Fimnak 3

Mi ṭha le mi ṭha lo hna donghnak tahchunhnak

3 1 Sihmanhsehlaw miding hna thlarau cu Pathian kut chung ah a um i zei ban tuk hremnak hmanh nih a tawng kho hna lo. 2Hngalhnak a ngei lo mi hna sin ah thihnak ca an rak lang i annih an chuah cu rawhralhnak le 3an kan kaltaknak cu zatlaknak ah an rel, sihmanhsehlaw annih cu hnangam tein an um.  4 Kanmah sin ah cun chimhhrinnak dantatnak a huah mi an lo nain an i ruahchannak cu zungzal nunnak he a khat; 5chimhhrinnak cu a dinte nain an thluachuahnak cu a nganpi lai. Pathian nih a hneksak cang hna i amah he um awk aa tlak mi ah a hmuh cang hna; 6 annih cu meiphu chung sui bang a hneksak cang hna i a tling mi khangh thawinak in a cohlan cang hna. 7 Lennak ni ah cun annih cu an tleu lai i chumhmui in a pet mi meici an vak ve lai. 8 Miphun dang kha bia an ceih hna lai i mi kha an uk hna lai, cun Bawipa cu zungzal in an siangpahrang a si lai. 9Amah aa bochan mi hna nih biatak kha an hngalh lai; a fel mi hna cu amah he i daw ngai in an um lai; zei cah tiah a mithiang hna cu veel le zaangfahnak nih a hngah hna, cun a thim mi hna aiawh in tlang a tlak tawn.

10Sihmanhsehlaw pathian hngal lo hna cu an khuaruahnak ca ah aa tlak ning in dantat an i huah lai, zei cah tiah miding kha zei ah an rel lo i Bawipa kha an rak kaltak cang. 11A si, fimnak le chimhhrinnak zei ah a rel lo mi hna cu zaangfah an si: an i ruahchannak cu zei hmanh lo, an ṭuan harnak cu pakpalawng, an hlawhtlinnak cu a ṭhahnem lo; 12 an nupile cu tuaktannak an ngei lo, an fale hna cu an rawk i an tefa hna cu chiatserh an tong.

Pathian a hngal lo fa ngeih nakcun cin a ṭha deuh

13A thiang i nu le pa sualnak a tuah bal lo ahcun a cing mi nu cu thluachuaknu a si, zei cah tiah thlarau lennak ni ah theipar a hmuh lai.   14 A kut khuasual a tuah lo mi le Bawipa cung ah lungtlin lonak a ngei lo mi tildit cu mithluachuak a si: a fel ruang ah a hleikhun mi thluachuahnak, Bawipa biakinn thiang chung i duh nung bik mi covo kha a co lai. 15 Zei cah tiah lungthiang tein rianṭuannak i theipar cu a sunglawi i hngalhnak hrampi cu a rawp bal lo. 16Sihmanhsehlaw ṭang dang pom fale hna cu an upat hlan ah an lo lai lakfa hna cu an lotlau lai. 17 Saupi an nun hmanh ah zei hmanh an si lai lo; hmanung bik ah a kum upatnak zong upat a tong lai lo. 18 Tuante ah an thih ahcun biaceihnak ni ah ruahchannak le hnemhnak an hmu lai lo; 19zei cah tiah thil ṭha lo a tuahtu ciruang i a donghnak cu a fak ko.