SIRACH 13

Na ṭhirual kom hna

13 Vok a tawng mi poh cu an thurhnawm lai, cun miporhlaw a kom mi poh cu amah bantuk an si ve lai. 2Na ca ah a rit tuk mi thil cu phorh i zuam hlah, cun nangmah nakin a ṭhawng deuh le a rum deuh mi cu kom hlah. Zei ruang ah dah tlak-um cu thir-um pawng ah na chiah lai? An i khawn tikah a kuai ko lai hen cu. 3Mirum cu a palh ko nain a dirhmun a sang rih, misifak cu a hmaan zong ah ngaihthiam a hal rih. 4 Hman na ṭhat ahcun mirum nih an ei lai, na sungh ah an kaltak lai. 5Na tlam a tling maw? – an komh lai, zei hmanh tang lo in an thianh lai. 6An herh maw? – an hlen lai, an merh lai i ruahchannak an pek lai; nem tein an chawnh lai, cun, “Na herh mi a um maw?’ an ti lai. 7Rawldanghnak ah na hmai an chiatter lai i  voihnih voithum an thianh hnu, a donghnak ah an nihsawh lai. Cu hnu cun an hmuh tikah an hrial lai i a lu an thinhnawh lai.

8Na hruh ruang ah mi nih an in hlen i an in thangchiat nakhnga lo i ralring.   9Mi lianngan nih an sawm tikah naa hnawh lo ahcun an auh chih lai. 10 Hmai i cuh hlah a kam ah an in thawn sual lai, cun nangmahte lawng va dir hlah, hmu lo an in um sual lai. 11Amah he aa tluk mi bang bia va chim hlah, a bia va tan hlah, zei tin tiah hi bia vialte cu nangmah hneksaknak ca ah a chim mi a si, nem tein na cuai an thlai.

 12 15Mikong a ceih mi cu zaangfahnak a ngei lo mi a si, nangmah zong an zuah lai lo. 13 16Biatak tein vaa ralring, zei ca ah tiah na tlaknak a si mi he naa chawk.

15 18A nung mi vialte nih a phun hawi le mikip nih a minung hawi cu a dawt. 16 19Ser mi vialte cu a phun he aa cawh i minung cu a phunhawi aa bet.  17 21Zei tin dah cenghngia le tuu cu an lung aa khah khawh lai? - cu bantuk in misual le miding zong an si ve. 18Zei bantuk daihnak dah hyena le uico karlak ah a um lai? Cu bantuk in mirum le sifak karlak a si ve. 19Ramlak laa hna cu chiandeih hna rawl an si; cu bantuk in misifak cu mirum hna rawl an si ve. 20Mi ruamkai nih toidornak cu fihnung ah a ruah, cu bantuk in misifak cu mirum ca ah fihnung a si ve.

21Mirum cu a tluk tikah a hawile nih an bawmh, misifak cu a tluk tikah a hawile nih an lamhchih. 22Mirum cu a nal tikah a tlaitu ding tampi an um, sullam ngei lo bia a chim ahcun mi tampi nih an conglawmh. Misifak cu a nal i an mawhchiat, sullam a ngei mi bia a chim khawh men, nain aho hmanh nih caan an pe lo. 23Mirum nih bia a chim i mikip nih an ngaih, cun a bia cu van tawng in an hlorh. Misifak nih bia a chim i mikip nih, “Aho dah a si?’ an ti. Cun a rilh ahcun a hnipuan tiang an hawh rih.

24Sualnak aa tel lo ahcun rumnak cu a ṭha, pathian hngal lo nih sifahnak cu a ṭha lo an ti.

 25Minung muisam cu kan lungthin, a chiatpek a ṭhat pek ah a langhtertu a si.  26A lung aa lawm mi cu a mithmai a panh; sihmanhsehlaw a tha a ba mi nih phung a thluk.  

14 Bawipa kha na nun chung vialte va daw. Mah kong hna kha na theih tikah na ihnak in hliphlau tein va tho. Bawipa kha na nun chung vialte va daw. Khamhnak na hmuhnak ding ah Bawipa cu va hal.