Zarhkel (22)nak Cawn nihnih ni

September 3, 2024 (Year B)

Avoikhatnak Bible

1Korin 2:10-16

10Cu biathli cu Pathian nih a Thlarau in kannih sinah khan a phuan. Thlarau nih cun zeizong vialte kha a dah a hriah dih, Pathian nih aa tinhmi a thukmi hmanh kha a coih dih hna. 11Minung cu a chung i a ummi amah a thlarau nih khan a konglam cu a dihumnak in a hngalh; cu bantukin Pathian zong cu Pathian Thlarau lawnglawng nih a konglam kha a dihumnak in a hngalh ve. 12Kannih kan hmuhmi thlarau cu hi vawlei thlarau hi a si lo, Pathian nih a kan pekmi vialte cu kan hngalh khawh nakhnga, Pathian nih a run thlahmi Thlarau cu kan hmuh cang.

13Cucaah Thlarau a ngeimi hna sinah thlarau lei biatak kha a sullam kan chim tikah minung cawnpiakmi bia kha hmang loin Thlarau cawnpiakmi bia tu kha kan hman. 14Sihmanhsehlaw Thlarau a ngei lomi nih cun Pathian Thlarau sinin a rami laksawng cu an hmu kho lo. Fiang in an hngal kho ngaingai hna lo; laksawng a sunning kha thlarau lei lawngin hngalh khawh a si caah annih caah cun pakpalawng men a si ko. 15Thlarau a ngeimi nih cun zeizong vialte kha an ṭhat an chiat an khing an thlai khawh, sihmanhsehlaw anmah tu cu ahohmanh nih sual an phaw kho hna lo. 16Cathiang nih,

“Bawipa cu aho nih dah

a lungthin an hngalh?

Amah cu aho nih dah

ruahnak an cheuh khawh?”

a ti bangin a si taktak. Sihmanhsehlaw kannih cu Khrih lungthin a ngeimi kan si. *

Psalm 145:8-14 (17)

R/Bawipa cu thil a tuahnak paoh ah hin ding tein a tuahmi a si, rian a ṭuannak paoh ah hin zaangfahnak a ngeimi a si.

8Bawipa cu dawtnak a ngeimi le mi zaangfah thiammi a si, thinhun a har i a fekmi dawtnak in a khatmi a si.

9Aho cung paoh ah a ṭha i a sermi hna an dihlak cungah zaangfahnak a ngei.

10 Bawipa, na sermi thil vialte nih an in thangṭhat lai, na sermi hna nih an in lawmh lai!

11Na pennak a sunpar ning kha an chim lai i na ṭhawnnak kha an thanh lai.

12Cucaah mi vialte nih thil khuaruahhar na tuahmi kha an hngalh lai i na pennak a sunpar ning le a lianhngan ning kha an hmuh lai.

13Na pennak cu zungzal in a hmun lai i nangmah cu zungzal in siangpahrang na si lai. Pathian nih cun biakamnak a tuahmi kha zumhawktlak tein a zulh i a tuahmi thil paoh kha an ṭha dih.

14Harnak a ingmi kha a bawmh hna i ṭhumhnak a tongmi kha a cawi hna.

Alleluia; Hebru 4:12 Pathian bia cu a nung i a ṭhawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha a hngalh dih.

Thawngtthabia (Gospel)

Luke 4:31-37

Thlarau Ṭhalo A Ngeimipa

(Mar 1.21-28)

31Cun Jesuh cu Galilee ram i khua pakhat, Kapernaum khua ah khan a kal i khika ah sabbath ni ah khan a cawnpiak hna. 32A cawnpiakning hna kha an khuaruah a har, zeicahtiah a bia cu hmual a ngei ngaingai. * 33Cuka pumhnak inn ah cun khuachia thlarau a ngeimi pa pakhat a rak um; fak piin a au i, 34“Nazareth khuami Jesuh, zeidah na kan duhnak a si? Kanmah hrawh awkah maw hika ah hin na rat? Nangmah cu aho na si kha kan hngalh ko — Pathian lamkaltu a thiangmi na si ko,” tiah a ti. 35Jesuh nih thlarau cu, “Dai tein um law, mipa chung khan chuak,” tiah a ti. Khuachia nih cun mipa cu an dihlak hmaika ah khan a thluk i a cungah zeihmanh ṭhat lonak tuah loin a kaltak. 36An dihlak in an khuaruah a har i pakhat le pakhat cu, “Hi bia hi zei bantuk bia dah a si? Hi mipa nih hin nawlngeihnak le ṭhawnnak in thlarau ṭhalo kha nawl a pek hna i an chuak ko,” tiah an i ti. 37Cun Jesuh kong cu cu ram chung khuazakip ah khan a thang.