July 24.2024
Zarkel Zarh (16)nak Nithum Ni
Lectionary: 397
Jeremiah bia, amah cu Benjamin ram chung Anathoth khua i a ummi tlangbawi hna chung mi Hilkiah fapa a si; 4 Cun Bawipa bia cu ka sinah a ra i, 5 "Paw chung i kan ser hlanah kan hngalh i na chuah hlanah kan thianter cang; Nangmah cu miphun hna ca i profet ah kan chiah cang," tiah a ti. 6 Khi tikah kei nih ka thawh i, "Aa, Bawipa Pathian ! Zohhmanh, ngakchiate men ka si i biachim ka thiam lo," tiah ka ti. 7 Sihmanhsehlaw Bawipa nih a ka thawh i, "Ngakchiate men ka si, ti hlah; Zeicahtiah cu hna sinah cun va kal, tiah kan tinak ah na kal lai i nawl kan pekmi paoh kha na chim lai. 8 Annih cu ahohmanh ṭih hna hlah. Zeicahtiah na sinah ka um i kan huhphenh lai", tiah Bawipa nih a ti." 9 Khi tikah Bawipa nih a kut cu a hun samh i ka ka kha a tawngh; cun Bawipa nih cun a ka thawh i, "Zohhmanh, ka bia cu na ka chungah ka chiah cang hna. 10 Zohhmanh nihin ah hin nangmah cu miphun hna cung le pennak hna cungah, phawi awk le ṭheh awkah, hrawh awk le hral awkah, sak awk le phun awkah kan chiah cang," tiah a ti.
R. Na dinnak kong kha ka chim lai i na khamhnak kha chun nitlak ka thanh lai;
Maw Bawipa, nangmah cu kaa dornak hmun na si, zeitikhmanh ah ningzahnak ka phakter hlah! 2 Na din caah ka hram law ka chanh ko, ka bia ka ngaihpiak law ka khamh tuah.
3 Ka caah himnak lungpi si law a fekmi ralhruang a ka hupphengtu si ko; nangmah cu ka himnak lungpi le ka ralhruang na si. 4 Ka Pathian, miṭhalo hna kut chungin ka khamh tuah, mipuarhrang le miding lo hna kut chungin ka khamh ko.
5 Bawipa, nangmah cungah ka ruahchannak vialte kha ka chiah, ka no lio tein nangmah cu kan bochan zungzal. 6 Ka nun chung vialte nangmah cu kan hngatchan; ka chuahka in nangmah nih na ka huhphenh zungzal;
15 Na dinnak kong kha ka chim lai i na khamhnak kha chun nitlak ka thanh lai; na khamhnak cu ka hngalh khawh leng a si nain ka thanh lai. 17 Ka no lio tein nangmah nih na ka cawnpiak i atu tiangin khuaruahhar na tuahmi kha ka chim lengmang ko.
R. Alleluia, alleluia.
Thlaici cu Pathian bia a si, Khrih cu thlaici tuhtu a si; a sin i a rami vialte cu zungzal in an nung lai.
Thawngthabia Mt 13:1-9
Cu ni ṭhiamṭhiam ah cun Jesuh cu inn cun a chuak i rili kamah khan a va kal i a ṭhu i a cawnpiak hna. 2 A helhhumtu cu an tam tuk caah lawng chungah a lut i a ṭhu; mizapi cu rilikam ah khan an dir. 3 Thil tampi a cawnpiak hna i cu cawnpiaknak caah cun tahchunhnak bia a hman hna. 4 Aa thawh i, "Thlaici vorh ah mipa pakhat cu aa thawh. Lo chung i thlaici cu a vorh tikah a cheu cu lam hril ah an tla i cu hna cu vate nih an char hna. 5 Cun a cheu cu vawlei tlawmte lawng a umnak, lung tamnak hmun ah an tla. Vawlei kha a chah lo caah thlaici cu a kheu zau. 6 Ni a hung chuak i thlaikheu hme tete cu a hun emh hna tikah an hram kha a thuh lo caah an car zau. 7 Cun thlaici a cheu cu hling lakah an tla. Hling nih cun a zual hna i an ṭhang kho lo. 8 Sihmanhsehlaw thlaici a cheu cu vawlei ṭhatnak ah an tla i a let za khat, a let sawm ruk, a let sawm thum in an vui," a ti. 9 Cun Jesuh nih cun, "Hna nan ngeih ahcun thei ko uh," tiah a ti hna.