SIRACH 15

15   Bawipa a ṭih mi poh cu hiti hin an cawlcang lai, cun Phungbia a pemh mi poh nih fimnak an hmu lai. 2A nu bang a mah ton ah a ra lai i nungak thiang bang amah kha a cohlan lai.  3Amah kha ei awkah hngalhnak changreu le din awkah fimnak ti a pek lai. 4Amah kha aa hngauh lai i a tlu lai lo, amah kha aa hngatchan lai i mual a pho lai lo. 5Amah kha a innpa hna cung ah a cawi lai i mipi tonpumhnak ah bia a chim lai. 6Lawmhnak le nuamhnak luchin a hmu lai i a hmun mi min a co lai. 7Mihrut nih an co kho lai lo i misual nih an hmu lai lo. 8Mi porhlaw hna he hlat pi in a dir i misual hna lung ah a lut kho lo.  9Thangṭhatnak cu misual hna hmurka he aa tlak hrimhrim lo, zei tin tiah Bawipa nih a chia lo. 10Zei cah tiah thangṭhatnak cu fimnak he lawng phuan ding a si i Bawipa hrimhrim nih a chuahter mi a si.

Duh thimnak nawl

 11 “Ka sualnak cung ah Bawipa cu ṭuanvo a ngei,’ ti hlah, zei cah tiah amah nih a huat mi cu a tuah bal lo. 12 “Amah nih a ka pialter,’ ti hlah, zei cah tiah misual hna hmannak ding a ngei lo. 13Bawipa nih hruhnak vialte cu a huat, cun amah a ṭih mi aho hmanh nih an daw ve lai lo. 14A thawk tein amah hrimhrim nih minung cu a rak ser, cu hnu ah anmah tein biakhiahnak nawl a pek hna.   15Na duh ahcun a nawlbia na zulh lai i a duhnak kha fel tein na tuah lai.  16Na hmai ah ti le mei an chiahpiak, na duh mi poh na banh khawh. 17Minung phun cu a hmai ah nunnak le thihnak chiahpiak a si, a duh deuh mi poh kha pek a si ko lai. 18Bawipa fimnak cu a kau tuk, amah cu zei zong tuah kho le zei zong hmutu a si. 19A mit ah amah a ṭih mi hna an um ko,  minung phun cawlcanghnak vialte aa chinchiah dih. 20Aho hmanh kha pathian hngal lo si ding tha a pe lo, aho hmanh sualnak nawl a pe lo.