Judit 12

12 Cu bia a chim khawh in amah cu zanriah an timhnak ngunkheng le hrai in an danghnak a rawl einak ah an luhpi i ralbawi rawl kha an suahpiak ve i a mitsur zu kha an thletpiak ve. 2Sihmanselaw Judith nih, “Palhnak ka tuah sual ah ka ei rih lai lo. Ka rak i put mi hi ka ca ah a za rih ko lai,” tiah a ti hna.  3Holoferni nih amah kha, “Na tirawl a dih sual ahcun khua zei ah dah kan lak lai, kanmah lak ah hin nangmah miphun pakhat hmanh kan i tel ṭung lo,” tiah a ti.  4Judith nih, “Ka bawipa, na nunkhua sau ko seh! Bawipa nih na salnu cu ka tirawl a dih hlan ah hin a khuakhannak tlinter ding in a ka hman ko lai,” tiah a leh. 5Holoferni bawmtu hna nih khan Judith cu thlam pakhat ah an kalpi i mahka ah cun zaanṭim tiang a it; cun khua a dei hlan deuh ah khan a tho. 6Amah nih Holoferni kha, “Zaangfahnak in thlacam awkah lengchuahnak nawl an ka pek nakhnga na salle hna cu ka chimhpiak hna,” tiah a rak nawl i 7Holoferni zong nih amah a cawngtu hna kha Judith kha thlauh lo awkah nawl a rak pek ve hna. Judith cu riahbuk ah khan nithum a um cang. Zan fatin Bethulia horkuang ah khan a va chuak i commando hna ral an vennak cerhti ah khan a va i thianh tawn. 8Cuti a va chuah tikah khan a miphun fale hna chuah awk a khuakhannak ah khan lam hruai awkah Israel Bawipa Pathian sin ah thla a va cam tawn.  9Aa thianh hnu ah a rak kir  i a thlam ah khan zanlei rawl an rak chanh tiang a um.

Holoferni rawldanghnak ah Judith

10A ni linak ah khan, Holoferni cu rawl danghnak puai a tuah i amah bawmtu dah ti lo aho bawi dang hmanh a sawm hna lo. 11Amah nih pumpak rian ah ṭuanvo a la mi tildit Bakoa kha, “Va kal law na zohkhenh mi Hebru minu kha kan sin ah a rat i kanmah he ei le a din ve naklai va lem tuah. 12Hi bantuk minu kha lem lo in kan um ahcun mikip nih an kan nihsawh lai,” tiah a ti. 13Bakoa cu Holoferni khaan khan a chuak i Judith lemsoi awkah aa thawh.  “Hi bantuk mino le duh nung ngaknu cu ka bawipa sin ah rat lo cu a phung a si hnga maw?” Amah hmaitonh in remhuar a ṭhu lai, kanmah he lunglawmhnak mitsur zu cu a ding lai i nihin bantuk ah cun Nebukhadnezar bawiinn ah a um mi Assiria ngaknu hna bang in zohkhenh a ton ve lai cu a ṭha tuk lo maw?,’ tiah a ti. 15Judith nih, “Ka bawipa bia al ding ah keimah cu aho dah ka si? A duh mi poh ka tuah zokzok lai i hiti tuah cu ka thih ni i ka lunglawmhnak a si lai,” tiah a leh. 

15 Cucaah a tho i hnipuan aa thlen i nu ṭamhnak phuntling in aa ṭamh.  A sin-um cu a ra hmasa i Holoferni hmaika zel ah khan rawl a ei tik poh ah a zaunak ding ti in Bakoa nih a rak pek mi tuuhmul puan kha a phahpiak.

16Judith cu a rung lut i hmunhma a lak. A hmuh tikah Holoferni lungthin cu amah duhnak nih a tei tuk cang i a lung lawng a tur cang. Amah he ihṭi duhnak nih khan a tei tuk cang; cun ni hmasa bik a rak hmuh ni ri khan amah lemnak ding caanṭha lawng kha a rak hngak cang. 17 Holoferni nih Judith cu a thawh i, “Atu ding law kanmah he i nuam ve tuah,” tiah a ti. 18Judith nih, “Ka bawipa, mahti tuah ding cu kaa lap tuk, zei cah tiah ka chuahka in nihin tiang ka nunnak ah mah thil tuah hi cu kaa lawm tuk ko; zei tin tiah ka chuahka in atu tiang ka nunnak cu nihin ni bang in man a ngei bal lo,” tiah a ti.  19Cun a salnu nih a timhpiak mi tirawl aa lak i ralbawipa hmaika ah cun a ei a ding ve. 20 Holoferni cu amah he um cu aa lungsi tuk i a nun chung a din bal mi zu nakin tam deuh in a din.