1 Maccabaeus 6

Antiochus Epifenis i hmanung bik caan hna

6 Mah lio ah cun Siangpahrang Antiochus cu Cung Ramṭhen hna a tlawn liote a si; amah nih Persia ram ah a rumnak, a sui le a ngun hna in a min a thang ngaingai mi, Elimai ti mi khualipi pakhat a um i 2 a biakinn ah khan Grikmi hna a uk hmasa mi, Machedo siangpahrang, Filip fapa Alexander nih a rak chiahtak mi sui ralthuam, ṭangphaw le hriamnam hna an um ti kha a theih. 3 Cucaah khualipi kha tuk in lak aa zuam; sihmanhsehlaw khuami hna nih an rak theih cang caah a hlawh a tling lo. 4 Amah kha an ṭhio i hmaichia ngai in Babilon ah a kir. 5Sihmanhsehlaw Persia ram i a um rih lio ah khan Judea ram a va chimtu ralkapbu hna cu an sung i an ṭhio hna,  6 cun Lysias cu ralkap tampi he hmai ah a norchih nain, ral nih an khirh i Jew hna hmai in a zam ti mi le Judah ralkapbu cu an saam dih mi ral hna sin in an lak mi hriamnam, tirawl le chawva hna thawng in, an ṭhawng chinchin ko ti mi le 7 Jerusalem biakṭheng par i a rak dirh mi  fihnung milem kha an thluk cang hna i hmunthiang cu khuatuan lio bang  in vanpang sangsang in an kulh ṭhan cang hna ti le a khuapi hna lak ah pakhat a si ve mi Beth- Zur cu ralhau in fek tein an kulh cang ti mi thawngpang cu a sin ah a rak phan. 8Siangpahrang cu hi thawngpang hna a theih tikah a khuaruah a har i a therh thluahmah; a ihkhun ah aa hlonh i a ngaihchia in a zawt cang, zei cah tiah zei hmanh a rak timh ning in a cang ti lo. 9Cun, lungrawk ngaihchia in ni tampi a cam hnu ah ka thi cang lai ti kha a lung ah a rak chuak. 10 Cun a Hawile kha a auh hna i annih kha, "Hngilh ni ka ngei ti lo, lung retheihnak nih a ka hlauh cang. 11Zei tin dah hi tluk in ka ngaih a chiat khawh ti ka khuaruah a har, a ngan tuk ah atu cu a ka phum cang – ka chan saling ah cun a siang tuk mi le duh a nung tuk mi ka rak si ṭung. 12Sihmanhsehlaw a tu cu Jerusalem ah zei tluk in dah ka rak palh ti cu ka theih cang; cuka i sui le ngun thilri vialte ka lak dih i a ruang um hrim lo in khuami hna thah dih awkah nawl ka rak pek. 13 Hi ruang ah hin hi vanchiatnak nih a ka tlunh cang, hi ruang ah hin ram dang ah lungrawh in ka thi cang lai hi ti cu ka hngalh ṭhan,” tiah a ti hna.  

Antiochus panganak bawi a cannak

14A Hawile hna lak i pakhat a si mi Filip kha a auh i a pennak vialte uktu ah a thim 15 Amah nih a fapa Antiochus kha siangpahrang si ding ah nun le fim a chimh lai ti ruahchannak he amah kha a bawi luchin le a thilpuan le a ṭacik kha a pek hna. 16Cu khawh in siangpahrang Antiochus cu kum 149 kum ah a thi. 17 Lysias nih siangpahrang a thih thawng kha a theih tikah, a ngakchiat lio tein a rak zohkhenh mi, a fapa Antiochus kha siangpahrang ṭhutdan cung ah a ṭhutter i amah kha Zupator bantuk in a umter.  

