Fimnak 15

Israel cu siasal a bia lo

15 1 Sihmanhsehlaw kan Pathian, nangmah cu na ṭha i na hmaan, na thin a fual i zeizongte kha zaangfahnak in na uk. 2Kannih cu kan sual hmanh ah na lianhngannak kan cohlan caah na mi kan si ko, sihmansehlaw na mi ah mi nih an kan hmuh caah kan sual ti lai lo. 3Nangmah hngalh cu a tling mi ṭhatnak a si i na ṭhawnnak hngalh cu zungzal nunnak hrampi a si. 4Kannih cu an thiamnak a hmang sual mi hna serchom mi, zuk suaithiam hna i pakpalawng thil, asiloah dawh ngai in ṭamh mi milem hna nih fawi tein a kan hleng lo, 5 hi thil hna nih hin mihrut lung ah nunnak le thaw ngei lo zuk tlaihchannak le duhnak a chuahter. 6Ṭhat lonak a daw mi hna le cu bantuk ruahchannak he aa tlak mi hna cu anmah a sertu hna, anmah a duh mi hna le anmah a bia mi hna an si.

Siasal a sertu hna cu mihrut an si

7Atu um sertu kha zoh hnik usih, amah nih tlak kha hnip tein a nawn kanmah hman awkah tlak um phunphun kha a ser. Mah tlak ṭhiamṭhiam in bawi hna hman ding in le a lettalam in hman ding zong a ser hna: sihmanhsehlaw zei ca i hman ding ti lai a reltu cu um sertu a si.  8Cun thazaang pam in kha tlak ṭhiamṭhiam in pakpalawng milem kha a ser –amah hrimhrim kha tunaite ah  khan tlak in rak ser mi a si, cun rak hlanh mi a thlarau kha hal ṭhan a si tikah amah zong tlawmpal ah an laknak ah a kir ṭhan ding a si.

 9Zei a si hmanh ah a thih ding kong asiloah a chan a tawinak kong ah a lungre a thei lo, sihmanhsehlaw sui sertu le ngun sertu hna kha tei aa zuam hna i dar sertu kha aa zohchunh, cun thil deu a ser khawh kha aa porhlaw. 10A thinlung cu vutcam; a ruahchannak cu vawlei nakin san a tlai lo deuh, a nunnak cu tlak nakin zaangfak a si deuh. 11Zei cah tiah amah a rak sertu, a chung ah a nung mi thlarau a rak khumhtu Pa kha a palh. 12 Cu lawng a si lo, hi kan nunnak hi lentecelhnak phunkhat bang le hika kan nunnak cu chawdetnak he a khat mi ah a hmuh. 13 “A hmuh ning zei tluk a sual hmanh ah pawcawmnak cu kawl a herh,” tiah a ti.  Amah nih leitlang in um le milem a ser mi nih cun midang nakin a sual cu a hngalh ko.

Izip mi hna hruhnak: An thleidan thiam lo mi milem biaknak

14 Sihmanhsehlaw a hrut bik mi le ngakchia thlarau nak hmanh in zaangfak deuh a si mi hna cu na mi hna cung ah a hleivuang in nawl a rak hmang mi ral hna le 15lawki mi siasal vialte an pathian ah aa lak mi hna a si; annih cu an mit kha khua hmuhnak ah, an hnar cu thli dawpnak ah, an hnakhaw cu theihnak ah, an kutdong cu rianṭuannak ah, an ke cu vahnak ah, an hmang kho lo. 16Annih cu na hmuh hna bang in minung nih a ser hna i hlanhchom thaw a ngei mi nih a sersiam hna.  Aho hmanh nih amah pathian he aa lo mi milem a ser kho lo; 17amah cu a thi ding a si i a kut thur nih cun a zeimaw a thi mi lawng a tuah kho. Amah hrimhrim kha a biak mi nakin a sunglawi deuh; amah cu caan tlawm tal a rak nung bal nain annih cu an si lo. 18 Cun saram lak i fihnung bik, hruhnak tahfung ah a zual deuh mi, 19 dawhnak a pelte hmanh a ngei lo mi – cucu saram hna nih an ngeih mi duhnunnak a si ahcun – cun Pathian thangṭhatnak le thluachuahnak a hmu lo mi thil kha an biak.