Tobit 8

Tobit 8:1-21

VIII: THLAAN 

1Ei le din an dih in ih caan a cu mi a lo, tlangvalpa cu rawl einak khaan in ihnak khaan ah an luhpi. 2Tobias cu Raphael nih ruahnak a rak cheuh mi kha a lung ah a hung chuak; a zaal chiahnak ah a va kal, nga a thin le a lung kha a chuah i a cheu cun rimhmui khanghnak cung ah a paih hna.  3Nga rim nih khuachia kha a lung a rawhter caah van in Izip ram ah lo diam in a zuang. Raphael nih khika tiang a dawi, a thlak i hnuhmai in a rawtchih. 4Cu lio ah a nu le a pa cu an chuak i innka kha an khartak. Tobias cu ihkhun in a tho i Sarah kha, ‘Ka far, tho tuah! A vel le a huhphenhnak kan hmuh nakhnga thlacam in Bawipa cu kan nawl a herh,’ tiah a ti. 5A tho, cun himbawmnak ca ah hiti hin thla an cam:

‘Maw kan pupa hna Pathian, nangmah cu na thiang i na min cu zungzal in a thiang. Van hna le na ser mi vialte nih zungzal in thangṭhat hna seh.

6 Adam a sertu cu nangmah na si, Eve kha a bawmchantu si ding in a nupi ca ah na rak serpiak cang; cun hi pahnih hna chung in minung phun cu a chuak. Cun, ‘Mipa pakhat lawng a si cu a dik lo, amah bantuk bawmtu pakhat serpiak usih, a rak titu cu nangmah na si.

7 Cucaah, ka farnu cu pumsa nuamh duhnak ca si hin lo in thinlung thiang tein ka nupi ca ah kaa lak. Amah le keimah cu kan zaangfah hram ko law hmunkhat tein kum khuasaunak kan pe hram ko.  

8 Cun an pahnih in, Amen, Amen, an ti, 9 cun an pahnih in ihkhun ah an kai.

Sihmanhsehlaw Raguel cu a tho i a salle hna kha a auh hna, annih cu an ra i thlaankhor cawh an bawmh. 10 Amah nih, ‘Van nih a hupphenh lo ahcun a thi ko lai! Cu tikah nihsawh le mawhchiat lawng kan tong hoi lai,’ tiah a ti. 11 Thlaan an dih tikah Raguel cu inn ah a kir, a nupi cu a auh i amah kha, 12’Tobias cu a nung rih maw ti zoh awkah salnu pakhat na thlah hnga maw? Cuti cun a thih sual ahcun aho hngalh lo in kan vui khawh lai,’ tiah a ti. 13 Cun salnu cu an thlah, mei aa van, innka an hun i a chung ah a va lut. An pahnih in thu hluahmah in an i hngilh ko kha a hmuh hna, 14 a rak chuak i annih kha a thli tein, ‘A thi lo, a him ko’ tiah a chimh hna. 15Cu tikah Raguel nih van Pathian cu hiti hin a thangṭhat:

Maw ka Pathian, nangmah cu a thiang mi thluachuahnak phunzakip in thangṭhat na si, thangṭhatnak cu zungzal in co ko.

16Lawmhnak na ka pek caah kan thangṭhat, kan ṭihphan mi cu siter lo in a dong kho lo mi na zaangfahnak tu na ka hmuhsak lehlam.

17Hi fapa ngeihchunte le hi fanu ngeihchunte hi na zaangfah hna caah kan lawmh. 17Bawipa, na zaangfahnak le huhphenhnak cu rak pe hna; an chantlung tiang lawmhnak le zawnruahnak he nung hraam ko hna seh,’ tiah a ti.

18 Cun a salle hna cu thlaan kha khuadei hlan ah a chilhter hna.

19 Cun a nupi kha umkheng khat in changreu reu awkah a chimh; amah tu cu a tuukawm ah a va kal, chuan awkah cawtum pahnih le tuu pali he a rak kir; cun timhtuahnak an thawk. 20Tobias kha a auh i amah kha, ‘Zanlinak tiang na chuak ti thawng theih ka duh lo. Atu na umnak, hika ah hin na um lai i, keimah he na ei na ding lai. Kha vialte retheih a rak in mi ca ah ka fanu cu na lawmhter ṭhan lai. 21 Mah hnu ah, ka ngeihmi chawva i hnarcheu cu naa lak lai i na pa inn ah amah cu himbawm tein na kirpi lai. Cun keimah le ka nupi kan thih tikah a taang mi hnarcheu cu naa lak ṭhan lai. Ka fapa, na thin phang hlah! Keimah cu na pa, Edna cu na nu a si. Kannih cu na farnu i nu le pa kan rak si bang in hmailei caan ah cun na nu le na pa kan si ve lai. Ka fapa na thin phang hlah!’ tiah a ti.