Tobit 4

IV: Tobit 4:1-21

1 Cu ni ṭhiamṭhiam ah cun Tobit nih Media ram Rhages um Gabael sin i a rak chiah mi ngun tangka kha aa theih ṭhan, 2’Thihnak ca thlacam ding tiang ka phan cang; cucaah ka fapa Tobias kha auh in ka thih hlan ah ka tangka kong chimh cu a ṭha ngai lai,’ tiah a ruat. 3 Cucaah a fapa Tobias kha a auh i amah cu, ‘Ka thih tikah zoh dawh ngai in rak ka vui. Na nu cu upat, cun na nunchung vialte rak kaltak bak hlah. A duh mi thil vialte kha rak tuahpiak, a ngaihchiatter bak hlah. 4 Ka fa, a pawchung na um lio i nangmah ca ah nunthap in a rak zamnak vialte kha philh hlah. Cun a thih tikah thlaan pakhat chung keimah pawngte ah rak vui ve.

5 Ka fa, na chan chung vialte Bawipa hmai ah zumhtlak in rak nung. Sual ding le a phunglam buar ding cu rak ruat bal hlah. Na nun chung vialte ṭhatnak kha rak tuah, a ding lo mi lam rak zul bal hlah, 6 zei cah tiah dinfelnak he na cawlcangh a si ahcun na tuah mi kip ah na hlawh a tling lai, cucu a hman mi a tuah mi kip cung ah a tlung mi a si.

7 Na chawva cheukhat cu mi bawmhnak ding in ngan bang. Misifak cu mertak bal hna hlah law Pathian zong nih an mertak bal lai lo.  8 Na ngeih zat in ṭhenhpeknak va tuah ve; tampi na ngeih ahcun tam deuh pe ve; tlawmte na ngeih ahcun tlawmte pek ding va ṭih hlah.  9 Cuti na tuah ahcun harsatnak caan ca ah chawva tampi naa khon a si lai. 10Zei cah tiah pekṭhenhnak nih thihnak in a luatter i mi kha muihnak chung ṭumnak in a khamh hna. 11Cungnung Bik hmaika i a tuah mi vialte ca ah pekṭhenhnak cu hmual a ngei bik mi pekchanhnak a si.

12Ka fa, ziarawhnak vialte cu hrial hna; nupi cu na palei chung in i thim. Na pale chungkhat leng in ramdangmi cu thim hna hlah, zei ruang ah tiah kannih cu profet tefa kan si. A hramthawk in kan pupa hna a si mi Noah, Abraham, Isaac le Jacob cu philh hna hlah. Annih cu an dilak in an chungkhat chung in nupi an ṭhi dih, cun an fale hna sin in thluachuah an hmuh, cun an phun nih vawlei ro a co lai.  13Nangmah zong, ka fa, na unau cu na dawt hna lai; na unau hna, na chungkhat i fapa le fanule hna zomhtaih ding cu ruat bal hlah; na nupi cu anmah lak in i thim. Zei cah tiah porhlawtnak nih rawhralnak le lungretheihnak tampi a chuahter; thathutnak nih chambaunak le sifahnak a chuahpi, zei cah tiah mangṭam i nu cu thathutnak a si.

14 Na rian an ṭuanpiak mi hna nihlawh cu thaizing tiang thawn hlah; pe colh hna. Pathian kha na rianh ahcun lawmman na hmuh lai. Ka fa, na tuah mi kip ah i ralring, na cawlcanghnak poh ah na nunzia ṭha seh. 15 Mi nih na cung ah an tuah na duh lo mi kha midang cung ah va tuah bal hlah. Zu cu rii lak in ding hlah; a hleihluat nun cu na khualtlawn hawi ah siter hlah.

16A ṭaam mi kha rawl, cun hnipuan a ngei lo mi kha hnipuan cu pe hna. Tampi na ngeih mi chung poh in cheukhat cu pekṭhenh ding in chia bang; cun midang na pek hna tikah zaangram lo in pe hna. 17 Rawl le mitsur cu misual hna sin ah si lo in miding hna vuinak ah va siang.

 18Mifimkip kha ruahnak va hal hna; a ṭhahnem mi ruahnak pakhat hmanh zei rel lo  in va um hlah. 19Zeizongte ah Bawipa Pathian cu va thangṭhat; na lam kha hruai in na lamthluan le naa tinhnak tlinter ding in va nawl. Zei cah tiah fimnak cu miphunkip i chawva a si lo; thilṭha duhnak cu Bawipa nih a pek mi hna a si. A duh ah pakhat kha a cawisan asilole pakhat cu mithi hna umnak tawne ah a thlak. Cucaah, ka fa, hi phunglam hna hi i cinken hna law na lungchung in ziamhter hna hlah.

20 Ka fa, Media ram Rhages i a um mi Gabrias fapa Gabael sin i ngun tangka talen pahra kaa chiah ti cu kan chimh lai. 21 Ka fa, kan si a fah tikah na thin phang hlah. Pathian na ṭih ahcun, sualnak kip kha na hrial i Pathian lung a lawmhter mi thil na tuah a si ahcun chawva tampi na ngei ko,’ tiah a ti.