Tobit 11

Tobit 11:1-18

X: TOBIT CU KHUA A HMUŢHAN

11. 1  Nineveh ral,  Kaserin an phan deng cang,  2 cu tikah Raphael nih, ‘Na pa Tobit cu nganfak in kan kaltak kha na hngalh ko; 3  inn ah timhtuahnak tuah awkah rak kal chung usih law na nupi Sarah cu midang hna hnu ah rak taang ko seh,’ tiah a ti.  4 Cuti an kalṭi lio ah khan (Raphael nih Tobias cu nga hnit philh lo ding ralrinnak a pek) cun ui nih a zulh hna.

5 Anna cu, a fapa a rak tlun lainak lamlei hoih in, a ṭhu ko. 6 Amah a si kha a fian tikah a pa cu, ‘Na fapa cu a hawile he a rak tlung cang hih,’ tiah a ti.

7 A pa a phak hlan ah Raphael nih Tobias cu, ‘Na pa cu khua a hmu ṭhan te lai ti bia ka rak in kamh cang.  8 Ngahnit kha a mit chung ah na thlak lai, sii nih a fak mi kha a nemter lai i a mit chung i a raang mi phokphawher kha a hawhpiak lai.  Cun na pa cu a mit a caw ti lai lo, khua a hmu ṭhan cang lai,’ tiah a ti.

9 A nu cu a va tli i a fapa cu a hngawng in a kuh. Cun amah nih, ‘Atu cu ka thi kho cang, ka fapa ka hmuh ṭhan cang,’ tiah a ti. Cun a ṭap thluahmah. 10 Tobit cu a tho i innka in tuallei ah a hun i thawn ve. Tobias nih a hun naih, (nga hnit cu aa put ko). 11 A mit ah a chem, fek tein tlaihbu in amah kha, ‘Ka pa, na tha chia hlah,’ tiah a ti. 12 Cun sii kha a thuh, tlawmpal a rauh ah a mit kil i hnawm cu a kuthnih in a coihpiak. Cun a pa cu a hngawng in a kuh i 13 -14 a ṭap. Amah nih: Ka mit khuaceu ka fapa cu ka hmuh khawh cang!’ ti in a au. Cun amah nih:

Pathian cu thangṭhat si ko seh!

 A min lianngan cu thangṭhat si ko seh!

A vanmi thiang vialte cu thangṭhat si hna seh!

A min lianngan cu thangṭhat chin zungzal si ko seh!

15 Zei tin tiah, fahnak a ka pek hnu ah a ka zaangfah ṭhan, cun atu ka fapa Tobias ka hmuh cang!’ tiah a ti.  Tobias cu inn chung ah a lut, a aw dih-um in Pathian kha lunglawm in a thangṭhat. Cun a pa kha zeizongte a chimh; zei tluk in dah a khuallam a tluan ti le zei tin dah ngun a rak phorh ning; zei tin dah Raguel fanu Sarah a ṭhit ning; zei tin dah a hnu a rak zulh ning, cun Nineveh kutka in aa hlat ti lai lo ning kha a chimh dih.  

16Tobit cu a monu ton awkah Nineveh kutkalei ah a chuak, a kalpah in Pathian cu lunglawm in a thangṭhat. Nineveh khuami nih, ‘Ţhihruaitu um lo in a chuah i a tar nain khulrang in a vahvaih kha an hmuh tikah an ar dih. 17 Tobit nih annih kha zei tin dah Pathian nih a zaangfah i a mit a hunpiak ti kha a chimh hna. Cu hnu ah Tobit nih a fapa ngaknu Sarah cu a ton, cun amah kha hiti hin thluachuah a pek, ‘Fanu, rak lut tuah! Ka fanu, kan sin ah a rak in hruaitu na Pathian cu thangṭhat si ko seh! Na pa cung ah siseh, ka fapa Tobias cung ah siseh, nangmah ka fanu cung hrimhrim ah siseh thluachuah vanluhnak um ko seh! Na inn in lunglawm thanuam in kan in cohlan. Ka fanu, rak lut tuah,’ tiah a ti.

Mah ni nih Nineveh ah a um mi Jew hna kha lawmhnak a pek hna, 18cun a pu a si mi Ahikar le Nadab cu an ra i Tobit lunglawmhnak kha an rak i hrawm ve.