2 Maccabaeus 1
I: IZIP RAM JEW HNA SIN CAKUAT PAKHATNAK
1 Jerusalem le Judea ram i nan unau hna nih Izip i kan unau hna sin ah a hmun mi daihnak um ko seh ti in kan in biakchawnh hna. 2"A sal ṭha hna a si mi Abraham le Isak le Jakob hna sin i a thisen biakamnak kha philh lo in Pathian nih hunchonak in pe hram ko hna seh! 3Amah kha siannak le dawtnak lungthin he nan biak i a duhnak kha nan tuah khawh naklai lungthin khahnak in pe hram ko hna seh. 4 Phungbia le phunglamlei ah nan lung innka hung in daihnak in pe hram hna seh. 5Nan thlacamnak in ngaihpiak hna she law har caan ah hlaw hin lo in amah he i rem hram u: 6Hihi nanmah ca ah kan thlacamnak a si.
7Dimetrius uk caan, 169 kum ah khan kannih Jew nih nan sin ah a tanglei bang in ca kan rak ṭial: "Jason le a hawile hna nih Ram Thiang le pennak kha an rawiphiar, 8Biakinn kutka an khangh i miding thisen an thlet caah kan cung ah zoh ngam lo harnak a tlun lio hna ah khan Bawipa sin ah thla kan cam i a rak kan ngaihpiak. Cun changvut dip in raithawinak kan tuah, meiinn kan van hna i changhlum hna kha kan chiah,”
9"Cun, atu nannih zong Deu puai kha 188 kum, Chislev thla ah nan tuah ve naklai kan in forh hna," tiah an ṭial.
CAKUAT PAHNIHNAK
Kuatnak (Address)
10Jerusalem khuami le Judeami, hlutdaw le Judas hna sin in siangpahrang Ptolomy saya le chiti thuh mi tlangbawi hna chungkhar Aristubuls sin, cun Izip i Jew hna sin ah, nundamnak le biakchawnhnak.
Antiochus dantatnak ca ah pekchanhnak
11 Pathian nih harsatnak nganpi in a kan tlanh thawk in siangpahrang cung ah teinak a kan petu kha lawmhnak tampi kan pek. 12Zei tin tiah a Thiang Khualipi ralchanh in hriamtlai hna a kalpitu cu amah hi a si. 13Zei tin tiah an hruaitu cu orh awk ṭha lo a lo mi a ralkapbu he Persia ram a phak tikah an pathiannu a rian mi tlangbawi hna nih an hlen ruang ah, amah cu Nanaea biakinn ah khan an can dih. 14Nanaea a ṭhi lai bantuk in i umter i a biakinn chawva hna kha man ca ah tampi lak ding in Antiochus cu a hawile hna he cuka ah cun an ra. 15Nanaea biakinn tlangbawi hna nih cu chawva hna cu an phah, amah zong cu biakinn kulh chung ah hnuzul tlawmte he lawng a lut. 16Antiochus biakinn chung a luh cangka in tlangbawi hna nih innka an khar, kandaap ah thuh mi rap-innka cu an hun i lung kha ṭek bang hruaitu cung ah an thlakhnawh hna. Amah kha dipte in an can hnu ah a lu cu leng ah an hlonh.17“Thilthiang a buar mi kha thihnak a chimhhringtu Pathian cu zeizongte ah thangṭhat si ko seh!”
Khuaruahhar in mei thiang a himnak
18Chislev thla nikul le ninga ni cu biakinn pekchanhnak puai kan tuah lai caah nannih zong nih Deu puai le biakinn le biakṭheng satu Nehemiah nih raithawinak a pekchanh tikah a rak lang mi meipuai kha nan tuah bang in nan tuah ve naklai thawng kan in thanh hna cu a ṭha ngai mi ah kan ruah. 19Zei tin tiah kan pupa hna Persia ram ah an rak hruai hna ah khan mah caan lio i a zuam mi tlangbawi hna nih biakṭheng mei cheukhat kha an lak i tikhor car bang a awng pakhat ah khan a thli tein an rak thuh, ṭha tuk in an thuh caah aho hmanh nih a hmun cu an hngal lo. 20Kum tlawmpal a liam hnu, Pathian caan rem ah khan Persia siangpahrang fialnak in Nehemiah nih mah mei a rak thup mi tlangbawi tefa hna kha mei kawl awkah a thlah hna. 21Annih nih mei si lo in a haang khampi lawng kan hmuh ti an thanh tikah Nehemiah nih tlawmpal than in rak put awkah a cah hna. Cutin an tuah hnu ah Nehemiah nih tlangbawi hna cu kha ti kha thawinak ṭheng cung, thing le a cungthil cung ah, toih awkah a chimh hna. 22Cuti an tuah dih tikah cu hlan i khuadawm nih a khuh mi nika cu khuaruah har in a hung tlang ziahmah i mei tompi ah aa cang.
23Khangh thawinak an pekchanh lio ah tlangbawi hna cu thla an cam, Jonathan nih adang tlangbawi kha hla a hruai hna, cun adang nih Nehemiah he an i chawn. 24 An thlacamnak cu hi bantuk phun hi a si: ‘Zeizong vialte Sertu Bawipa Pathian, nangmah cu khuaruahhar, a ṭhawng, a ding, zaangfah thiam, pakhat te lawng siangpahrang le bawmtu na si, 25pakhat te lawng bawmtu, nangmah lawng hi na ding, zei zong tuah kho le zungzal nung na si, Israel kha ṭhat lonak vialte in a chuahtu le kan pupa hna kha thim mi miphun ah a ser i a thiantertu na si, 26a tu hi raithawinak hi na mi Israel dihlak aiawh in rak cohlang law na roco cu huhphenh in rak thianter ko sawh. 27Aa ṭhekzamh mi kannih cu kan pum ṭhan, lawki mi hna lak saltaang cu luatnak rak pe ko hna, serhsatnak le zawmhtaihnak a ing mi hna cung ah na mithmai ṭha rak pe ko sawh hna, lawki mi hna nih nangmah cu kan Pathian na si kha in hngal ko hna seh. 28A kan hrem i zei rel lo in a kan nehsawhtu hna kha daan tat ko hna law cun 29Moses nih a rak kamh bang in na mi hna cu na Hmun Thiang ah fek tein khua sakter hna,” tiah an ti.
30Cu hnu ah tlangbawi hna nih thanglawi in Pathian hla kha an sa. 31Thawinak a kangh dih tikah Nehemiah nih a tang mi ti kha lung nganpi hna cung ah toih awkah a fial hna, 32cun an tuah tikah, meialh tompi cu a tho, sihmanhsehlaw biakṭheng cung mei nih a dolh dih. 33Mah thil cu mi nih an hngalh i Persia siangpahrang nih ralzaam tlangbawi hna an rak thuh mi mei hmun ah khan ti a chuak i mah ti in Nehemiah le a mi hna nih pekchanhnak kha an thianter ti kha a theih tikah 34Siangpahrang nih kha hmun kha a kharter hna i hmunthiang ah a thanh. 35Siangpahrang nih kha ti cheukhat cu a duh mi hna a ṭhenh hna, cun annih zong nih laksawng tampi an pek ve. 36Nehemiah le a mi hna nih mah hmun cu 'Nephtar' tiah min an pek, a sullam cu "thianternak" ti a si, sihmanhsehlaw zapi nih cun Naphta ti in an auh.