SIRACH 34

Mang hna

34    1Lih le pakpalawng i ruahchannak hna cu mihrut hna ca ah a si, cun mang nih thla a hlanh hna. 2Mang aa bochan mi poh cu thladem tlaih i zuam le thli dawi he aa lo. 3Mang cu thlalang he a dannak a um lo, na hmaika i na hmuh mi cu nangmah muithla a si ko. 4Hnawm in zei dah na thianh khawh lai, palhnak in zei dah tehte na khaan khawh lai?  5Naupawi nu saduhthah bang in mithla auh, langhnak le mang hna cu an si ve. 6Cungnung Bik nih a thlah mi hna dah ti lo cu na lung hmanh ah chia hna hlah; 7zei cah tiah mang nih mi tampi a pialter cang hna, cun amah aa bochan mi tampi cu ngaihchia an si. 8Phungbia tlinter awkah zei lihṭawn hmanh a herh lo, cun fimnak cu biatak ah a tling.

Khualtlawn

9Khual tampi a tlawng mi nih tampi an hngalh, cun hmuhtonnak tampi a ngei mi cu an lung a fim. 10Hneksaknak a tong bal lo mi cu a hngalh mi a um tuk lo; sihmanhsehlaw khual a tlawng mi cu khuazakip ah umzia a thiam cang. 11Khual ka tlawnnak ah thil tampi ka hmuh cang, bia in ka chim khawh mi nakin ka hngalh mi a tam deuh. 12Thih ṭihnung voi tampi ka ton cang nain ka luat zungzal, cucu zei ruang; 13Bawipa a ṭih mi hna thinlung cu a nung, zei cah tiah annih cu anmah a khamh khotu ṭhawnnak cung ah ruahchannak an ngei. 14Bawipa a ṭih mi cu zei tik hmanh ah an khul a nuar bal lo, cun an ral a chia bal lo, zei tin tiah annih cu Bawipa kha an i bochan. 15 Bawipa a ṭih mi thlarau cu milunglawm a si, aho dah aa bochan? Aho nih dah a bawmh? 16Bawipa mit cu amah a dawt mi hna cung ah a um, amah cu a ṭhawng mi an i huh an i phenhnak le a fek mi bawmtu a si, thetse thli in an i phenhnak, chun nilin ah an i dornak, chuihpah lo ding vengtu le tluk lo ding dirkamhtu a si. 17Lungthin kha a tharchuah i mit a fimter, damnak, nunnak le thluachuahnak a pek.

Raithawinak

18A dik lo ning in hmuh mi thil in raithawinak pekchanh cu nihsawh a si; miding lo hna laksawng cu cohlan tlak a si lo. 19Cungnung Bik cu pathian hngal lo hna i pekchanhnak nih a lung a tluanh lo, raithawinak chapnak nih sual ngaihthiamnak a hmuhpiak lai lo. 20Mi  sifak hna thilri Pathian sin ah thawinak in pekchanh cu a pa hmai ah a fa a nawng mi he aa lo. 21Rawlchia cu mi sifak hna ta a si, anmah eipiak cu lainawn a si. 22Mah minung-hawi a toh mi lakpiak cu amah kha a thah a si, aa hlawhfa mi a ṭuanman pek lo cu thisen chuah a si. 23Pakhat nih a sak i pakhat nih a phur ahcun buainak dah ti lo zei dah an hmuh lai?  24Pakhat thla a cam i pakhat nih chiat a serh ahcun Bawipa nih aho aw dah a ngaih lai?  25Mi pakhat cu ruak a tongh hnu ah aa ṭawl, nain a tongh ṭhan ahcun zei dah a ṭhahnem? 26Cu bantuk in sualnak a tuah ca i ulhnak a tuah hnu ah sualnak a tuah ṭhan mi cu a si ve, Aho dah kha pa i a thlacamnak cu a ngaihpiak lai? A rawlulhnak cu zei dah a ṭhathnem?