August 5.24
Zarhkel (18)Nak Nikhat ni
Lectionary: 407
Cu kum ṭhiamṭhiam, Judah siangpahrang Zedekiah bawi hram aa thawk kum, a thla nganak thla ah cun, Gideon khua profet Hananiah, Azur fapa nih cun, Bawipa inn chungah, tlangbawi hna hmaiah le mi vialte hna hmaiah cun a ka thawh i, 2 "Mah hihi Ralkapbu Bawipa, Israel Pathian bia cu a si: Babilon siangpahrang hngawngkual cu ka khiah cang. 3 Kum hnih chungah, Babilon siangpahrang Nebukhadnezzar nih hi hmun in Babilon ah a kalpimi umkheng vialte cu hi hmun ah hin ka rak kirpi ṭhan hna lai. 4 Hi hmun ah hin Judah siangpahrang Jehoiakim fapa Jekoniah le Judah ram in Babilon ah a kalmi saltang vialte hna zong kha ka kirpi hna lai, tiah Bawipa nih a ti, zeicahtiah Babilon siangpahrang hngawngkual cu ka khiah lai, a ti," tiah a ti. 5 Cun profet Jeremiah nih profet Hananiah cu Bawipa inn chungah a dirmi tlangbawi hna le mi vialte hmaiah khan a thawh i, 6 "Cuticun hei si tak seh law dah ngai kaw! Bawipa nih cu bang cun tuah ko sawh seh; na chimmi na bia cu Bawipa nih tlinter hram ko seh law, hi hmun ah hin Babilon ram in Bawipa umkheng hna cu le saltang vialte hna kha kirter ṭhan hram ko hna seh! 7 Asinain, nangmah le mi vialte sinah ka chim awk a herhmi bia belte hi thei hmanh: 8 Nangmah le keimah um hlanah, hlan liopi ah a ummi profet hna nih ram tampi cungah le pennak nganngan cungah ral le mangṭam le rai a tlun lainak kha an rak chim tawn. 9 Cucaah daihnak a um lai, tiah a chimtu profet tu cu, cu profet bia a tlin tikah pei dik amah cu Bawipa nih a thlahmi a si taktak le si taktak lo kha hngalh a si te ko lai," tiah a ti. 10 Cun profet Hananiah nih profet Jeremiah hngawng i hngawngkual cu a lak i a khiah i 11 mi vialte hmaiah cun, "Bawipa nih hi bangin a ti: Hi bangin Babilon siangpahrang Nebukhadnezzar hngawngkual cu ka khiah lai, mah hihi kum hnih chungah ka tuah lai, a ti," tiah a ti; cun Jeremiah cu a kal. 12 Profet Hananiah nih profet Jeremiah hngawng i a ummi hngawngkual a khiah hnu tlawmpal ah Bawipa bia cu Jeremiah sinah a ra: 13 "Thing in sermi hngawngkual cu na khiah cang hna, sihmanhsehlaw an hmun ah thir hngawngkual kha na co lai. 14 Zeicahtiah hi bangin Ralkapbu Bawipa, Israel Pathian nih a ti, 'Hi miphun vialte hna hngawng ah hin thir hngawngkual ka chiah lai i Babilon siangpahrang cu an rianh lai. Amah cu an rianh lai, amah riantu dingah ramlak saram hmanh amah cu ka pek cang hna,' " tiah a ti. 15 Cun Jeremiah nih Hananiah cu a thawh i, "Hananiah, ngaihmanh! Nang cu Bawipa nih an thlahmi na si lo i lihbia kha hi miphun hi na bochanter hna. 16 Cucaah Bawipa nih hi bangin a ti: 'Zohhmanh, vawleicung in nang cu kan ṭhial lai. Bawipa dohnak kha na chim caah tukum chung hrimhrim ah na thi lai,' a ti," tiah a ti. 17 Cu kum hrimhrim a thla sarihnak thla ah profet Hananiah cu a thi.
R.Bawipa na nawlbia cu ka cawnpiak tuah hna.
. 29 Lam ping zulh ka dawn law na ṭhatnak thawngin na phunglam kha ka cawnpiak tuah. . 43 Ka rak i ruahchanmi cu na biakhiahnak kha a si zungzal caah biatak cu ka chim zungzal khawh nakhnga ka bawm.
. 79 Nangmah an ṭihmi le na nawlbia a hngalmi cu ka sinah ra hna seh. 80 Ral tuknak i sungh ningzahnak khan ka luat nakhnga, na nawlbia cu tlamtling tein ka zulhter ko.
95 Miṭhalo pawl nih thah awkah an ka bawh ko, sihmanhsehlaw kei cu na phunglam kha ka ruat ko hna lai.102 Na cawnpiaknak kha zeirello in ka um hna lo, zeicahtiah a ka cawnpiaktu cu nangmah na si.