Zarhkel (23)nak Cawn nithum ni

September 11, 2023 (Year B)

Avoikhatnak Bible 1Cor 7:25-31

Aa Ṭhi-um Rih Lomi Hna le Nuhmei Kong

25Aa ṭhi-um rih lomi hna kongah hin, Bawipa sinin hmuhmi bia zei ka ngei lo nain Bawipa vel thawngin zumhawktlak a si vemi bantukin ka ruahnak ka chim lai: 26Atu caan harnak ruah tikah hin pa nih a umning in um ko seh law a ṭha deuh tiah ka ruah. 27Nupi ngeimi na si ahcun na nupi he i ṭhen cu va zal hlah. Nupi ngei lo na si ahcun, va kawl theng hlah. 28Asinain nupi nan ṭhit ahcun nan sual tinak a si lo, va nan ngeih ahcun nan sual tinak a si lo, ka duhmi cu cu bantuk mi hna nih nifate in a chuak lengmangmi harnak an ton laimi hi luat hna seh ti tu hi a si.

29Ka u le ka nau hna, ka chim duhmi cu hihi a si: caan hi tampi a tang ti lo i cucaah cun atu ri hin cun nupi ngeimi nih a ngei lo bantukin um hna seh; 30a ṭapmi cu ngaihchia lomi bantukin um hna seh; a nimi cu lunglawm lomi bantukin um hna seh; thil a cawmi nih an cawkmi kha kan ta a si lo ti bantukin um hna seh law 31vawleicung thil a tawngthammi hna nih khan vawleicung thil hi tlamtling in kan tawngtham manh hna lai lo ti bantukin um hna seh. Zeicahtiah vawlei hi atu bang hin cun saupi a um ti lai lo.

Psalm 45:11-12, 14-17 (11)

R/Naa dawh caah siangpahrang nih an duh lai, amah cu na bawi a si, a nawl kha va ngai tuah.

11Naa dawh caah siangpahrang nih an duh lai, amah cu na bawi a si, a nawl kha va ngai tuah.

12Tair mi nih laksawng an in put lai, mirum nih na lung tluanter an i zuam lai.

14A puan dawh ngaimi he cun siangpahrang sinah khan an hei kalpi, a mawle nih khan an zulh i anmah zong cu siangpahrang sin tiang an kal ve.

15Lunglawm le thanuam in an ra i siangpahrang bawipa inn ah cun an lut.

16Ka siangpahrang bawipa, nangmah nih fapa tampi na ngeih hna lai i na pupa hna cu an hmun an rolh hna lai; nangmah nih vawlei dihlak uktu ah khan na ser hna lai.

17Na minthannak cu ka hla nih a nunter zungzal lai i mi kip nih zungzal thluangthluan in an in thangṭhat lai.

Alleluia Luke 6:23 - Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu.

Thawngtthabia (Gospel) Luke 6:20-26

Lunglawmhnak le Ngaihchiatnak

(Mat 5.1-12)

20Jesuh nih a zultu kha a zoh hna i a thawh hna i,

“Nannih sifakmi hna i lawm u,

Pathian Pennak cu nanmah ta a si.

21Nannih atu i rawl a ṭammi hna

i lawm u,

Nan paw a khim lai.

Nannih atu i a ṭapmi hna i lawm u,

Nan ni lai.

22Mi Fapa ruangah mi nih an in huat hna i an in hlawt hna i an in serhsat hna i miṭhalo an in ti hna tikah i lawm ko u. * 23Cu ni ah cun i lawm u law a lam in lam u, zeicahtiah nan caah vancung ah laksawng nganpi chiahpiak nan si. Cu bantuk te cun pei an pupa hna nih khan profet hna kha an rak tuah hna cu. *

24“Sihmanhsehlaw nannih atu i

a rummi, nan caah cun

ngaihchia a va si dah!

Nan nun nuamhnak kha

nan hmuh cang.

25Atu i a paw a khimmi nan caah

cun ngaihchia a va si dah!

Rawlṭam in nan vak lai.

Atu i a ni lengmangmi nan caah cun

ngaihchia a va si dah!

Ngaihchia in nan ṭap lai!

26Mi vialte nih, an in chimthiam hna tikah nan caah ngaihchia a va si dah; zeicahtiah cuti te cun pei an pupa hna nih khan nal profet kha an rak ti hna cu,” a ti.