Judas Makabi nih Jerusalem ralhruang sang a laknak  

18Cu lio i ralhruang khua i a um mi hna nih khan Israelmi hna cu hmunthiang velchum in an kharkhumh hna, annih kha caan ṭha an hmuh poh ah harnak pek ding i Jentailmi kha bawmh ding in tha an pek hna. 19 Judas nih annih cu hrawh an herh a ti caah anmah kha dum awkah zapi kha a pumh hna. 20 An i pum i ralhruang khua cu 150 kum ah an kharkhumh, ral dohnak hruang le kulhnak seh thilri hna kha an sak. 21 Sihmanhsehlaw a cheu cu lamkham kha an bauh i Israelmi, an zuar mi hna a cheu zong anmah he an i kom.  22 Siangpahrang sin ah khan an kal i amah kha, “Dinnak ser awk le kan hawile hna phuhlam awkah zei can dah na hngah rih lai? 23 Kannih cu na pa kha lungtling tein kan rak rianh, a bia kan rak zulh i a nawl kan rak ngai. 24Cu ruang ah kan mi hna cu kanmah he zei pehtlaihnak hmanh an ngei lo; cu lawng a si lo, an kan tlaih khawh mi poh an kan thah i kan chungkhar thilri cu an lak dih. 25Kanmah cung lawng ah cutin an tuah a si lo, na ram chung vialte a si. 26Atu hrimhrim ah hin Jerusalem ralhruang khuapi cu an kulh i an lak cang, cun hmunthiang le Beth-Zur cu fek tein an kulh cang. 27Atu hrimhrim ah hin na kham hna lo ahcun hi nak thil lianngan kha an tuah lai i annih kha zei tik hmanh ah na kham kho ti hna lai lo," tiah an chimh.

Antiochus panganak le Lysias ral thawhnak.  Beth-Zakhariah ah an i dohnak

28Siangpahrang cu hi bia a theih tikah a thin a hung ngaingai i a Hawile vialte, a ralbawi hna le a rang ralkap uktu hna kha a auh hna. 29Pennak dang le Meditarranian tikulh ram hna in hlawhfa ralkap hna kha a khawmh hna. 30A ralkap hna cu: ke ralkap thongzakhat, rang ralkap thongkul le raltuk a thiam ngai mi vui sawmthum le pahnih an si. 31Idumia khan an chuak i Beth-Zur cu an kulh; ngol lo in ni tamnawn an tukchih; kulhnak seh thilri zong kha an sak hna; sihmanhsehlaw, mi cu a chung in an hung pawt i mei in an khangh hna i ralṭha ngai in an doh ve hna.  

       32 Cu tikah Judas cu ralhau khuapi in a chuak i siangpahrang ralkap hna riahnak khattelei i Beth–Zekhariah ah khan a va riak ve. 33 Siangpahrang cu zingkate ah a tho i a ralkap hna cu Beth – Zakhariahlei ah a ran khawh chung in a `umter hna; cuka ah cun a ralkap hna cu timhcia in a umter hna i muko kha an tum. 34 Vui hna cu raltuknak ca timhlamhnak ca ah mitsur zu le thing khuahmung kha an pek hna. 35Hi vui hna cu ralkap hna lak ah khan hmun an pek hna. Saram pakhat ah thir angki aa hruk i dar luchin aa chinh mi ralkap thongkhat cio le thim mi rang ralkap zanga cio kha pek an si. 36 Rang ralkap hna cu an vui a cawl bang an cawl ve; a kalnak poh ah naih tein an kal ve. 37Vui kip cung ah khan a khamtu ding ah thing kengkhuh an chuan i a sumreh ah khan fek tein an ṭem, cun a cung ah khan ralkap pathum le a khaltu pakhat in an ṭhu. 38A tang rih mi ralkap hna cu ralkapbu hna sir veve ah khan an chiah hna, cucu ral hna kha hnahnawhnak pek awkah le ral hna kha kham awkah a si. 

39 An dar le suiphaw hna kha ni nih a hun cerh hna tikah tlang hna kha a ceu hna i annih cu meifar tompi bantuk an si. 40 Ralkapbu ṭhenkhat cu tlangpang cung dot ah hmunhma an la i adang ṭhenkhat cu  thlang nelrawn ah khan an la; cun ningcang tein hmai ah an nor duahmah. 41 Hi mi hna liangluang thawng, ral ah a kal mi ralkap hna tur thawng le an ralthuam hna khawn thawng a thei mi vialte cu an ther dih, zei cah tiah a tam i a ṭhawng tuk mi ralkapbu a si. 42 Judas le a ralkapbu cu an hung chuak, an i tu ciammam i siangpahrang ralkap chung in zaruk an thi.  43Avaran ti auh mi Elizar nih vui pakhat cu sunglawi ngai in an ṭamh i a san deuh kha a hmuh tikah siangpahrang aa cit mi a si ti ruat in, 44 a mi hna khamhnak ca ah a pum a pe i philh khawh lo mi minṭhatnak a co. 45 Mi chahpi lak i saram kha ralṭha ngai in a zuanhnawh, keh le orh he a saampah duahmah caah ral nih cun an kianh dih,46 vuipi tang ah khan a lut i vuipi cu tanglei in a paw ah tlenglak in a sawh i a thah. Sihmanhsehlaw amah cu vuipi nih a nenh i cuka ah cun a thi ve. 47 Jew hna nih siangpahrang cu zei tluk in dah a ṭhawn ti le a ralkap hna cu zei tluk in ṭih an nun ti kha an theih tikah hnulei ah an i tawn.   

