SIRACH 42

42    1Hi hna kong ah hin na ning a zah awk a si lo, 2cun Cungnung Bik a Phungbia asilole a thisen biakamnak kong i pathian hngal lo hna luatter mi biachahnak kong hna ah midang hmai ah na sual awk a si lo. 3Khualtlawn hawi he cazin i chiah le na hawi thilri kong ah tlangtlaknak tuah, 4cuai le khing kha a dik ning in tuah le a miak tlawmte maw a tampi hmuh, 5thil kuatchinnak in a miak hmuh, fale kha fek tein chimhhrin, salchia kha a thi chuak tiang tuk, hi hna kong ah cun na ningzah awk a si lo.  

6Cun mibia i thlak hmang nupi he cun na ṭacik kha hmang, cun kut a tam tikah na thil cu tawh hrenh.  7Cun zei thil na chuah poh ah a milu le a cuai ṭhate in i chinchiah, thil cawk le thil zuar tikah cazin i chiah dih, hi hna hi ningzah ding a si lo. 8A aa mi asilole mihrut, cun ngakchia lung a keng mi upa kha chimhhrin awkah na ning va zak hlah. Cu tikah catang ngei taktak na sinak kha na langhter lai i mikip i conglawmhnak kha na hmuh lai.

Fanu ca ah a pa lungretheihnak  

  9Zei hngal lo in a fanu nih a pa cu hngilh lo in a chiah, lungretheihnak a pek mi nih hngilh thiam lo in a tuah: a ngaknut lio ah pasal ngei lo in um sual lai kaw, 10pasal a ngeih tikah, ma sual lai kaw, ngaknu thiang a si tikah, sual sual in bawhte he rak chuak sual lai kaw, pasal ngei ko bu in pial sual lai kaw, pasal a ngei tikah cing sual lai kaw; ti in aa hngilh thiam lo. 11Na fanu cu chimh a har maw? na ral hna i nihsawhnak, khuami zaihnawh mi, mikip nih ceih mi le mipi hmai ningzahnak an pek nakhnga lo,’ mitṭhep lo in va zoh peng ko.

Minu hna

12A chuakthiam ai tiah aho pa hmanh va cuan hlah, nu hna he va ṭhu hlah; 13zei cah tiah rungrul cu hnipuan in an chuak i nu huatnak cu nu in a chuak ve.14Pa huatnak cu nu dawtnak nakin a ṭha deuh, minu nih ningzahnak le thangchiatnak a chuahpi.

II: PATHIAN SUNPARNAK

A: KOKEK IN SERMI

15Cun Bawipa tuah mi thil hna cu kan theihter hna lai i ka hmuh mi cu kan chimh hna lai. Bawipa bia in ser mi hna cu an hung i cang i ser mi vialte nih a duhnak cu an tuah. 16Ni cu thil vialte cung ah a tlaang i Bawipa tuah mi cu a sunparnak he a khat. 17Khuaram cu a sunparnak he fek tein a dir awk a si caah fek ngai in a rak sak mi thil, khuaruahhar hmelchunhnak hna phuannak nawl cu a Mithiang hna hmanh kha a rak pe hna lo. 18Amah nih cu rili thukpi le minung lungthin a hlat i an ziachiatnak zong kha a hmu dih, zei cah tiah Cungnung Bik nih cun hngalh ding vialte a hngalh i khuacaan kha a zoh kho. 19A si cang mi le a si lai mi kha a thanh i thlithup thil kal ning zong kha a phuan hna. 20A hngalh lo mi ruahnak a um lo i a sin in zei bia hmanh aa thup kho lo. 21A fimnak in a tuah mi thil sunglawi hna cu dawh ngai in a ṭamh hna, amah cu zungzal in zungzal tiang a hmun. 22A sin ah zei hmanh chap khawh a si lo bang in zei hmanh zong zuh bang khawh a si ve lo, cun aho ruahnak hmanh a herh lo. 22A tuah mi vialte cu zei tluk in dah an i dawh, zei tluk in dah mit ah an i rem! 23Annih cu an nung i zungzal an hmun, zei thil a tlun zong ah a nawl an ngai. 24Zei zongte cu a khuah in an um i pakhat le pakhat an i ralchanh, zei hmanh chambau in a rak ser lo: 25Pakhat nih adang thil a ṭhatnak kha tlam a tlinter. Na sunparnak cuanh cu aho dah a cim kho bal lai?