SIRACH 41

Thihnak

41    1Maw thihnak, chawva he hnangam tein a nung mi ca ah 2lungre theihnak ngeih lo le zeizongte a tluang mi hna ca ah le rawl a ei kho rih mi hna ca ah nangmah kong ruah cu a va fak hringhran dah!

2Maw thihnak, na biachahnak cu a chambau i a tha a dih mi ca ah a kum a cang tuk i lungretheinak a thongthong a ngei i lungfahnak le thintawinak in a khat mi hna ca ah cohlan na si ko!

3Thihnak i biachahnak cu ṭih hlah; na hlan i mi hna le na hnu i a ra ding mi hna kha philh hna hlah. 4Hihi Bawipa nih a ser mi vialte hna cung i a tuah mi biachahnak a si, cucaah zei ruang ah  dah Cungnung Bik ca i a ṭha ko mi cu na doh len lai? Na nunnak cu kumhra, zakhat le thongkhat a si zong ah Sheol ah cu a sau zat theng in inter na si lai lo.

Mi ṭha lo nunnak

5Pathian hngal lo hna tlonlennak ah aa pum mi misual fale hna cu huatan tlaitlai. 6Misual fale i rosung cu a rawk ding mi a si, an tefa hna cu zungzal in mawhchiat an tong lai. 7Pathian hngal lo pa cu a fale nih an thangchiat te lai, zei cah tiah amah nih mual a rak phoh cang hna. 8Nannih Cungnung Bik Pathian Phungbia a kaltak i pathian hngal lo hna, nan ca ah ngaihchia a va si dah! 9Nan rak chuak tikah chiatserhnak he nan rak chuak, cun na thih tikah mah chiatserhnak cu na covo a si lai.

10Vawlei in a ra mi vialte cu vawlei ah a kir ṭhan lai, cu bang in mi ṭha lo cu chiatserhnak in rawhnak ah an kal lai. 11Ṭah aihramnak ti mi cu mithi ruak ca ah a si, nain man ngei lo misual hna min cu hloh an si lai.

12Na minthannak cu ṭha tein dirkamh, zei cah tiah suipon thong tampi nakin sau an nguh deuh lai.  13 Mi ngandam cu sau nawn a nung nain min ṭhatnak cu zungzal in a hmun.

A hmaan mi le a hmaan lo mi ningzahnak

 14Ka fale hna, kan chimhhrin hnanak hi ngai u law hnangam tein um u. Thuh mi fimnak le langhter lo mi chawva cu zei san dah an tlai?  15A fimnak a thup mi nakin a hruhnak a thup mi mihrut a ṭha deuh. 16Cucaah hi hna kong ah hin ningzah hngal u, zei cah tiah a zungzal ningzah cu a ṭha lo, cun a caankip ah mi nih conglawmh zong a ṭha ve lo.  17Na nu le na pa hmai ah dawh cah lo ziaza, cun uktu le upa hmai ah lihchim, 18biaceihtu le zulhphung thiamsang hna hmai ah thil ṭha lo tuah le mipi tonpumhnak ah ningcang lo thil tuah; 19na hawi le na rual hmaika ah zulhphung i ngeihter ngai, na sang le na veng ah fir len hna hi na ning a zah awk a si.

20 Pathian i biatak le thisen biakamnak hmaika ah cabuai cung na kut chiah, 21Pekṭhenhknak hmuh tikah lawmh thiam lo,  cun biakchawnh mi leh hngalh lo, 22 mi tlaitlawng nu kha ngiat, rammi hna kha cohlan lo, 23midang covo asilole laksawng chawva kha sawksam men, mi nupi helh ruang, 24mah salnu kha va fuh, – a ihkhun kha va nai hlah,  25hawikom hna sin ah bia ṭha lo chim,– laksawng kha ceihcumnak he va cohlang hlah, 26 cun theih mi bia vialte chim ṭhan le midang bochannak kha rawiphiar, hi hna ah hin na ning a zah awk a si. 27Cun ningzahnak taktak cu zei dah a si ti na hngalh lai i midang i upatnak kha na co lai.