Fimnak 18

18 1Sihmanhsehlaw na mithiang hna ca ahcun ceunak nganpi a tlaang. An thawng an theih nain annih kha a hmu kho lo mi Izip mi hna nih cun annih kha mivanṭha an ti hna, zei cah tiah annih cu harnak an tuar ve lo; 2 khuatuan an rak sualnak ca ah fahnak an pek hna lo caah an lawmh hna i hlan i an ziachiatnak ca ah ngaihthiam an hal hna. 3Muihnak he a lettalam, na mi hna cu an hngalh bal lo mi an khuallam hruaitu ah mei-alh tlangpi, an saduhthah ram an pemnak ah ni nem kha na pek hna. 4 Sihmanhsehlaw khuaceu lakpiak a phu mi hna tu cu le muihnak thongtla hna ca tu ahcun a ṭ ha ko, zei cah tiah annih nih na fale hna kha sal ah an rak zuat cang hna; hi na fale hna sin in na Phungbia i a rawk kho lo mi ceunak cu leicung kha pek ding a rak si.

Aa ralkah mi paruknak: ngaihchiatnak zaan le tlanhnak zaan

5 Na mithiang i bawhte hna kha thah hrimhrim ding bia an i kam cang bang, cun thah ding an ti mi ah pakhat lawng khamh a rak si bang in an fale hna an ningpi in na kalpi hna nak le annih kha an zapi tein voikhat ah ti chung i na hrawh hna nak thawng in dan na tat hna. 6 Kan pipu hna nih kha zan cu a hlankan in an rak hngalhcia cang, cucu an i hngatchan mi cu aho a si ti kha ṭha tein an hngalh tikah a biakamnak cu an zumh lai.

7 Cucaah na mi nih miding hna chanhnak le ral hna rawhnak ding cu an hngakhlang; 8zei cah tiah kan ral hna cung i phuhlamnak na tuahnak thawng in le na sin i na kan auhnak thawng in sunparnak na kan pek. 9Cucaah mi ṭha fale hna nih nangmah cu a thli tein thawinak an in pekchanh i lungkhat tein hi phunglam thiang cu an ser, cucu mithiang hna cu thil ṭha he harnak he an i hrawm awk a si; cu khawh in pupa hna hla thiang kha an saṭi.

10 An ral hna i aa khat lo mi ṭahnak awtlengle an fale hna ca an ṭah mi zaangfah awk hrum-ai thawng cu lamhlat pi in theih khawh a si. 11 Voikhat ah aa khat mi dantatnak nih a sal le a bawipa cu a den hna, cun zaran le siangpahrang zong nih aa khat mi fahnak an tuar. 12Aa khat mi thihnak nih a den hna i a thi mi cu rel cawk lo a si. Anmah vui awkah mi cu an tlawm tuk cang; zei cah tiah voikhat tuk ah an tefa hna par cu a rawk cang. 13An doihthiam hna nih an lung a rak hahter hna nain an fater an rawh tikah hi mi cu Pathian fale hna an si ti kha an cohlan.

14 Khuaram cu a dai i zanṭim a phak tikah 15 vancung na bawi ṭhutdan cung khin zeizong tuah kho na Bia cu zaangfahnak a ngei lo mi ralkap paṭhawngpi bang hrawh ding khaukhih mi ram laifang ah a run per. Al khawh lo mi na bia kha vainam bang i tlaih in 16 a dir ko, cun vawleipi cu mithi in a khahter; vawlei ah a dir ko nain van khi a tawngh.17 Hmakhatte ah mang le ṭihnung langhnak hna nih thlalau thinphannak he a khahter hna, ruahchan lo mi ṭihnak nih a den hna. 18Tang ah thlak an si tikah micheu cu hika ah, micheu cu khika ah, thi lo nung lo in an ril ko, zei ruangah dah an thih cuahmah ti cu an chim khawh ko; 19 zei cah tiah an lung a rak tuaitamtu mang hna nih khan annih cu an temhnak i a ruang kha hngalhter hmasa lo in an rawk lai lo ti kha a hlankan in ralrinnak a rak pek cang hna.

Thetse ram ah lolak ding in tlerhkhawnhnak

20Sihmanhsehlaw thih nganfahnak nih miding zong kha a tawngh ve hna; cun mi tampi cu thetse ram chung ah khan an thi. Sihmanhsehlaw teirul chamnak cu a rau lo, 21zei cah tiah, mithiang pa nih annih kha a chanh colh hna. A rian thiang hriamnam a si mi thlacamnak le sual rimhmui khanghnak in teirul chamnak cu a dir hnawh i pulrai cu a donghter, cuti cun na sal a sinak kha a langhter. 

22Huatnak kha pumsa ṭhawnnak, asiloah hriam thazaang si lo in bia pakhat in a tei, kan pupa hna sin ah rak tuah mi chiatserh biakamnak le thisen biakamnak kha aa chim ṭhannak thawng in Dantattu kha a rak tei. 23 Dantattu kha a kham i a nung mi hna sin in a khirh  tikah khan mithi ruak cu aa pong cang. 24Zei cah tiah leicung pumpaluk cu a angkifual thluanpi ah, pupa hna min sunglawi cu lungpher tlangli hna cung ah le na Lianhngannak cu a bawiluchin ah khan an um. 25Hi thil sin in Hrawktu cu a kir, annih kha a ṭih hna. Hi Ṭhat lonak a tuah mi ruang i dantatnak pakhatte a ton hi a za tuk cang.