2cun chungṭuan innpi kutka tiang a rak phan, cuka ah cun buri aa hruk mi aho hmanh luhter a si lo. 3 Cu bantuk in siangpahrang nawl le cachuah a phanhnak ramkulh le pengkip i Jew pawl cu ngaihchia ngai in rawl an ulh, an ṭap an hram i mi tampi cu buri an i hruk i vutcam cung ah an ṭhu.

 4 Siangpahrangnu Esther i salle hna le tildit hna cu an ra i amah kha an chimh tikah a ngaih a chia tuk. Thil i hruk awkah Modekai kha hnipuan a kuat nain aa hruk duh lo.   5 Cu tikah siangpahrangnu Esther cu amah zohkhenh awkah siangpahrang nih a chiahpiak mi tildit Hatah kha a auh i zei dah a cang ti le zei ruang ah dah hiti hin a um ti hal awkah i Modekai sin ah a thlah.  6 Hatah zong nih Modekai a umnak chungṭuan inn i kutka leng khan a va chuak ve. 7Modekai zong nih amah pumpak cung a tlung mi siseh, cun Haman nih Jew mi hna hloh dih awkah siangpahrang chawva inn ah tangka zeizat thlak ding in bia aa kamh ti mi vialte kha a chimh dih. 8 Cu khawh in Jewmi hloh awkah Susa innpi in an chuah mi ca zong kha siangpahrangnu Esther hmuhsak awkah a pek chih. Cun siangpahrangnu kha siangpahrang hmaika ah va lut i a miphun hna caah zaangfahnak hal awkah hiti hin a cah rih: Ka kut in rawl kan tuh caan na si ningte kha philh hlah. Kan pennak ah pahnihnak a si mi, Haman nih kan thihnak ding siangpahrang sin ah a hal cang, Bawipa cu hal law, siangpahrang sin ah nawlpiak in kan nunnak cu kan khamh ko.  

 9 Hatah cu a rak kir i Esther cu Modekai nih a chim mi kha a chimh, 10 cun Modekai kha bialehnak a tuah mi cu: 11zungbawi hna le ramchung ah a um mi mikip nih an hngalh mi cu pa siseh, nu siseh, siangpahrang auhnak um lo in innpi chung amah siangpahrang khaan ah a lut mi hna ca ah cun siangpahrang nih a bawi fei kha amahlei ah a sawh i a nunnak a zuah dah ti lo ahcun, zulhphung pakhat lawng a um, cucu amah kha thah ding ti mi cu an hngalh mi a si ko. Cun siangpahrang nih a ka auh lonak hi ni sawmthum chung a si cang,’ ti hi a si.

 12 Esther bia kha Modekai a va chimh tikah 13 amah nih hiti hin a leh ve, ‘Nangmah cu siangpahrang innpi ah na um caah Jew miphun nangmah pakhat lawng na luat lai tiah i ruat hlah. 14Hi bantuk caan ah hin hnangam tein na um a si ahcun Jewmi hna ca ah khamhnak le luatnak cu adang lam in a ra men ko lai. Nangmah le na chungkhar cu nan ningpi in nan rawk ko lai. Atu bantuk caan ah siangpahrangnu na si cu hi thil hna ca ah a si lo ti cu aho nih dah a chim khawh?’ tiah a ti.

  15Cu tikah Esther nih Modekai cu hiti hin a leh ve:   16 Atu va kal law Susa khua i a um mi Jew vialte kha khawmh in keimah ca ah rawl va ulh u. Nithum chung, chun he zan he, ei lo din lo in va um u.  Kei zong nih ka sal vialte he rawl ka ulh ve lai. Cu hnu ah siangpahrang hmaika ah zulhphung buar in ka luhcchih lai i ka rawhral zong ah ka rawkral ko lai,’ tiah a ti.   17 Modekai cu a chuak i Esther nih a cah bantuk in a va tuah.  

Modekai thlacamnak

Bawipa nih a rak tuah mi khuaruahharnak vialte kha ruat in hiti hin thla a cam:  

2 Bawipa, Bawipa, zei zong tuah kho Siangpahrang, zeizong vialte cu nangmah lianngannak tang ah a um i Isreal miphun kha na khamh duh tikah nangmah an kham khotu aho hmanh an um lo.  

 3 Van le vawlei le vanrang tang i khuaruahharnak vialte cu nangmah nih na tuah cang hna. 4Nang cu zei zong vialte i Bawi na si i aho hmanh nih an in doh kho lo, Bawipa.

 5 Bawipa, nangmah cu zei zong vialte na hngalh,  6ka rak tuahcia mi vialte, mipuarthau Haman hmai ka rak bawh duh lo mi hna, cu porhlawtnak, i uanthlarnak le pakpalawng sunparnak ruang ah a si lo ti cu na hngalh.  7Isreal miphun khamhnak ca a si ahcun a kedil hmanh hmaipanh tein ka rak hnamh ko hnga.

Sihmanhsehlaw ka rak tuah mi cu ka rak tuah cang: minung i sunparnak cu Pathian sunparnak cung ah ka chia duh lo; cun Bawipa, nangmah dah ti lo cun aho tang hmanh ah ka lu ka kun lai lo i hiti hin ka tuah zong cu porhlawtnak lung in ka tuah lai lo.

