Judit 10

IV.   Judith cu Holoferni riahbuk ah a kal

10 Cuti cun Judith cu Israel Pathian sin ah a au. Thlacam kha a dih tikah, 2 ṭuang khan a tho i a salnu he Sabath ni le puai ni hna ah a hman tawn mi a khaan ah khan a va lut. 3 Mah ka ah cun aa hruk tawn mi buri puan kha a thlak i a nuhmei thilthuam zong kha a phoih hna, cun a pumpaluk in aa khawlh, zihmui kha tam lak in aa thuh, a sam aa hriah, a lu kha aa men i a pasal Manasseh a nun lio i a rak i hruk tawn mi puai hnipuan kha aa hruk hna. 4A ke ah kedan aa danh, ṭhi, baanhrolh, kutdong hrolh, hnatonh hna le adang sui thilthuam vialte hna kha aa thuam dih hna i amah a hmu mi pa poh nih voikhat zoh an i zat lo ding in aa dawh khawh chung dawh in aa ṭamh. 5A sin-um kha saphaw zuthol durkhat le sathau durkhat a putter, cun zalkhat in barli changreu tlang hna le theicaar changreu hna le a thiang mi changreu tlang ngan pipi hna kha a sanh i a tuam dih hnu ah a sin-um cu a pekchih rih. 6Cun an chuak i Bethulia khuapi kutkalei ah khan an kal. Mahka ah cun Uzziah cu khua upa Khabri le Kharmi hna he amah an hngah ko kha an hmuh hna.  7Annih cu a hmai aa thleng tuk mi le a hnipuan aa dang tuk mi Judith kha an hmuh tikah aa dawhnak kha zoh in an khuaruah a har tuk. Annih nih: 8 “Kan pupa hna Pathian nih a mithmai ṭha in pe ko seh! Na khuakhannak cu Israel fale hna sunparnak ca ah le Jerusalem sunpar chinchinnak ca ah hlawhtlinnak in sui luchin chinh hram ko seh! tiah an ti.

9Judith cu Pathian kha a biak, cu hnu ah, “Ka chuah i ka sin ah nan chim mi saduhthah vialte ka tlinter khawh nakhnga khuapi kutka cu ka hunpiak tuah u,” tiah a ti hna. A fial hna bang in an tuah i amah ca ah kutka hunpiak ding ah tlangval cu nawl an pek. 10Hi thil a tuah dih hnu ah Judith cu a sin-um nih khan zulh in a chuak i khuami hna nih khan chuk an ṭum i horkuang an tan tiang in a langh lo tiang kha an zoh ko.

11Nu pahnih hna cu nelrawnlei ah ding ko in an kal thluahmah lio ah khan Assiria hmaisuang ralkap hna nih an rak kham hna, 12cun Judith cu an tlaih i biahal hram an thawk. Amah kha “Khoikalei ah a ṭang mi dah na si? Khoika in dah na rat? Khoika ah dah na kal lai?” tiah an hal. Anih nih, “Keimah cu Hebru fanu ka si i anmah cu a rauh hlan ah nanmah i tuufa an can cang lai caah an sin in ka rak zaam. 13Nan ral bawi Holoferni ton ka duh; amah cu rinhchan awktlak thawngpang ka pek lai. Minung pakhat le nunnak pakhat hmanh sung lo in tlangram dihlak laak a duh ahcun, a zawh ding mi lam cu ka chimh lai,” tiah a ti hna.  14A chim mi bia an ngaih pah ah khan ralkap hna cu mah tluk in aa dawh mi minu kha an hmuh tikah mitṭhep lo in an zoh cang.  15Annih nih amah kha, “Nangmah lungthawh in kan bawipa ton awkah na rat cu nangmah khamhnak caah a si te lai. Cucaah a thlam ah na kal a ṭha deuh; kan mi cheukhat nih an in zulh lai i amah kut ah an in chanh lai.  16A hmaika na chuah tikah ṭih hlah. Atu na kan chimh mi kha chim law ṭha tein an zohkhenh ko lai,” tiah an ti.  17 Cu tikah annih nih amah a vengtu le a zohkhenh ding mi zakhat hrawng an tlarpiak i amah cu Holoferni thlam ah an hruai.

18Amah a rat thawngpang cu riahbuk vialte a thang dih colh i mi cu an cawl lulh ko.  Judith cu Holoferni a thlam leng ah dir in kawhnak a hngah lio ah khan mibupi nih an kulh cang. 19Aa dawh tuk caah an tlaihchan tuk i amah thawng in Israel mi hna zong kha an tlaihchan chih cang hna. Annih nih, “Hi bantuk minu a ngei mi miphun hi aho nih dah a nautat hna lai? Pakhat hmanh a nung in tanhtak lo ah a ṭha deuh lai; pakhat lawng a taan hmanh ah vawlei pumpaluk kha a kutdong in a her dih lai,” tiah an ti.

20Cu lio ah Holoferni pumpak vengtu hna le a ralbawi hna nih Judith cu a thlam ah an hruai. 21Holoferni cu emerald lunghring le lung mansung hna benhchih mi a senduk mi suipuan zaar tang i a ihkhun ah khan a rak i din ko.  22Mi nih an chimhpiak i amah cu hmai a sakpiak mi ngun datmei a vangtu hnu zul in a rak chuak. 

23Judith cu ralbawi le a bawmtu hna kha a ton hna tikah aa dawhnak mithmai nih an khuaruah a harter dih hna. A kun i ralbawi pa cu upatnak a pek; sihmanselaw a salle hna nih amah cu an thawhter.