1 Maccabaeus 12

Rom le Spartan hna he Joanathan pehtlaihnak

12 Jonathan nih zeizongte cu ṭhalei a panh cang ti a hngalh tikah Rom he an i hawikomhnak minsen kha fehter le tharchuah awkah aṭha bik palai hna cu Rom ah a thlah hna. 2Cun cu bantuk ca cu Spartanmi le hmun dang zong ah a kuat ve hna. 3 Palai hna cu Rom ah an kal, hlutdaw chung ah an lut i hiti hin an chim: "Tlangbawi ngan Jonathan le Jew miphun hna nih nanmah he nan i hawikomhnak le ṭanṭinak minsenthut kha cu hlan bang in tharchuah awkah a kan thlah," tiah an ti. 4 Hlutdaw nih an kirlei an himnak caah hmunkip um nawlngeitu hna an kuat mi hna ca kha cu an pek hna. 5 A tanglei ca hi Jonathan nih Spartan mi hna sin ah a ṭial mi cu a si:

6 "Tlangbawi ngan Jonathan, rampi hlutdaw, tlangbawi hna le adang Jewmi hna sin in kan unau Spartanmi hna sin biakchawnhnak:

7"Khuatuan lio, nan siangpahrang pakhat Areios nih kan tlangbawi ngan Onia sin a kuat mi cakuat nih a langhter bang in nannih cu kan unau taktak nan si kha fiang tein a chim. 8 Onia nih palai cu upatnak he a rak cohlan hna i an ca cu a cohlan, cu ca nih hawikom le ṭangṭi kan sinak kha fiang tein a chim. 9 Kanmahleikap ah cun hi ca cu kan herh tuk theng lo, zei cah tiah kan ngeih mi cathiang in hnemhnak cu kan hmuh cang, 10 sihmanhsehlaw nanmah he kan i hawikomhnak tharchuah awkah ca cu kan in kuat ṭhiamṭhiam ko hna, cucu ca nan kan kuat cu a sau tuk cang caah khual ah kan i can nakhnga lo a si. 11Kannih nih cun kan puaipi le ni sunglawi hna ah raithawinak le thlacamnak kan ngeih caan poh ah unau hna thlacampiak cu a tlak le a hman mi a si bang in zei tik hmanh ah kan in philh bal hna lo. 12 Nan min a than tikah kan i lawm.

13 Amah belte kannih cu hneksaknak tampi le ral tampi kan tong cang, kan pawngkam siangpahrang hna nih an kan tuk. 14 Hi raltuknak hna caan chung ah hin kan hawikom le ṭangṭi hawi hna cu hnahnawhnak kan in pe duh hna lo; 15 zei cah tiah kannih cu Vancung in bawmtu kan ngei, anih nih kan ral hna kut in a kan luatter i kan ral hna tu hi an tla peng. 16 Cucaah Antiochus fapa Neumenia le Jeson fapa Antipater kha kan thim hna i kan i hawikomhnak le ṭanṭinak tharchuah awkah Rommi hna sin ah kan thlah hna. 17 Cun annih kha nanmah zong lenkai awk, biakchawnh awk le hawikom kan sinak tharchuahnak ca zong nanmah kut ah chanh awkah nawl kan pek hna. 18 Bia nan kan leh khawh ahcun kan i lawm tuk lai,’ tiah an ṭial.

19 A tanglei hi Onia sin ah kuat mi ca a si:

20"Spartanmi hna siangpahrang Areios sin in tlangbawi ngan Onia sin  biakchawnhnak:

       21"Spartanmi hna le Jewmi hna cu unau an si i Abraham tefa an si ti kha tuanbia cauk chung ah kan hmuh. 22Atu cu kan hngalh cang i nan raltuknak thawng nan kan thanh ah cun kanmah ṭuanvo a si ve cang lai. 23 Kan in chimh duh mi hna cu: nan saṭil le nan chawva cu kanmah ta a si bang kanmah ta cu nanmah ta a si ve, kan palai hna cu hi bia hmual a ngeih khawh nakhnga kan cah hna,” tiah an ṭial.

