August 3.24
Zarhkel (17)nak Zarhte Ni
Lectionary: 406
Cun tlangbawi hna le profet hna nih cun bawi hna le mi vialte cu an thawh hna i, "Hi pa hi thih awk a tlak. Hi khua kha rawk seh, tiah a chim: nan hna in nan theih cio," an ti. 12 Cu tikah Jeremiah nih bawi vialte le mi vialte cu a thawh hna i, "Hi inn kong le hi khua kong i nan theihmi bia vialte hi chim awkah Bawipa nih a ka thlah. 13 Nannih nan lam le nan tuahnak kha nan i remh i Bawipa nan Pathian kha a nawl nan ngaih ahcun, a lung aa let lai i, nan cungah ka tlunter lai ti in an hro hnanak ṭhat lonak kha a lak ṭhan lai. 14 Sihmanhsehlaw kei tu cu nan kut chungah ka um ko; a ṭha le a hmaan nan tining paoh in ka cungah tuah ko u. 15 Sihmanhsehlaw nan ka thah ahcun, nanmah le hi khua le a chungah a ummi vialte hi, nan dihlak in, a sual lomi thisen kan chuah caah hin kan sual ti bel hi fiang tein run i hngal u, zeicahtiah hi bia vialte hi nan theihhngan i chim awkah Pathian nih a ka thlah taktak," tiah a ti. 16 Cun bawi hna le mi vialte nih cun tlangbawi le profet kha an thawh hna i, "Hi mipa hi thah awk a si lo, zeicahtiah kan sinah Bawipa kan Pathian min in bia a chim ko," tiah an ti. Sihmanhsehlaw Safan fapa Ahikam kha Jeremiah leiah cun a ṭan caah mizapi kut chung i va thihnak khan a luat.
R.Bawipa na dawtnak in ka ral hna kut chungin ka huppheng ko.
. 15 Tilian cu ka fenhter sawh hlah; a thukmi ti chungah cun ka pilter sawh hlah, thlan chungah cun ka tlakter sawh hlah. 16 Maw Bawipa, a fekmi na dawtnak ṭhatnak thawngin ka thlacamnak cu ka let law, zawnruahnak ngan na ngeihmi thawngin keimah leiah i mer ko.
Pathian cu hla in ka thangṭhat lai, a lianhngannak cu ka thanh lai i amah cungah kaa lawmhnak cu ka chim lai. 31 Hi nih hin Bawipa cu cawtum pekchanh nakin a lawmhter deuh lai i cawtum kum tlingmi pekchanhnak hmanh in a lawmhter deuh lai.
33 Sifahnak le retheihnak a ingmi hna thlacamnak cu Bawipa nih a ngaih i thong chungah a ummi hna kha a philh hna lo. 34 Van le vawlei hna, Bawipa cu thangṭhat tuah u, rili le a chung i a ummi thil vialte hna, Bawipa cu thangṭhat tuah u.
R. Alleluia, alleluia. Mt 5:10
Pathian nih tuah u, a timi tuah ruangah hremnak a ingmi cu lunglawmmi nan va si dah! Vancung Pennak cu nanmah ta a si.
Thawngthabia,Mt 14:1-12
Cu caan ah cun Galilee ram uktu Herod nih khan Jesuh kong cu a rak theih. 2 A bawi pawl kha a thawh hna i, "Amah hi tipil petu Johan kha a si hrimhrim ko lai: thihnak in a tho ṭhan i a si lai. Cucaah cun khuaruahhar tuah khawhnak ṭhawnnak a ngeih hi a si lai," tiah a ti. 3 Herod nih khan Johan cu a rak tlaihter hna i thong ah an thlak. Cu ti i a tuahnak cu a nau Filip nupi Herodias ruangah khan a si. 4 Tipil petu Johan nih khan Herod cu, "Herodias cu na ṭhit awk a si lo," tiah a chimh lengmang caah 5 Herod nih cun Johan cu thah a duh, sihmanhsehlaw Judah mi nih cun Johan kha profet a si tiah an ruah caah annih cu a ṭih hna. 6 Herod chuah ni ah Herodias fanute kha zapi hmaiah cun a lam i Herod cu a lung a ton hringhran. 7 Cucaah bia a kam i, "Na ka halmi paoh kan pek lai," tiah chiatser in a ti. 8 A nu nih a chimh bangin, "Hika hrimhrim ah hin Tipil petu Johan lu kha kheng in ka pe," tiah a hal. 9 Siangpahrang cu a ngaih a chia ko, sihmanhsehlaw chiat a sermi ruang le a sawmmi hna kha an hmai a khah hna lo ruangah, a duhmi cu tlinter si ko seh, tiin nawl a pek hna. 10 Cucaah Johan cu thong chungah khan a lu a va tanter hna. 11 A lu cu kheng cun an rak put i ngakchianute cu an pek i ngakchianute nih cun a nu sinah a hei kalpi. 12 Johan zultu cu an ra i a ruak kha an lak i an vui; cun Jesuh kha an va chimh.