1 Maccabaeus 15

Antiochus VII cakuat le Dora kharkhumhnak

15 Siangpahrang Demetrius fapa Antiochus cu Medeterranian tikulh hna in tlangbawi ngan le Jew hna phunbawi Simon le Jew miphun pumpaluk sin ah ca a kuat; 2 A ca cu hiti hin a si:

"Siangpahrang Antiochus sin in tlangbawi ngan le phunbawi a si mi Simon le Jew miphun hna sin biakchawnhnak:

 3 “Misual cheukhat nih kan pale hna pennak kha hramhram in an rak lak caah hmasa bantuk in ka dirh ṭhan khawh nakhnga atu ah anmah sin in lak ṭhan ka duh, cucaah ralkap tampi le raltuknak tilawng hna cu ka pumh hna, 4cun tlangram cung kai hnawh in ka pennak chung i khuapi hna a rak hrawktu hna kha dawi ka timh hna;  

5Cucaah a tu keimah nih na hmai zoh in ka hlan siangpahrang hna nih ngunkhuai an in luatter mi le laksawng an in pek mi vialte kha ka fehter ṭhan. 6Cun hika hin na ram chung nan hman ding mi ngun tangka zong i ser khawhnak nawl kan pek. 7Jerusalem le hmunthiang cu zalennak ka pek; na ser mi hriamnam vialte le na sak mi ralhau vialte le atu na umnak zong nangmah ta an si zungzal lai. 8Atu le hmailei caan ah nan siangpahrang chawkuang cung na ngeih mi leiba vialte cu zungzal in ngaihthiam a si lai. 9Cu pin ah kan pennak kan hmuh ṭhan tikah cu bantuk upatnak cu nangmah le na miphun le nan hmunthiang cung ah kan tuah lai i na sunparnak cu vawlei dongh tiang a thang lai.

10Antiochus nih a pupa hna ram cu 174 kum ah a va chim, cun ralkap vialte amahlei ah an ṭan caah Traifo cu bawmtu tlawmpalte lawng a ngei cang. 11Antiochus nih a ṭhutdan a chuttu kha a dawi caah amah cu rili kam i Dora ah a vaa dor, 12 cucu vanchiatnak nih a tlunh cang i a ralkap hna nih an kaltak dih cang ti kha a hngalh caah a si. 13Antiochus cu a ralkap thongzakhat le thongkul le rang ralkap thongriat hna he Dora khualeng ah khan riahbuk a khuar. 14 Tilawng nih rililei in an rak naih tikah khuapi cu an kharkhumh, cucu khuapi kha tlang he rili he a tuk i aho hmanh luhchuahnak nawl a pe hna lo.  

Palai hna cu Rom in Judea ah an rak kir. Rom he ṭangṭi hawi hna an thanh

15Cu lio ah Numenia le a hawile cu Rom in an rak phan i siangpahrang le ram dangdang cakuat cu an rak ken, a bia cu a tanglei bantuk in a si:  

16 Rommi hna i kawngsil bawi Lusius sin in siangpahrang Ptolemy sin biakchawnhnak:

       17Jew palai hna cu hawikom le ṭangti an si bang in khuatuan kan hawikomhnak le ṭanṭinak tharchuah awkah tlangbawi ngan Simon le Jew miphun hna min in kan sin ah an rak phan. 18Mina thongkhat man sui ralphaw an rak kan put. 19 Cucaah siangpahrang hna le ram dangdang hna sin ah cakuat in annih kha Jewmi hna kha sersat lo ding, cun anmah le an khuapi hna le an ram hna kha tuk lo ding le anmah ral hna he ṭanṭi lo ding ralrinnak pek a tlak ti kan hmuh.  20Anmah sin in ralphaw cohlan cu aa tlak ti in kan hmuh. 21 Cucaah, an ram in mihrokhrol pakhatkhat a zaam i nan sin i aa dor ahcun a phung ning in na chimhhrin khawh naklai tlangbawi ngan Simon kut ah chan u.