8Cun atu Bawipa Pathian le Siangpahrang, Abraham i Pathian, na miphun cu zuah ko sawh.  Zei cah tiah kanmah rawhnak khua an khaan i na rosung kha hrawh dih ding ah an i tim cang.   9Na miphun si awkah Igypt ram in na rak tlanh mi na rosung cu zoh philh hin hlah.

10 Ka thlacamnak cu ngai law na roco cu rak zaangfah hraam ko sawh, cun kan ngaihchiatnak cu lawmhnak ah thleng law na min conglawmh awkah kan nung kho lai. Nangmah an thangṭhat mi hmurka hna cu daihter hrim hlah.  

 12 Cun Israel mi vialte cu an aw dih-um in an au, zei tin tiah thihnak cu anmahlei ah a hoih cang,’ ti in thla a cam.

Esther thlacamnak

12 Bawinu Esther zong cu thi deng in ngaihchiat lungfahnak a tuar ve i Pathian sin ah bawmhnak hal in thla a cam ve.  13A hnipuan ṭhaṭha cu a phoih i puanlu aa khuh. A man fak ngai mi zihmui si lo in a lu cu vutcam le caw ek in aa phulh. A pum cu fak ngai in aa hrem caah khuatuan i aa lawmhnak le aa dawhnak vialte an lo i a sam hna cu hnok cencun in an um dih cang.  14 Cun Israel Bawipa Pathian kha hiti hin a nawl:

Keimah ka Bawipa le ka Siangpahrang, pakhat te lawng Pathian, keimah lawng ka si, nangmah hlei in bawmtu ka ngeih lo caah ka khamh ko sawh, ka nunnak thap kaa tim cang.

16 Ka chungkhar tang Bawhte ka si thawk in an rak ka cawnpiak mi cu, nangmah, Bawipa nih Isreal miphun cu miphun vialte lak in na rak thim i anmah vialte hmaika ah kan pupa hna cu zungzal na rocotu si awkah na rak chuah hna i na rak kamh hna bang in na rak zohkhenh hna.

  17Sihmanhsehlaw an pathian hna kha kan biak hna caah kan sual i kan ral hna kut ah na kan chanh. 18 Zei cah tiah kannih cu an pathian kha kan rak biak cang caah a si. Bawipa, nangmah cu na hmaan peng ko

19Sihmanhsehlaw sal kan can i kan tuarharnak ah an lung a tling rih lo, 20an milem ah bia i kam in na hmurka in a chuak mi na phungbia hna kha hrawh awkah an i tim cang, cu lawng a si lo na roco kha hloh awk, 21nangmah an thangṭhat mi hmurka hna kha phih awk, na Innpi i sunparnak le biakṭheng hna cu donghter awk, 22 cun pakpalawng milem hna kha thangṭhat awkah ramdang mi hna hmurka kha hun i thisa in a nung mi siangpahrang kha zungzal milem i ser awk ah bia an i kam cang.  

23 Maw Bawipa, na bawi ṭhiangṭhunh cu nunnak a ngei lo mi hna sin ah pe hna hlah. Kan rawhnak cu capo saihnak ah siter hin hlah. An khuakhannak ṭha lo cu anmah cung lila ah tlunter law hihi cu kanmah tuknak ding lam a hruaitu hna ca ah hmelchunhnak siter ko.   24Maw Bawipa, kan philh hlah law kan temh-in caan ah hin kan sin ah rak i phuang ko.

  Keimah ca tu cu ralṭhatnak ka pe ko sawh, pathian hna i Siangpahrang le ṭhawnnak vialte hna i Bawipa!   25Chiandeih hmaika i ka luh tikah ka hmurka ah lemsoinak bia ka khumhpiak ko; a lung cu kan ral hna huatnak ah thleng hram ko, cuti cun amah le midang vialte zong amah bantuk in an nunnak a dong ve lai.

  26Kanmah tu cu na ṭhawnnak in kan khamh ko, keimah lawng ka si bang in, keimah bawmh awkah ra ko, cun Bawipa, nangmah dah ti lo aho hmanh ka pawng ah an um lo. 27Zeizong vialte a hngaltu na si i pathian hngal lo hna pek mi upatnak cu ka huat i zei bantuk ramdangmi an si zong ah cuarpartan lo hna i ihkhun cu ka fih kha na hngalh ko. 28Ka rian niam le san hmelchunhnak a si mi ka thuam vialte he zung ah chuah cu ka fih tuk ti a hngal biktu na si; annih cu puanchia thurhnawm bang ka fih hna i keimah lawng ka um tikah cun kaa thuam bal hna lo.  29Na salnu cu Haman cabuai zong ah ka ei bal lo i siangpahrang i puai zong ah kaa nuam bal lo, thawinak ah an chanh mi mitsurzu zong ka ding bal lo.  30 Cun ka rian an ka kaiter ni thawk in atu tiang, nangmah Abraham Pathian cung dah ti lo nuamhnak ka hmu rih lo.  17z19Zeizong vialte nakin a lianngan mi, Maw Pathian, lungdong in kan auhnak kha ngai law miṭha lo hna kut in chanh in ṭihphannak in kan luatter sawh ko!’ tiah thla a cam.