Fimnak 17

Panganak aa ralkah mi: muihnak le mei tompi

17 1A si, na biaceih lairelnak hna cu an sang, pemh khawh an si lo, cu a si caah cawnpiak lo mi thlarau hna cu lamping ah an kal. 2Mi ṭha lo hna nih miphun thiang cu an kut ah a um ko an ti lio ah anmah hrimhrim kha muihnak thongtla ah an cang; zan cikcin nih a hren hna, zungzal bawmhchanhnak in luat in innthong ah an tla.  3 Philh hmang puanzar nih phenh in, an thlithup sualnak he aho theih lo ding ah an ruat nain langhnak nih a ṭihter hna i thinphang thlalau in an i ṭhenṭhek dih. 4A thla in a khuh mi hmunking nih an ṭihnak cu a chempiak kho hna lo; ṭihnung aw nih a tlerh hna; cun ṭihnung hmurcip mithla nih a ṭhih hna. 5 Annih kha khuazei mei hmanh nih ceunak a pe kho hna lo i arfi ceu zong nih mah ṭihnung zan cu a ceuh kho lo. 6 An hmuh khawh mi ceunak pakhatte cu amahte in a alh hluahmah mi- hmuh ṭihnung meialh pi.  An ṭih tuk ah a loh hnu zong ah an rak hmuh mi thil cu ṭih a nung chinchin mi ah an ruah. 7An doih thiamnak zong zei hmanh ah an cang ti lo, cun an fim an ti mi zong hruhnak ah a cang cang; 8 zei cah tiah thlarau dam lo hna chung in ṭihnak le nincan lonak cu kan chuah hna lai ti bia a kamh mi hna cu atu anmah hrimhrim kha nihchuak ṭihnak in an zaw cang. 9 Ṭih ding zei hmanh a um lo nain rungrul tete an vah mi le rul hna an lawn thawng hmanh nih a lauter hna. 10Ṭihnak in an ngal, hrial awk a ṭha lo mi thli lak khuacuanh hmanh khi an duh ti lo. 11 Ṭhat lonak cu a ral a chia taktak ko, amah le amah kha sual aa phaw; a chiaṭha thleidannak nih a nenh i thil khi a chiat khawh chung a chialei in a hmuh.  12Ṭihnak ti mi hi biangaite, zei dang si lo  in tuaktannak der khi a si; 13 hi kong ah hin nangmah le nangmah naa bochannak a tlawm deuhdeuh, na temhinnak hrampi na hngalh lo ding khi ṭih a nung deuh deuh ve. 14 Cun annih cu aa khat mi hngilhnak ah i kharkhumh in kha muihnak a hmunh chung poh- taktak ah ṭhawnnak a ngei lo ngai i amah bantuk ṭhawnnak a ngei lo mi Mithi khua in a rak chuak ve - 15 atu mithla nganpi nih a dawi hna, a tu cu an ṭih tuknak ah an cawl kho lo; zei cah tiah ruah lopi ṭihnak nih hmakhatte ah a doh hna.

16Cucaah cuka i a tla mi cu aho a si zong ah mahka ah cun kutka tlang ngei lo thonginn chung ah vawlei ah an bawk ko. 17 Amah cu lotho a si zong tuukhal a si zong, thetse ram ah rian a ṭuan mi a si zong ah hrial khawh lo mi vanchiatnak nih a tlunh cang, zei cah tiah annih cu an zapi tein aa khat mi muihnak thirhri nih a hren cang hna.

18Thlitu hran thawng, thingnge borh lak i vate hna luri in an authawng, tilian hna an luan thawng, lungpang sangpi cung in lung hna an tlak thawng, 19 saram runpi hna an i suk thawng, sahrang ṭihnung bik hna hrum thawng, tlangsaang lungpang kua in a rak kir mi awthawng, hi vialte hna nih annih cu thi deng in a ṭihter hna.

20Zei cah tiah leicung pumpi cu chun niceu in a tleu, cun dawnkhantu um lo in a tlankel in a tlan lio ah; 21anmah cung lawng ah muihnak chahpi a zaam, anmah a cohlang ding mi muihnak muithlam a si.  Sihmanhsehlaw cu muihnak nakin a rit deuh mi cu anmah an thilrit lila kha a si.