Judit 11

Judith le Holoferni voikhatnak an i tonnak

11 Holoferni nih khan, “Phang hlah minu, ṭih hlah,” tiah a ti. Vawlei pumpi siangpahrang Nebukhadnezar rianh ding aa thim mi aho hmanh fahnak ka pe bal hna lo.  2 Atu zong ah hin tlangram ah a um mi na miphun nih an ka sersat lo ahcun fei pakhat hmanh ka hlerhnawh hna lai lo. Hihi cu keimah palh si lo in anmah palh a si. 3Sihmanhselaw ka chim tuah, zei cah dah anmah sin khan na zaam i kan sin ah na rat ning a si? Zei tin a si zong ah mah nih hin nangmah khamhnak a chuahter lai; phanghlah! Tuzan zong na nung ko lai i hi hnu zong ni tampi na nung rih ko lai.  4Aho hmanh nih fahnak an in pe lai lo. Mah lawng si lo in ka bawipa siangpahrang Nebukhadnezar a rianh mi cung cio ah an rak tuah bang in ṭha tein an in zohkhenh ko hna lai,” tiah a ti.

5Judith nih cun zaangfahnak in na salnu nih ka chim ding mi cu ṭha tein ka ngaihpiak ko. Na salnu hi na hmaika ah biachimnak nawl ka pe hram ko, tuzaan ah hin ka bawipa hmai ah lih bia pakhat hmanh ka chim lai lo. 6 Na salnu ruahnak pek mi hi na zulh a si ahcun Pathian nih na rianṭuannak vialte hlawh a tlinter cikcek lai; ka bawipa nih a tuah mi poh thluachuah pek lo in a um lai lo. 7A nung mi lungthin vialte lawmhnak petu ding ah an thlahtu, vawlei pumpi siangpahrang, Nebukhadnezar cu a nunkhua sau ko seh! a ṭhawnnak cu hmun zungzal ko seh! Zei cah tiah, nangmah thawng in amah cu minung lawng si lo in saram vialte hna, caw le naa le van vate hna hmanh nih Nebukhadnezar le a chungkhar ningpi rianh ding ah an nung.

8Na fimnak le na hmuhtonnak a tam ning cu kan rak theih cang. Vawleicung mi vialte nih hngalh mi cu nan pennak ah hin raltuk thiamnak, hmuhtonnak le fimnak ah nangmah an tluk mi an um ti lo ti hi a si. 9 Cun na khongsil ah Akhor nih zei dah a chim ti zong kha kan rak theih cang. Bethulia khuami hna nih amah kha an zuah caah nangmah sin ah a chim mi vialte kha a chimh dih hna. 10Atu ka saya le ka bawipa a chim mi kha zei rel lo in um hlah; na lung ah chia ko; zei cah tiah a hmaan mi a si; kan miphun nih a Pathian cung ah a sual ti dah lo cun kan miphun cu dantat a si lai lo i zei vainam hmanh nih an cung ah nawl a ngei lai lo. 11Sihmanselaw atu cu ka bawipa nih sunghnak ding le zamnak ding ruah ding a um ti lo, zei cah tiah sualnak an tuah tik poh ah Pathian thin an hunter cang i sualnak nih a khuh cang hna, cucaah thihnak cu an lu cung ah a tla ding a si ko cang. 12 Rawl an ngei ti lo i an ti a kao cang, cucaah an mit cu an saṭil cung ah a tla cang i Pathian nih ei hlah u a ti mi hna kha ei dih an i tim cang. 13Annih cu fangvoi thlaithar, chiti le mitsur cheuhra cheukhat chiah mi kha ei an i tim cang, hi hna cu Jerusalem i Pathian hmaika ah a rianthiang a ṭuan mi tlangbawi hna nih an pekchanh cang mi le anmah ca ah adang tein chiah mi hna an si i mi sawhsawh cu tonghthamnak nawl hmanh an ngei lo, 14 sihmanhsehlaw annih nih Jerusalem ah an mi kha an thlah hna i – cuka i khua a sa mi hna zong cuti cun an tuah ve hna nakhnga – Upa hna Khongsil i nawlngaihnak kha an va halter hna. 15 Atu hiti hin a si lai: tuahnak nawl a rak phak cangka in an tuah colh lai i cu ni bak ahcun annih cu hrawh cikcek ding ah nangmah kut ah chanh an si lai.

16 Na salnu cu hi vialte ka theih tikah an sin in ka rak zaam. Vawlei nih a theih tikah a khuaruah a har tuk ding mi thil pakhat kha nangmah he tuah ding ah Pathian nih a ka thlah cang. 17Na salnu hi Pathian a ṭihzah taktak mi ka si; chunzan in vancung Pathian kha upatnak ka pek.  Cucaah keimah cu nangmah he um ding in ruahnak kan pek. Na salnu cu zaan fatin horkuang ah ka va chuak lai i zei tik dah sualnak an tuah ti kha hngalhter awkah Pathian sin thla ka va cam lai.   18Cun nangmah kha thawng thanh awkah ka rak kir ṭhan lai; cu tikah na ralkap bupi he ral na tho kho lai i aho hmanh nih an in doh kho lai lo. 19 Jerusalem na phak hlan lo  Judaea ram vialte ah na lamhruaitu ka si lai; cuka ah cun khualipi laifang hrimhrim ah kan ṭhutter lai. Cun cuka ah cun nangmah nih annih kha uico pakhat hmanh bo lo in, tuukhal a ngei lo mi tuuruun bang na kulh dih hna lai. Hihi ka theihcia cang; hihi an ka chimh chung cang i hihi nangmah sin phuan awkah an ka thlah cang,” tiah a ti. 

20A bia cu Holoferni le a bawmtu hna an hna ah a thlum ngai. 21A fimnak ah khan an khuaruah a har tuk caah annih nih, “Vawlei khattelei le adang khattelei deng tiang amah bantuk, a mui duh a nung mi, fim ngai in bia a chim thiam mi, minu an um lo,” tiah an ti. 22 Holoferni nih cun, “Midang hmai ah nangmah thlah chung cu Pathian a thiam tuk. Ṭhawnnak cu kanmah ta a si lai i rawhnak cu ka bawipa a sersat mi hna ta a si lai. 23Nangmah tu cu naa dawh tluk in bia na chim thiam; bia naa kam bantuk in na tuah ahcun na Pathian cu ka Pathian a si ve lai, siangpahrang Nebukhadnezar bawi innpi cu na khuasaknak innpi a si ve lai i vawlei cung kakip ah na min a thang lai,”tiah a ti.