Fimnak 16

Pahnihnak aa ralkah mi: utlak le nimte

16 1Cucaah annih cu anmah bantuk saram nih aa tlak ning in dan an tat hna, cun buṭit khaubawk run nih an hrem hna. 2Hi dantatnak hna he ralchanh in na mi cu na zaangfah hna, an buthritnak riamhter awkah rawl thawthaw, hmuh a har bik mi, nimte sa kha na pek hna. 3Izip mi hna cu na thlahhnawh mi saram fihnung hna kha an hmuh tikah, an rawl cu a ṭam tuk nain, ei duhnak lungthin an ngei ti lo; cu lio ah na mi hna tu cu, caan tlawmpal rawl lo an um hnu ah rawl thaw kha na eiter hna. 4Na mi hna nih an ral hna cu zei tin in hremnak an tuar ti an hmuh khawh nakhnga a herh mi eidin chambaunak cu an in hrimhrim a herh.  

Pathumnak aa ralchanh mi: Khaubawk le rulsen

5 Ṭihnung sahrang nih an phak hna i sivai rul hna cuknak in an rawh cuahmah lio hmanh ah, nangmah i na dantatnak cu an dih tiang a peh lo. 6 Ralrinnak ca ah ngaihchiatnak nih caan tawite a tlunh hna, cun na Phungbia theihter ṭhan hna nak ca ah khamhnak hmelchunhnak a ngei, 7zei cah tiah amah lei ah aa mer mi vialte cu an zoh mi thawng si lo in mi vialte Khamhtu, nangmah thawng in khamhnak an hmu. 8 Hiti hin kan ral hna sin ah nangmah cu ṭhat lonak vialte in chuahtu na si kha na langh ter, 9 zei cah tiah anmah caah khaubawk le tho sehnak nih thihnak a chuahter; an nunnak khamhnak ca ah sii a um lo; zei tin tiah annih cu kha bantuk saram in dantat kha an phut mi a si.

10Sihmanhsehlaw na fale hna tu cu ṭihnung rul sivai hmanh nih a thlu kho hna lo; zei cah tiah na zaangfahnak cu anmah bawmh awkah a ra i a damh hna. 11Voikhat henhnak – zei tin cu tluk cun a dam zau khawh! - na biathanhnak hna kha theihter hna awk a si, cucu an i philh caah na dawtnak in an i hlat sual nakhnga lo a si. 12 Damnak a si mi na bia dah ti lo zei bantuk thinghnah le hmabenh hmanh nih a damh kho hna lo.

13Asi, nunnak le thihnak cung nawl a ngeitu cu nangmah na si, mithi khua kaa ah na hruai hna i na kirpi ṭhan hna. 14Minung cu a sual tuk caah mi pakhat kha a that kho ko nain a chuak cang mi thaw tu cu a khrih kho lo, asiloah a thlarau kha a cohlan cang mi Mithi khua in a chuah kho lo.

Aa ralkah mi palinak: Rialti le Manaa

15Na kut in zaam cu a si kho lo.16 Nangmah an cohlang lo mi pathian hngal lo hna cu na ban ṭhawnnak nih a tuk a velh hna, ruah sawhsawh si lo in rial le ngol lo a sur mi ruahpi nih a dawi hna i mei nih a kangh dih hna. 17 Khuaruahhar deuh a si mi cu mi tihal a riamhter mi- ti chung ah khan –- mei cu ṭihnung in a kang hluahmah; zei cah tiah kokek thil hna cu miding ca ah a tho. 18 pathian hngal lo hna thlah hnawh mi saram hna kangh hrial awkah mei cu caan khatte an thi, cucu an mit hmuh ah Pathian dantatnak nih a zulh ko hna ti kha fianter hna awkah a si, 19 cun, caan khatte cu tili laifang hrimhrim ah ṭihnung mei cu a tho, cucu miṭha lo hna ram theitlai kha hrawh hna awkah a si.

20 Na mi hna he an i dan tuk ning! Annih cu vanmi rawl kha na pek hna, timhcia changreu kha van in cat lo in na thlakpiak hna, an ei mi vialte an duh nakhnga thawtnak phuntling in a khat. 21 Cun na pek mi hna rawl nih na fale hna sin na ṭhatnak an langhter; zei cah tiah a eitu duh ning bang na sersiam hna nak thawng in amah tein a eitu duh ning bang an i thleng. 22 Hawrha le tikhal nih tit lo in mei cu an tuar khawh; hihi cu an ral hna thlairawl hrawh tikah mei cu rialti le ruah tukpi lak zong ah an alh thluahmah ko lai ti kha na langhter mi a si, 23cun khattelei in miding cawm awkah cun an ṭhawnnak hmanh an philh lai tinak a si.

24Zei cah tiah ser mi thil cu Sertu, nangmah kha an in rianh tikah mi ṭha lo hna dantatnak ah a tha a ṭhawng i nangmah an bochan mi hna cung ah a tha a dorh. 25 Thil vialte sin ah aa thlennak thawng in na nunsiannak kha nawl ngai ngai in a ṭuanchuah i a ṭam mi vialte kha a ṭam ning in a hnemh hna, 26 cuti cun Bawipa, na dawt mi na fale hna nih thazaang a petu cu thlairawl phunphun si lo in an zumtu hna humhimnak a petu na bia a si ti kha an hngalh lai. 27 Cucaah mei nih a kaoter khawh lo mi cu nizung ceu voikhat leknak nih a titter, 28mah nih cun nangmah sin lawmhnak chim awkah khuadeika ah kan tho lai i khuadei ah kan in ton lai ti kha a langhter; 29cu lio ah dawtnak a hngal lo mi hna ruahchannak cu khuasik hawrha tlang bang an ti lai i hnawmkhor ah a luang mi ti bang an lo lai.