Coele-Syria i Jonathan le Filistin i Simon

24Amah kha tuk awkah Demetrius ralbawi hna cu a ngan deuh mi ralkapbu an rak kir cang ti kha Jonathan nih a theih. 25 Cucaah Jonathan cu a ram tuknak caanṭha kha pe lo in Jerusalem in a chuak i anmah he i tuk awkah Hamath ram ah a va kal. 26 An riahbuk ah ngiathlaitu a thlah hna, an hung kir tikah annih nih an ral cu Jew hna kha zan ah tuk ding in hmunhma an la cang ti kha an chimh.  27Ni a tlak tikah Jonathan nih a mi hna kha an hriam i tlaihcia in ralring tein um awk le zei tik poh ah tuk khawh ding timhcia um awkah a chimh hna i hmaifong ralveng hna kha a chiah hna. 28 Jonathan le a mi hna cu tuk awkah timhcia in an um cang ti kha an theih tikah an ral cu an thin a phang i an thin tur bu in, meifar an i van i an riahbuk in an chuak. 29Jonathan le a mi hna cu an meiceu kha an hmuh ko nain an zaam dih cang kha khua a dei tiang an hngal lo, 30cun Jonathan nih a dawi ko hna nain, a phan kho ti hna lo; zei tin tiah annih nih Eleutherus tiva kha an tan diam cang. 31Cucaah Jonathan cu Zabadaean ti mi Arab ramlei ah aa mer, annih kha a tuk hna i a ramh hna; 32cu hnu ah an riahbuk kha a ṭheh, Damascus ah a lut i ramṭhen vialte kha a cul dih. 33Mah lio ah Simon cu aa thawh ve i Eskalon le a pawngkam khuapi hna tiang a cul dih.  Cun Joppalei ah aa mer i lak awkah rianrang tein a lut; 34 zei tin tiah annih nih hi runvennak ṭha pi cu Demetrius bawmtu hna sin ah chanh an timh kha a theih caah a si; khuapi ah ralveng pawl kha a chiah hna.

Jerusalem i inn saknak rian

35A rak kir ṭhan tikah, Jonathan nih mipi upa hna kha a pumh hna i Judah ram chung ah ralhau hna sak awkah, 36 Jerusalem kulhnak vanpang santer deuh awkah le khualipi le Ralhau khua karlak khuadannak vanpang sangpi sak awkah bia an chah; cucu Ralhau khua kha khualipi he pehtlaihnak hrawh in cuka um hna kha khualipi chung thil zuar le thil cawknak in khamh hna awkah a si. 37 Khualipi sakṭhan ti mi cu zapi nih bawmh awk a si: nichuahlei horkuang cung vanpang a cheu cu an tla cang; Chapenatha ti mi hmun kha a remh ṭhan cang. 38 Mah lio ah a niamnak i a um mi Adida cu Simon nih a sak ṭhan, a kulh i kutka hna kha bawl hrenh he a dirh hna.

Jonathan cu a ral hna kut ah a phan

39 Traifo a saduhthah cu Asia siangpahrang can, luchin i chinh, cun Antiochus siangpahrang tei kha a si. 40 Jonathan nih mah thil kha a onh lai lo ti le amah hmanh kha a doh khawh men ti a hngalh, cucaah thluak chuah in amah kha tlaih i thah khawhnak ding ruahchannak he aa thawh i Beth-Shean ah a ra.

       41A ruahnak hrawh awkah Jonathan cu thim mi ralkap thongli he a chuak i Beth-Shean ah a rak phan. 42 Khaka ah khan Traifo nih amah kha ralkap tampi he a hmuh tikah amah tuk awkah a zenh cang. 43 Upatnak le conglawmhnak in amah kha a cohlan, a hawile hna sin ah theihternak a tuah, laksawng a pek i a hawile le a ralkap hna kha amah nih a bia a ngaih bang in a bia an ngaih naklai nawl a pek hna. 44 Jonathan sin ah khan, “Nangmah le keimah karlak ah ṭih ding a um lo nain zei cah dah hi hna hi cu tluk harnak na pek hna? 45 Annih cu tlunter ko hna; nangmah pum vengtu ca ah mi tlawm te kha i thim hna law keimah he Ptolemai khuapi ah ra ve; mah khua le adang ralhau hna le a tang mi ralkap le zungbawi hna cu nangmah kut ah kan chanh lai, cu hnuah kei cu ka tlung te lai; hihi ka rat hnawhchan a si,” tiah a ti. 46 Jonathan nih amah kha a zumh i a chim bang in a tuah; a ralkap hna cu Judea ram ah an kir ṭhan. 47Amah sin ah ralkap thongthum aa chiah, mah chung ah thonghnih cu Galilee ah a kaltak hna i thongkhat lawng nih an zulh. 48Sihmanhsehlaw Jonathan cu Ptolemai a luh cangka in khuami nih kutka an khar, amah kha an tlaih i amah he a rak lut ve mi vialte kha an thah dih hna. 49 Traifo nih ke ralkap le rang ralkap hna kha Jonathan ṭanpitu hna thah awkah Galilee le Nelrawn Pi ah khan a thlah hna. 50 Hi hna nih amah cu an tlaih i a hawile hna he a thi cang ti kha an hngalh tikah pakhat le pakhat tha i pek in naihnaim tein um i ral tuk awkah timhcia in an um. 51Anmah a dawitu hna nih annih cu an nunnak pek in an kan tuk lai ti an hmuh tikah hnulei ah an i tawn. 52Annih cu Judea ram ah dam le him tein an phan, Jonathan le a ralkap hna kha lungkuai in an ṭah hna; cun an lau tuk hringhran; Israel dihlak cu ngaihchiatnak in an khat. 53Atu cu an pawngkam miphun hna nih anmah hrawhnak ding lam lawng an kawl cang:  Annih nih, “Hruaitu an ngei ti lo; ṭanpitu zong an ngei ti lo; atu hi kan tuk hna ah cun an philh lonak hrim kha minung phun lungthin in kan hloh lai,” tiah an ti.