22Khawngsil bawi nih cu ca cu siangpahrang Demetrius, Attalus, Ariarathes le Arsaces sin ah le 23cun Sampsames, Spartan, Delos, Mindos, Sicion, Karia, Samos, Pamfilia, Lisia, Halikharnassus, Rodes, Faselis, Kos, Side, Arados, Kortin, Saiprus le Sairene ti mi ram vialte ah a kuat. 24Tlangbawi Ngan Simon ca ah pakhat an tlenpiak ve.

Antiochus VII cu Dora kharkhumh in Simon kha a ral i chimhhrinnak ca a kuat

25 Cu lio ah Antiochus cu hmunhma a laknak Dora khualeng khan khuapi cu hnahnawhnak a pek zungzal. Kharkhumhnak thil kha a derh, Traifo cu a khar i luhchuah vialte a kham dih. 26Simon nih amah kha bawmh in thim mi ralkap thonghnih cu sui le ngun le thilthuam tampi he a kuat. 27 Sihmanhsehlaw Antiochus nih a cohlang hna lo; khuatuan i an biakamnak vialte a let i Simon cung a lungput zong a thlen dih. 28 Amah ton awkah a Hawile hna lak i pakhat, Athennobius kha a thlah i anih kha, “Ka pennak chung i khuapi hna a si mi Joppa le Kezar le Jerusalem Ralhau khua hna kha na lak hna. 29 An vawlei cu na hrawh hna i an ram cung ah thil ṭha lo rel cawk lo na tuah; cun, ka pennak chung i hmun tampi hna zong kha na lak hna. 30 Atu na rak lak mi khuapi hna le Judea ramri leng i ngunkhuai na kholhmi vialte hna kha ka pe hna, asilole, hi khuapi hna le an cung i na tuah mi rawhralnak ca ngun ṭalent zanga le khuapi hna sin in na lak mi ngunkhuai ca ah adang ngun tangka ṭalent zanga maw na ka pek lai; 31 asiloah kan ra lai i kan in tuk lai," tiah a ti. 32 Siangpahrang Hawikom Athenobius cu Jerusalem a phan i Simon lianngannak, a suipher le a ngunkheng hna an chiah ning hna kha a hmuh tikah a ar ko. 33Siangpahrang bia kha a chimh, nain Simon nih hiti hin a leh: “Mizei ramdang vawlei le chawva hmanh kan chut lo, kan pupa hna ro kan lak ṭhan a si ko, zei cah tiah annih kha caan tlawmpal cu kan ral nih an rak kan chuh; 34 Atu cu caanṭha kan hmuh caah kan pupa hna roram cu kan lak ṭhan hna tu kha a si. 35 Kanmah ta nan ti mi Joppa le Kezar hna he pehtlai in cun hi khuapi hna cu kan miphun kha fahnak tampi a pe i kan ram a hrawk mi kha an si; anmah ca ah hin ngun ṭalent zakhat cu pek ding timhcia kan si ko," tiah a ti. 36 Leh ding bia tampi ngei lo in palai cu thinhung ngai in an kir ṭhan i siangpahrang cu Simon bialehnak le a lianngannak, cun a mit in n hmuh mi thil vialte kha a chimh i siangpahrang cu a thin a hung hringhran.

Rilikam ram uktu Sendebi nih Judea kha a namneh  

37Cun Traifo cu tilawng cung ah a kai i Orthosia ah a zaam. 38Siangpahrang nih Sendebius kha rilikam ram hna ralkap bawi ah a thim i ke ralkap le rang ralkap bu pakhat a pek. 39Cun a mi hna cu Judea ramlei hoih in chiah awk, cun Kedron kha sak ṭhan i a kutka hna kha fehter awk, cun kan mi hna kha tuknak nawl a pek; cu lio ah amah tu cu siangpahrang Traifo kha a dawi. 40Sendebius cu Jamnia ah a rak phan i kan mi hna thinphawhnak kha aa thawk, cun Judea kha a tuk, tampi kha sal ah, tampi thong a thlak hna i tampi a thah hna.  41Kedron a sak ṭhan hnu ah rang ralkap hna le adang ralkap hna kha cuka ah a chiah hna, annih cu siangpahrang nih nawl a pek bang in khualeng chuah in Judea lam hna kha kham awk a si.