Advent Zarhhnihnak

December 8, 2024

Second Sunday of Advent

Lectionary: 6

Baruch le Babilon i Jewmi hna

5An theih tikah Bawipa hmai ah an ṭap, rawl an ulh i thla an cam.6 Cun tangka kha a tam khawh chung in an kholh i 7 Jerusalem i Shallum fapa Helkaiah i fapa tlangbawi Jehoiakim le tlangbawi dang hna le Jerusalem i anmah he a um mi vialte hna sin ah an kuat hna. 8 Cun Sivan thla nihranak ni ah khan Judah ram ah kirpi ṭhan ding in Temple in rak lak mi Bawipa inn i thilri hna cu amah kha an pek. Hi thil hna cu – Judah siangpahrang Josiah fapa Zedekiah nih a rak ser mi ngun thilri hna an si i, 9cucu Babilon Siangpahrang Nebuchadnezzar nih Jeconiah kha siangpahrang fapale hna, soser thiam hna le phunbawi hna le mipi hna he khan Jerusalem in Babilon ah sal in a kuat hna hnu ah a si.

Responsorial Psalm Ps 126:1-2, 2-3, 4-5, 6.

R. Kan caah thil lianngan a tuah taktak hna; zeitluk in dah kan rak i lawmh!

Bawipa nih Zion i a kan kirpi ṭhan ah khan, kan mang bantuk a rak si! 2 Zeitluk in dah kan nih kan kheh i zeitluk in dah lunglawmhnak hla kan sak kha! Kha tikah khan miphun dang hna nih, "An caah Bawipa nih thil lianngan a tuah," an kan ti. R

3 Kan caah thil lianngan a tuah taktak hna; zeitluk in dah kan rak i lawmh!4 Bawipa, kan ram ah kan kirpi ṭhan ko, a carmi tiva ah ruah nih ti a chuahpi ṭhan bangin, kan kirpi ṭhan ko. R.

5 Mitthli he thlaici a tuhmi nih, lunglawmh aunak he an zun lai; 6 Ṭah buin thlaici aa phorhmi hna nih lunglawmhnak hlasa le facang phal i put in an ra kir lai! R.

Reading II Philipi 1:4-6, 8-11

4 cun nan ca i thla ka cam fate lunglawmhnak in ka cam, 5 zeicahtiah a hramthawk tein nihin ni tiang, hi Thawngṭha rian ka ṭuannak ah hin nan ka bawmh zungzal. 6 Cucaah cun, nan chungah hi rian ṭha a thawktu Pathian nih, Khrih Jesuh Ni ah hi rian cu a lim tiangin, a ṭuan zungzal lai. 7 Ka hnakkar ah nan i tenh zungzal ko. Hi bantukin nan cungah lungthin ka ngeih hi ka ngeih hrim awk a si ko, zeicahtiah nan ka dawt tuk hringhran i thong i ka tlak ah siseh, leng i ka luat ah siseh, Thawngṭha kha ahmaan i biatak a si tiin ka chimnak rian ah khan nan ka bawmh zungzal. 8 Khrih Jesuh lungthin chungin a chuakmi ngaihnak in kan ngai hna, hi ti ka ti tikah hin ka lih a si lo ti cu Pathian nih a hngalh. 9 Nan ca i thla ka cam tawnmi cu, nan dawtnak ngeihmi cu hngalhnak ahmaanmi le a chia a ṭha thleidan khawhnak fimnak he ṭhang seh law, 10 cuticun a ṭha bik i thim awk kha nan hngalh lai, ti hi a si. Cun thurhhnawmhnak vialte le mawhchiatnak in Khrih Ni ah cun nan luat lai. 11 Jesuh Khrih lawng nih a kan pek khawhmi ziaza ṭha taktak in nan nunnak cu a khat lai i cucu Pathian sunparnak le thangṭhatnak caah a si lai.

Alleluia, Lk 3:4, 6

Profet Isaiah a chim mi bia hna cauk ah aa ṭial bang khan a hung si: aa ṭial mi cu:

“Thetse ram chung i a um mi aw pakhat nih: Bawipa ca ah lam sialpiak u, a lam cu dinter u! 6 cun miphun vialte nih Pathian khamhnak cu an hmuh lai,” ti hi a si.

Gospel Lk 3:1-6

Baptisma petu thawngthanhnak,

3 Tiberius Sisar a bawi kumhleinganak ah, Pontius Pilat cu Judah mangki bawi, Herod cu Galilee uktu bawi, a nau Filip cu Iturea le Trakhonitis ram hna uktu bawi, cun Lisanias cu Abilene uktu bawi an si lio, 2 Annas le Kaiafas cu tlaangbawi ngan rian an ṭuan lio ah, Pathian bia cu ramcar chung i Zekhariah fapa Johan sin ah a rak phan. 3 Jordan ram vialte a cul i sual ngaihthiamnak ca ah sual ngaihchihnak baptisma kha a phuan, 4 cucu Profet Isaiah a chim mi bia hna cauk ah aa ṭial bang khan a hung si: aa ṭial mi cu:

“Thetse ram chung i a um mi aw pakhat nih: Bawipa ca ah lam sialpiak u, a lam cu dinter u! 5 Horkuang vialte cu chilh ulaw tlang le mual vialte cu rawnhter hna u, aa kuai mi lam cu dinh ulaw lambingbo cu thlamh dih hna u, 6 cun miphun vialte nih Pathian khamhnak cu an hmuh lai,” ti hi a si.