Siria ralkap hna nih Beth-Zur an laknak le Zion Tlang an kulhnak

48 Siangpahrang ralkapbu cu Jerusalem khualeng ah i tu ding in an i thawh, cun siangpahrang nih Jerusalem le Zion Tlang kha a kharkhumh. 49An khuapi a chuahtak mi Beth-Zur khuami hna he daihnak a pek hna; annih cu an Sabbath kum a si bang in kharkhumhnak kha tuar khawhnak ding ti le rawl an ngei lo. 50Beth-Zur khua kha a lak hnu ah, siangpahrang nih khuapi cawngtu ralkap kha a chiah hna. 51Hmunthiang kha caan saupi a kharkhumh, ral i kahnak hmun le kharkhumhnak-seh kha a dirh i mei-alh hlonhtu, lung cheptu, fei khawttu ralkap le chai a chaitu hna kha an chiah hna. 52 Jewmi hna zong nih anmah bantuk in i dirkamhnak kha an i tuah ve caah saunawn an doh khawh ve hna. 53 Sihmanhsehlaw an rawlbuk ah rawl a um ti lo, zei cah tiah hihi a kum sarihnak a si, cun an sin ah a rak i dor mi Jentailmi hna zong nih an rawl cu an ei dih va cang.  54 Mangṭaam a fah tuk caah pa tlawmte lawng kha hmunthiang ah an tang; adang vialte cu an i ṭhek i an inn cio ah an kir dih.

Siangpahrang nih Jew hna kha biaknaklei zalennak a pek hna

55Cu lio ah siangpahrang Antiochus nih a thih hlan ah siangpahrang ṭhutdan ca ah a fapa cawnpiak ding in ṭuanvo a rak pek mi Filip cu 56 Persia le Media ram in siangpahrang a rak zul mi ralkap hna he a rak kir i ram hruainak vialte tlaih dih ding aa tim. 57 Hi thil a theih tikah Lysias cu rianrang in chuah aa tim colh, cucaah siangpahrang, ralbawi hna le a mi hna kha, "Nikhat hnu nikhat kan der chin lengmang, rawl kan ngei ti lo i kan dum mi khuapi zong hi fek tein kulh mi a si; cu pin ah, ramchung uknaklei zong kan ruah a herh cang.  58Cucaah hi mi hna hi hawikomhnak zaachan hna u sih law anmah le an miphun ningpi he remnak ser hna usih. 59Hlan bantuk in an nunphung zulhnak nawl pe hna usih; zei cah tiah kanmah nih an nunphung kan hrawhpiak hna caah atu bantuk in an tuah mi hi a si!" tiah a ti hna. 60 Siangpahrang le ralbawi hna cu an hna a tla i Jew hna he remnak an ser, cun annih zong nih an cohlan ve.  61Siangparhang le ralbawi hna nih khan biakamnak cu chiatserh biakamnak in an fehter caah  Jew hna zong nih ralhau khua khan an chuak ve. 62Cu hnu ah siangpahrang cu Zion Tlang ah khan a lut, sihmanhsehlaw a bawi inn cu zei tluk in dah a feh ti a hmuh tikah a biakamnak kha a hrawh i a kulhnak vanpang cu ṭheh awkah nawl a pek hna. 63Cu hnu ah khulrang in aa zuk i Antioch ah a zaam, cuka ah cun Philip nih khuapi a rak uk cang kha a hmuh. Antiochus nih a tuk i khualipi kha thazaang in a lak ṭhan.