Fimnak 12

12 1Zei cah tiah nangmah, a rawk kho lo mi na thlarau cu zeizong vialte chung ah a um! 2cucaah a sual mi cu duhsah tein na chimhhrin hna; zei ti ning in dah an rak sual ti kha na chimhhrin hna i ralrinnak na pek hna, cuti cun Bawipa, annih cu ṭhat lonak kha an hrial lai i nangmah kha an in bochan lai.

Canan mi hna sin a lungsaunak

3 Hlan in na ram thiang ah a rak um mi hna cu an tuahsernak fihnung, 4camh le doih an hmannak le fihnung an biaknak ruang ah na huat hna. 5 Tuaktannak um lo in ngakchia a rak thattu hna, minung thi le sa puai ah chungril a rak eitu hna, thlithup unauphu a rak dirhtu hna, 6bawhte hna a rak that mi kha nu le pa hna cu kan pupa hna kut in hrawh awkah na lung na rak i thlek, 7cuti cun ramdang nakin a hlei in na dawt mi hi ram nih Pathian fale hna ram he aa tlak mi dirhmun a co khawh lai.

8Cutin a si ko nain hi hna cu minung an si caah nem tein dan na tat hna, annih kha tlawmpal   tete in hloh awkah na ralkap hmaisaktu ah vanriang na thlahhnawh hna. 9 Pathian hngal lo hna cu miding hna he fakpi in i tuknak ah na chanh khawh hna lo a si lo, asilole sahrang hna sehnak, asilole na bia kaakhat in na hrawh khawh hna lo a si lo, 10Sihmanhsehlaw na biaceihnak kha duhsah tein na tlinternak thawng in sual i ngaihchihnak caan na pek hna; cucu annih an ṭhat lonak cu an i chuahpi mi le an thisa nih a ngeih; 11an nunnak ah aa tap mi a si ti kha na hngalh caah a si, zei cah tiah annih cu a hramthawk tein chiatserh mi miphun an rak si.

Hi thinfual fianternak

Cun aho na ṭihzah caah an sualnak cu dantat lo in na chiah a si lo.12 Zei cah tiah khaka ahkhan, “Zei dah na tuah cang?” an titu ding aho dah a um? Asilole khaka ah khan na biakhiahnak a hna a tla lo ding aho dah a um? Na sercia miphun kha na hrawh hna caah aho nih dah taza an cuai lai? Miṭha lo hna dirkamh in aho dah an dirhnawh ngam? 13Zei cah tiah nangmah bantuk mi vialte a zohkhenhtu le na biakhiahnak a dinnak kong na hmuhsak ding pathian dang pakhat hmanh a um ti lo. 14 Dan na tat mi hna kong ah aho siangpahrang le ramuk bawi hmanh nih an in zuamcawh kho lo. 15Zei cah tiah nangmah hrimhrim na din bang in vawlei cu dinnak in na uk i dantat a phu lo mi sualphawt cu na lianngannak he aa tlak lo mi ah na ruah. 16Zei cah tiah na thazaang cu dinnak he bia na ceihnak hrampi a si i cungnung bik nih mi vialte cung ah na nun an nemter. 17A sang bik nawlngeihnak na ngeih mi kha mi nih an zumh lo tikah na ṭhawnnak na langhter, cun nangmah an hngal mi hna chung i chimh ngai lo hna kha na chimhhrin tawn hna. 18Sihmanhsehlaw nang cu na tha naa sum, nem tein bia na ceih i zaangfahnak nganpi he na kan uk; zei cah tiah na lungchung in um seh na ti ahcun na ṭhawnnak cu a rak chuak cang.

Israel ca ah fimchimhnak

19Hiti na tuahnak thawng in na mi hna cu miding cu a hawile cung ah a ṭhat awk a si ti kha na chimh, cun na fale hna kha sual hnu ah sual ngaihchih khawhnak a um ko ti mi ruahchannak na pek hna. 20 Zei cah tiah na fale hna ral cu a thi ding mi an si ko nain cu bantuk zawnruahnak le ralrinnak he dan na tat hna, cun an ṭhat lonak kaltak awkah caan le hmunhma na pek hna, 21cu bantuk cun dawtnak he na pupa hna sin ah chiatserh biakamnak le thisen biakamnak na rak tuah mi an fale hna cu bia na rak ceih hna lo? 22 Cucaah kan ral hna kha zawnruahnak he dan na tat hna tikah na kan cawnpiak mi cu biaceihnak kan tuah tikah na dawtnak kha kan ruah hmasa ding a si ti le biaceihnak kan in tikah na zaangfahnak kan i ruahchan ding a si ti kha a si.

Izipmi hna a dotdot in dantatnak

23 Cu ruang ah hruhnak le ṭhat lonak lam a zul mi hna cu an tuah mi fihnung thil in na hrem hna, 24zei cah tiah annih cu huattlai le fihnung bik saram kha an pathian ah an i lak cang hna i ngakchia hlen an ton caah palhnak lam ah sau tuk an zawh cang. 25 Cucaah zei hngal lo semmawng bang anmah a hruhter mi biaceihnak kha na pek cang hna. 26 Nain cu bantuk nihchuak sualphawtnak in ralrinnak aa lak lo mi hna cu pathian he aa tlak mi dantatnak kha an tuar zau lai. 27Anmah kha fahnak a rak pe mi le an duh lonak an rak langhter mi ser mi hna, an pathian ah an i lak mi kha ser mi thil hna, anmah lila in dantat an i huah tikah thil si ning taktak kha an hmuh; cun cu hlan ah an rak hngalh duh lo mi cu a hmaan mi Pathian a si kha an hngalh cang. Cucaah hmanung bik dantatnak cu an cung ah a tlung cang.