BARUCH 4

4 Amah cu Pathian nawlbia cauk a si, Phungbia cu zungzal in a hmun; a zul mi hna cu an nung lai i a hlaw mi hna cu an thi lai. 2Jacob, i mer law amah cu tlai, a tleunak in na lam cu ceuter ko tuah: 3Na sunparnak cu midang kut ah chan hlah, na siṭ hatnak  cu midang kha pe hna hlah. 4Maw Israel, thluachuak mi kan si; Pathian lung a tluanh mi cu kan sin ah phuan a si cang.

III: JERUSALEM ZAINAK LE RUAHCHANNAK HNA

5 Ka mi, Isreal philh lonak, nan lungder hlah! 6Miphun hna sin ah zuar na ton cu hloh dih ding ah a si lo. Pathian thin na phawh caah na ral hna kut ah chanh na si; 7zei tin tiah Pathian sin ah si lo in khuahrum hna sinah thawinak na ra pekchanh ruang ah an Sertu thin na hunter cang. 8Nangmah a rak in zohkhenhtu a hmun mi Pathian kha na rak philh cang. Hnuk a rak in dinh mi Jerusalem kha a ngaih na chiatter cang, 9zei cah tiah Pathian thinhunnak na cung a tlun a hmuh tikah amah nih:

‘Nannih Zion innpa hna, ngai tuah u: Pathian nih ngaihchiatnak nganpi a ka thlahhnawh cang. 10Ka fanu le ka fapale hna sal ah an kalpi hna cu ka hmuh hna, cucu Zungzal Nung nih an cung ah a tlunter mi a si.  11Nuam ngai in ka rak cawmken hna, ngaihchia in, mitthli he, an kalpi hna cu ka zoh hna.12 Hi tluk mi tam nih kaltak mi, nuhmei, keimah cung ah aho tal nan lung aa lawm lai maw? Kei cu ngaihchia in ka tang ko, cucu ka fale hna sualnak ruang ah a si; Pathian Phungbia an kaltak, a phunglam kha an hngal duh lo, 13cun a nawlbia lam kha an zul duh lo, asilole a dinnak nih a hmuhsak bang in a chimhhrinnak lam cu an zawh duh lo. 14Zion innpa hna, hika ah ra tuah u! ka fanu le ka fapale hna sal tannak cu ruat tuah u, cucu zungzal Nung nih an cung ah a tlunter mi a si. 15Zei tin dah lamhlat miphun hna, holh dang a holh mi, minung lung keng lo miphun cu a lakhnawh hna ning, kum upa zong an ṭihzah lo i ngakchia zong an zaangfah lo.  16Nuhmei fapa ngeichunte kha an kalpi, a fale hna zun ngaih in amahte lawng an kaltak. 17Keimahlei kap in zei tin dah kan bawmh khawh lai? 18 Kha harsatnak na cung i a tluntertu cu na ral hna kut in an luattertu ding a si. 19Ka fale hna, va kal ko kun u! Keimah te lawng ngaihchia le zun ngai in ka tang ko lai. 20Daihnak hnipuan cu kaa phoih i nawlnak buri cu kaa hruk cang; ka chan chung vialte Zungzal Nung sin ah ka au lai.

21Ka fale hna, nan lung dong hlah seh, Pathian sin ah au u, uktu hrang le nan ral hna kut in an chanh hna lai; 22 zei cah tiah nanmah chanhnak ca ah zungzal Nung cu ka zoh ko, cun zungzal Nung, nan Khamhtu, sin in lawmhnak cu a Mithiang sin in ka sin ah a rak phan cang, cun a zaangfahnak thawng in nan sin ah a phan zau lai. 23Nan kal cu ngeihchia le mitthli he kan zoh hna, sihmanhselaw Pathian nih nanmah cu keimah nuamhnak le lawmhnak ca ah zungzal ca in a ka pek ṭhan hna lai. 24Zion innpa hna nih nan sal tannak cu an mit in an hmuh hna bang in Pathian nih an tlanhnak hna cu an hmuh zau ve lai, cucu zungzal Nung sunparnak le lianhngannak nganpi he nan cung ah a tlung te lai.

 25Ka fale hna, Pathian nih nan cung i a tlunter mi a thinhunnak cu lungsau in tuar ko u. Nan ral nih an rak in hrem cang hna, sihmanhsehlaw an rawh cu nan hmuh zau lai i an hngawng cu nan lamhchih hna lai. 26Ka dawt tuk mi ka fale hna cu lamhar in an kal cang, an ral rual nih tuuruun bang an kalpi cang hna. 27Ka fale hna, nan lung dong hlah u, Pathian sin ah au u: nan cung i hi thil a tluntertu nih an philh hna lai lo. 28Hmasa ah nanmah duh in Pathian sin in nan rak pial bang in atu a sin ah i mer ulaw amah cu lethra har in kawl tuah u; 29zei cah tiah amah nih hi harsatnak cu nan cung ah a tlunter cang bang in nanmah kha an tlanh hna lai i a hmun mi lawmhnak kha an pek hna lai. 30 Jerusalem, na lung dong hlah, na min an pe mi nih an hnemh ko lai. 31Na cung ah thil ṭha lo a tuah mi cung le na tlaknak i a lung a rak awi mi vialte cung ah rawhnak a tlung lai. 32 Na fale hna sal an cannak khualipi hna cung le na fale a cohlang mi hna poh cung ah rawhnak a tlung lai, 33na tluk tikah a rak i nuam, na rawh hmuh ah a rak i lawmh bang in amah a rawhnak kha ngaihchia in a zoh ve te ko lai. 34Khualipi si lawmhnak cu ka lakpiak lai i a bo-ngalnak cu ṭah ai-hramnak ah ka chuahter lai. 35Zungzal Nung sin in mei nih amah cu nikhat ah voi tampi a tlakhnawh lai, cun a chung ah khuahrum hna cu a chan in an um lai. 36Jerusalem, na mit cu nichuahlei hoih law Pathian sin in na sin ah a ra mi lawmhnak cu hmu tuah. 37 Zoh hmanh, an chuah na rak cuanh mi na fale hna cu an rak tlung lio; nichuah nitlak i pum in inn ah an rak ṭin lio, A thiang Bawi nawl peknak le sunparnak ah i lawmh in.