SIRACH 49

Josiah

49 1Josiah kong cu zihmui cawhthiam nih a timhlamh mi rimhmui cawhcia bantuk a si; khuaihliti bang lei kipah a thlum, cun zudin lio i ringawn bantuk a si. 2 Lamding kha a zulh, a mi kha an lung a thlen hna, fihnung sualnak kha a hram in a bongh, 3a lungthin cu Bawipa ah a chiah, pathian hngal lo hna chan ah biaknak kha a cawisan.

Hmanung bik siangpahrang le profet hna

 4David, Hezekhiah le Josiah hna chim lo adang vialte cu palhnak kha pakhat hnu pakhat an thuat, 6 Cungnung Bik Phungbia kha an hlawt i Judah siangpahrang hna cu an lotlau dih; 5zei cah tiah an nawlngeihnak cu midang hna kut ah le upatnak an ngeih mi cu ramdang mi hna sin ah an chanh hna.   6A thiang i thim mi khualipi cu a kang i a lamthlur cu an king,7 cucu profet Jeremiah nih a rak chim chung bang a si; zei  cahtiah amah cu thlehbauh, fahnak pek le hrawh  awkah, cun sak le phun ṭhan awkah, a nu paw chung in rak thianter mi profet a si nain amah cu zohchia in an rak tuah cang. 8Ezekiel cu Pathian nih a rak hmuhsak mi ah khan thla-ngei saram nganpi cung ah sunpar langhnak cu a hmuh, 9zei cah tiah anih nih lamding a zul mi hna ṭhathnemnak ca ah ruah bang a sur mi ral kong kha a chim. 10Profet hleihnih hna an ruh tu cu thlaan in par hram hna seh, zei tin tiah Jacob kha an hnemh i zumhnak le ruahchannak he an rak tlanh cang.  

Zerubbabel le Jushua

11Zerubbabel cu zei tin dah kan conglawmh lai? Amah cu orhlei kut i ṭacik kutdonghrolh bantuk a si. 12Cu bantuk in Jozadak fapa Joshua zong a si ve; an chan ah Biakinn an sak i Bawipa hmai ah a thiang mi, zungzal sunparnak a si ding mi hmunthiang cu an dirh.

Nehemiah

13Nehemiah a lianhngannak zong hi philh khawh ding a si lo, amah nih a rawk mi vanpang kha a sak ṭhan, bawl hrenh mi kutka kha a tuah i kan inn hna kha a sak ṭhan hna.  

Hnulei cuanh ṭhannak

14Enoch cu vawlei in cawi mi a si bang in vawlei ah hin amah he aa tluk in ser mi an um rih lo.  15Joseph he aa lo mi aho hmanh an chuak rih lo, a unau rual hna hruaitu le a mi hna lutlai a si; 18 a ruh hna cu Bawipa veh an tong. 16Shem le Seth cu pat bik mi an si, nain ser mi vialte lak ah a sang bik mi cu Adam a si.