Day Mass

December 25, 2024

The Nativity of the Lord (Happy Christmas)
Mass during the Day

Lectionary: 16

Reading I Is 52:7-10

     7 Daihnak thawng ṭha i phorh in tlang cungin a rami lamkaltu ke cu zeitluk in dah aa dawh! Teinak kong kha amah nih cun a run thanh i Zion cu a thawh i, "Na Pathian cu siangpahrang a si," a ti. 8 Khua a vengtu kha an au i lunglawm in hmunkhat ah hla an sa. Zion i Bawipa a kir ṭhan kha an mit hrimhrim in an hmuh. 9 Jerusalem khua chung i a rawkmi hmun hna, lunglawm le thanuam in au tuah u. Bawipa nih a mi cu a hnemh cang hna, a khuapi cu a khamh cang. 10 Bawipa nih a thiangmi a ṭhawnnak cu a hman cang; a mi kha a khamh cang hna i cucu vawlei mi vialte nih an hmuh cang. 

Responsorial Psalm Ps 98:1, 2-3, 3-4, 5-6.

R. Vawlei cung khuazakip nih Pathian khamhnak thawnnak kha an hmuh cang.

Bawipa cu hla thar in thangṭhat tuah u, khuaruahharmi thil kha a tuah hna! A ṭhawnnak le a thiangmi a thazang in ral kha a tei hna. 2 Bawipa nih cun ral a tei hnanak thawng kha a thanh i a khamhnak ṭhawnnak kha miphun vialte a hngalhter hna. R

 3 Israel mi bia a kamhmi hna kha a zulh i an cungah a fekmi dawtnak a ngei i zumhawktlak in a um. Kan Pathian nih ral a teinak kha mi vialte nih khuazakip ah an hmuh. 4 Vawlei mi vialte hna, lunglawm in Bawipa cu hla in thangṭhat tuah u; lawmhnak hla in thangṭhat u law a au in au u! R

5 Bawipa thangṭhatnak hla cu sa u, thangṭhatnak hla cu tingtang he ṭhuan hna u. 6 Muko le tuukawng ki tum hna u law Bawipa, siangpahrang hmaiah cun lunglawm in au u. R

Reading II Hebrews 1:1-6

Hlan ah cun Pathian nih kan pupa hna sin i bia a chim tikah profet kha a rak hman hna i a cheuchum tete le phun dangdang in a chimning cu a rak si. 2 Sihmanhsehlaw atu kan chan, chan hmanung bik a simi chan ah hin cun, kan sinah a Fapa in a bia cu a chim. Amah thawng cun Pathian nih van le vawlei vialte kha a ser hna i amah cu Pathian nih a donghnak i zeizong vialte uktu ding i a thimmi cu a si. 3 Amah cu Pathian sunparnak in a ceu i Pathian he aa lo taktakmi kha a si; cun van le vawlei kha, ṭhawnnak a ngeimi a bia in a domhtlaih hna. Minung cu an sualnak kha a thianhpiak dih hna hnu in vancung ah khin Lianngan Bik Pathian orhlei kamah a ṭhu. 4 Pathian nih a Fapa cu vancungmi hna a pekmi nakin a ngan deuhmi min a pek bantukin, vancungmi hna nak ngan deuh ah a ser. 5 Pathian nih a vancungmi pawl cu ahohmanh, "Nangmah cu ka Fapa na si, nihin ah na Pa ah ka cang," a ti bal hna lo. Cu hleiah, "Keimah cu a Pa ka si lai i amah cu ka Fapa a si lai," ti zongah a ti bal fawn hna lo. 6 Pathian nih a fater cu vawlei cung i a thlah tikah, "Pathian vancungmi vialte nih amah cu an biak awk a si," a ti. 

R. Alleluia, Alleluia.
Ni thiang niceu dawte cu kan cungah a hung chuak cang. Miphun vialte hna, ra u law Bawipa cu bia hna u sih. Zeicahtiah nihin ah vawlei cungah ceunak nganpi a tlung.

Gospel John 1:1-18 or (John 1:1-5,9-14)

1 A hramthawk ah Bia a rak um; cu Bia cu Pathian he a rak um i cu Bia cu Pathian a si. 2 Amah cu a hramthawk in Pathian he a rak um cang. 3 Amah thawng in zeizongte cu a hung si i amah thawng lo in ser mi thil zei hmanh a um lo. 4  Amah chung in a rak si mi vialte cu nunnak a si i cu nunnak cu minung ca ah ceunak a si, 5 Cu ceunak cu khuamui ah a ceu i muihnak nih a khuh kho lo.

6 Pathian nih a thlah mi pa cu a ra. A min cu Johan a si. 7Amah cu ceunak kha tehte khaan awk ah tehte in a ra, cucu amah thawng in mi vialte nih ceunak kha an zumh khawh nakhnga caah a si. 8 Amah cu ceunak a si lo, ceunak kha tehte khaan awk ah a ra. 9 Bia cu mikip kha ceunak a pe mi ceunak taktak a si; vawlei ah hin a rak ra. 10 Amah cu amah thawng in a rak cang mi vawlei ah hin a rak um, nain vawlei nih amah kha a hngal lo. 11 A mi hna sin ah a rak ra i a mi nih an cohlang lo. 12  Sihmanhsehlaw amah a cohlang i a min a zum mi hna cu Pathian fale sinak huham kha a pek hna: 13 annih cu minung hrihhram, minung pumsa thisa duhnak le minung duhnak in a chuak mi si lo in Pathian hrimhrim sin in a chuak mi an si. 14 Bia cu thisa ah a cang i kan lak ah khua a sa, a sunparnak cu kan hmuh, cu a sunparnak cu Pathian Fapa ngeihchun a sinak thawng in a ngeih mi a si i  veel le biatak in a khat.

15 Johan nih amah cu tehte a khaan. Amah nih, ‘Hihi pei ka hnu in a ra nain, ka hlan ah a rak um cang caah a ka chawhkanh ka ti mi pa cu a si,’ ti in a thanh.

16 A taktak ti ahcun, amah a tlinnak in kannih vialte cu veel kha pakhat hnu pakhat kan co. 17 Zei cah tiah Phungbia cu Moses sin in pek kan si, veel le biatak cu Jesuh Khrih sin in a ra. 18 Aho hmanh nih Pathian an hmu bal lo, Pa lungthin naih ah a um mi Fapa ngeihchun hi Pathian a kan hngalhtertu cu a si.