2 Maccabaeus 11

Lysias i hmasa bik raltuknak

11 Mah hnu tlawmpal luklak ah khan siangpahrang i saya le a unaupa, ramchung bawi luban, Lysias cu thil aa thlen ning nih a lung a tuaitam ngai caah, 2ke ralkap thong sawmriat tluk le a rang ralkap dihlak kha a pumh hna i Jew hna doh awkah aa thawh. Amah aa tinhnak cu khualipi kha Grik mi hna umnak ah ser awk, 3adang rampi innthiang hna bang in Biakinnpi zong kha ngunkhuai kholh ve ding le kum fatin tlangbawi ngan rian kha i zuamnak in auh awkah an si; 4Pathian ṭhawnnak kha zei ah a rel lo. Amah cu ke ralkap thongthong hna, rang ralkap a thongthong le a vui sawmriat hna kha a zumh tuk hna.

5Judea ram chim ah a ra, Jerusalem in khankul tluk ah a um i fek tein kulh mi Beth-Zur cu a hun naih, cun fak ngai in a den. 6Makabi le a mi hna nih Lysias nih ralhau hna kha a kharkhumh cang hna ti kha an theih tikah amah le mi zapi cu Israel khamh awkah a ṭha mi vancungmi thlahpiak awkah mitthli le ṭahnak he Bawipa cu an nawl. 7Amah Makabi hrimhrim nih hriamnam kha a lak hmasa i adang zong kha an unau hna bawmhnak ah an nunnak thap ding in thazaang a pek hna; cucaah annih cu mi pakhat bang lungtho ngai in an chuak. 8Jerusalem lawng an hung naih rih lio ah khin hnipuan rang aa thuamm i a sui nam cu a lek in a lek mi rangcit pakhat cu an hmai ah a rung lang. 9Cu tikah annih cu awkhat in zaangfah thiam Pathian kha an thangṭhat, cun ralṭhatnak in an khat i minung cu chim lo, a hrang bik mi sahrang le thir vanpang hmanh kha tuk i thluk ding ah timhcia in an um cang. 10 Bawipa nih a zaangfah hna caah annih cu vanmi rual hna he ral tuk awkah an i thawh. 11Chiandeih bang an ral cu an zuanhnawh hna i a tlawm bik ke ralkap thonghleiriat le rang ralkap thongkhat le zaruk hna kha an saam dih hna i a tang mi cu an ṭhio dih hna. Mah hna lak ah cun a tam-u cu hriamnam ngei lo in hliamhma he an zaam. 12 Lisias zong cu mah hngal lo in a zaam ve i a luat.

Lysias cu Jew hna he remnak a ser. Hnatlaknak kong he cakuat pali hna

       13 Atu Lysias cu  a hrut dih lo, a lettalam in sunghnak a hmuh mi kha a ruah ṭhan tikah Lianngan Pathian nih ral a tukpiak hna caah Hebrew hna cu tei khawh an si lo ti kha a lung a hung fiang. 14Cucaah cohlan tlak mi biakkamnak vialte cohlan awkah a lemsoiter hna i siangpahrang zong an hawikom si ding in chimhpiak hna awkah bia a kamh hna. 15 Makabi zong mipi  ṭhatnak ca lawng ruat in Lysias biatung vialte cu a hna a tla ve, cun Makabi nih Jew hna kong he pehtlai in Lysias sin ah a chuahpi mi vialte zong siangpahrang nih a cohlan ve.

16 Hika ah hin Lysias nih Jew hna sin ah a ṭial  mi ca cu:

 Lysias sin in Jewmi hna sin ah biakchawnhnak: 17Nan thlah mi nan palai, Johan le Absolom, nih nan ca cu an ka pek i cohlan awkah an ka hal. 18 Siangpahrang he aa pehtlai mi vialte cu siangpahrang sin ah ka kuat chin; a si kho mi vialte cu tuahnak nawl kan pek ko hna. 19Rampi ṭhatnak ca ti mi lungthin nan ngeih ahcun keimah zong nih nanmah hunchonak ca ah a ṭha bik in kaa zuam ve lai. 20A neknawi tiang ceihmai awk cu nan palai hna le ka zungbawi hna kha ṭuanvo ka pek cang hna. 21 Hunchonak hmu hram ko u.  Dioscorus a bawi kumkul le kumlinak ni, kumzakhat le kumsawmli le kumriat kum.

22 Siangpahrang ca cu hiti hin a si;

       Siangpahrang Antiochus sin in a unau Lysias sin biakchawnhnak: 23 "Atu ka pa cu pathian hna lak ah hmunhma a la ve cang, kannih kan lungthlitum cu ram mi vialte hnahnawhnak um lo in an rian cio an ṭuan kha a si. 24 Jewmi hna nih ka pa nih ṭuan a timh mi Grik nunphung i cawnnak hna cu an duh lo, anmah nunphung kha an i thim i an zulhphung zulhnak peh awkah an rak hal ti cu ka hngalh.  25Cucaah kannih zong nih hi miphun cu miphun dang bang hnekchom nakin zalonnak an hmuh kan duh bang in kan biakhiahnak cu: an Biakinn cu  pe ṭhan hna u si law an pupa hna phunglam ning in i nung ko hna seh ti hi a si.

26Cu ruang ah hawikomhnak rian ca i mi thlah ding cu nanmah rian a si;  cuti cun ṭuan kan i timh mi cu an lung a tliang lai i an rian cu lunglawm thanuam in an ṭuan khawh cio lai.

27 Siangpahrang i cakuat cu a tanglei bang in a si: “Siangpahrang Antiochus sin in Jew Hlutdaw le a tang mi Jew hna sin, biakchawnhnak: 28"Nan dam a si ahcun,? cucu kan duh bik mi a si i kanmah zong kan dam ve rih. 29Menelaus nih nannih cu kir in nan riante ṭuan nan duh kha a kan chimh.  30 Cucaah Xanthicas thla ni sawmthum hlan  ah a rak kir mi vialte cu zei hmanh ṭihphan awk um lo in nan i dinh khawh nakhnga kan in chimh duh hna. 31 Jew hna cu cu hlan bantuk in an rawl te an ei i a herh lo ah mi zei hmanh nih hnahnawh lo in an phunglam cu an zulh ko hna lai. 32 Nan hna a ngam khawh nakhnga Menelaus cu nan sin ah ka rak thlah. Mangṭha u!  

33Xanthicus ni 15, kum 148.

34 Rommi hna zong nih Jew hna cu ca an kuat ve hna i a tanglei bantuk in a si:

 Rom aiawhtu, Quintus Memmius, Titus Manilius, Manius Sergius hna sin in Jew miphun hna sin, biakchawnhnak:  35"Siangpahrang unaupa, Lysias nih tuahnak nawl an pek mi hna vialte cu kan hna a tla ve. 36Siangpahrang sin chuahpi ding a ti  mi vialte ca ah cun, ṭha tein ruat ulaw nangmah ṭhatnak ca kan tuaktan a si ahcun a rauh hlan ah mi pakhat rak thlah u, nan zei ruang ah tiah kannih cu Antiochus ah kal kan i tim. 37 Cucaah nan duhnak a kan chimtu ding kha rau lo in rak thlah zau u. 38 Mangtha u! Dioscorus i 15 nak ni, kum 148.