SIRACH 6

6 1Zei cah tiah minchiatnak nih ningzahnak le thangchiatnak an hmuhpiak lai, cucu lihchim misual hna cung i a tlung tawn mi a si. 2Pumsa duhnak nih in uk hlah seh, na thazaang cu cawtum bang an thlehbauh dih sual lai, 3nangmah tein na hnah naa ṭam i na thei naa hrawh dih sual lai i nangmah tein a ro mi thingpheng naa sernak in na nunnak a dong sual lai.  4Thinchiatnak nih a ngeitu kha a hrawh lai i amah kha a ral hna nihsawhnak men ah a ser.

Hawikomhnak

5Bianem chimnak nih hawi thar a sawm i biathlum chimnak nih hawikom tampi a ngeihter. 6Na mi hngalh cu tampi hna hmanh seh law ruahnak petu ding cu thongkhat ah pakhat lawng si seh. 7Hawikom ser na duh ahcun hneksak hmasa, khulrang in vaa bochan hlah; 8zei cah  tiah hawikom cheukhat cu a sia a rem lawng ah an komh lai i harnak na ton ni ah cun an kaltak diam lai. 9Adang phunkhat cu an kaltak te lai i bia nan i alnak kha mi hmai ah a phuan te lai, 10cun a phunthumnak cu na rawl an hrawng lai i harnak na ton tikah an kaltak te lai; 11zei zongte a tluan caan ah na pumcheu a si lai i na salle hna cu duhduh in rian a fial hna lai; 12sihmanhsehlaw vanchiat na ton tikah an mertak lai i an hrial lai. 13Na ral in i hlat law na hawi kha i ralring hna.

14 Hawikom ṭha cu himnak nganpi a si i a hmu mi cu chawva a hmuh a si. 15 Hawikom ṭha nunnak sii a si i Bawipa a ṭih mi hna nih an hmuh lai. 16 Hawikom ṭha cu a man khiah khawh a si lo, a ṭhatnak cu tuak khawh a si lo. 17 Bawipa a ṭih mi poh nih hawikom ṭha an ser, zei cah tiah mi ṭha nih mi ṭha a hmuh ve.

Fimnak i thluachuahnak hna  

18Ka fa, na no lio hrim in chimhhrinnak kha i thim law na sam a par tiang fimnak na hmuh rih lai. 19Leithuang le lothlo bang amah kha cing law thlairawl ṭha cu hngak ko, zei cah tiah na thlawh lio ah cun na re a thei lai nain a theipar na zun zau lai. 20Nunzia a ngei lo mi hna ca ah amah cu a hrang ngai mi a lo, mihrut nih a ing kho lo: 2 Amah ca ah khing ritpi a si lai caah cu  bantuk mi nih cun a hlonh zau lai:  22zei cah tiah fimnak cu a min bantuk in mikip nih hmuh khawh a si lo.  

23Ka fa, ka bia hi ngai law ruahnak kan pek mi cu al hlah, 24na ke cu a thla cung ah chia law na hngawng cu a hngawng cung ah chia.  25A thilrit cu chang law a hrihrual nih na lung in donghter hlah seh; 26Na lungthin dihlak in zul law na thazaang dihlak in a lam cu zul. 27Amah cu kawl, a keneh kha thlau hlah, na sin ah aa phuang lai; voikhat na tlaih hnu cun thlah ti hlah. 28A donghnak ahcun dinhnak cu na hmuh lai i amah cu na ca ah lawmhnak phunkhat a si lai. 29A thla cu na ca ah himnak hrampi an si lai, a angki hngawng cu suiṭhi ah an cang lai. 30A seihnam cu sui hlawn a si lai i a hrihual cu taisawm sunglawi a si lai; 31hnipuan ṭha bantuk in naa thuam lai i lawmhnak luchin bang naa chinhte lai.

32Ka fa, na duh ahcun cawnpiak khawh na si ko; cawng law na fim lai.  33Bia ngaih na duh ahcun na hngalh lai, ṭha tein na ngaih ahcun na fim lai. 34Upa hna tonnak kha kai ve, mifim a um ahcun a pawngah va ṭhu. 35Pathian kong ceihphainak vialte kha lungtho tein ngai, phungthluk bia vialte ngai hna. 36Hngalhthiamnak a ngei mi na hmuh ahcun tuan tein va leng, na keneh nih a hleihlak cu phiak ko seh. 37Bawipa chimhhrinnak cu ruat hna law a nawlbia he na caan cu dihter. Na khuaruahnak a ṭhawnter lai i na duh mi fimnak cu nangmah ta a si lai.