Tobit A ngan 3

 Tobit 3:1-16

3. 1 Cu tikah ka lung a fak tuk, ka thawpi ka chuah i ka ṭap, cun hiti hin ngaihchia in thla ka cam: 2 Maw Bawipa, nangmah cu na ding, cun na tuah mi vialte ah na ding. Na lam vialte cu veel le biatak an si, cun nang cu leicung Biaceihtu na si.

3 Cucaah Bawipa, ka philh hlah law run ka zoh ko. Ka sualnak ruang le a herh lo mi ka palhnak le ka pupa hna sualnak ruang ah dan ka tat sawh hlah.

4 Zei tin tiah nangmah cung ah kan sual cang i na nawlbia cu kan buar cang hna; kannih cu na kan ṭhekdarh mi miphun hna lak ah chuh le ramh awk, sal tannak le thihnak ah, ceihmai, nihsawh le zomhtaih awkah na kan chanh cang.

5 Cun atu keimah pumpak le ka pupa hna palhsualnak nih a phut ning in na ka tuahto tikah na biakhiahnak cu a hmaan ko. Zei cah tiah na nawlbia zong kan zul ti lo i na hmaika zong ah biatak lam kan zul ti lo.

6 Atu na duh bang in ka tuah ko; ka nunnak cu la hraam ko; cuti cun hi vawlei in ka chuak lai i vawlei ka si ṭhan lai. Ka ca ah cun nun nakin thih hi a ṭha deuh; zei cah tiah a ruang lo in zomhtaih ka tong i ka lung a fak tuk. Bawipa, zaangfahnak in hi temhinnak in ka chuah ko. Zungzal ka umnak ding inn ah kal ko ning; Maw Bawipa, na hmai cu ka mertak sawh hlah. Hi bantuk nganfahnak lak ah hin ka ca ah nun khuasau nakin thih hi a ṭha deuh suaumau: Serhsatnak ngaih ka tuar kho hrimhrim ti lo.

      III: SARAH

7 Aa ton khawh ning cu, cu ni hrimhrim ah cun Media ram Ecbatana i a um mi Raguel fanu Sarah zong a pa salnu pakhat sin in serhsatnak a in ve. 8 Zei cah tiah amah cu va pasarih a rak ngei cang, cun Asmodeus, khuahrum hrang bik nih khan a tlangval hna cu nupi pasal an can manh hlan ah pakhat hnu pakhat a rak thah dih hna. Salnu nih amah kha, ‘A si, na tlangval hna cu nangmah lila nih na rak thah hna. Va pasarih na ngei cang i pakhat he hmanh na van a ṭha rih lo. 9 Na tlangval hna an thih ruang ah keimah hrem cu sullam a ngei lo. Anmah hna sin ah va kal ve ko, cuti cun na fale hmuhnak in kan luat lai!’ tiah a ti. 10 Cu ni ah cun, a ngeih a chia, a ik thluahmah, hri in i awh awkah a pa inn a cungdot ah a kai. Asinain khua a ruat ṭhan, ‘Ka pa an mawhchiat sual ah ta! Annih nih, ‘Fanu dawt pakhatte lawng na ngei, cun atu ngaihchia in hri in aa awk cang,’ an ti hnga. Ka pa cu a tarlei ah mitthli he mithi khua ah a hruai ding mi lungfahnak ka pe duh lo. Mah le mah i thahnak in zawmhtaihnak ka theih ti nakhnga lo thi ding in Bawipa sin haltu ah a ṭha deuh lai,’ tiah a ti. 11 Cuti cun thlalangawng pawng ah, a kut kha thlir in hiti hin thla a cam:

       ‘Maw zangfah thiam mi Pathian, nang cu thluachuakmi na si! Na min cu zungzal thangṭhat si ko seh! Cun na tuah mi vialte nih zungzal in thangṭhat hna seh!

12 Atu nangmahlei ah kaa mer i kan zoh ko: 13 Na bia nih hi vawlei in ka chuah hram ko seh, serhsatnak bia hi ka ing kho hrim ti lo; 14 Maw Bawipa, thianghlim tein ka um, aho pa hmanh nih an ka tawng bal lo ti cu na hngalh. 15 Hi ralzam ka sinak ram ah hin na min siseh ka pa min siseh ka thangchiat rih lo.Kei cu ka pa i fanu ngeihchunte ka si, roco ah fa dang a ngei ti lo; a pawng zong ah unau dang a ngei ti lo, cun ka nun hnawhchan ding chungkhat aho hmanh an tang ti lo. Va pasarih ka sung cang; zei ruang ah dah ka nun rih lai? Ka nunnak lak hi na duh mi a si lo ahcun zaangfahnak he run ka zoh ko. Thangchiatnak bia theih hi ka tuar kho hrim ti lo.

16 Hi caan ah hin an thlacamnak cio cu Pathian nih a theihpiak hna, 17 cucaah anmah kha damnak pek awkah Raphael cu a thlahpiak hna. Pathian khuaceu kha a mit in a hmuh khawh nak hnga Tobit mit chung i a raang mi phokphawher kha lakpiak awk le Raguel fanu Sarah cu a monu ca ah Tobit fapa Tobias pek awk, cun amah kha khuahrum hrang bik, Asmodius in luatter awkah a si. Zei cah tiah amah he aa tlak mi hna lak ah khan Tobias cu a covo in a ṭhit awk hrim a si. Raguel fanu Sarah cungdot in a rak ṭum, cun Tobit inntual in inn chung i a rak luh liote hrimhrim a si.