July 27.2024
Zarkel Zarh (16)nak ZarhpNi
Lectionary: 400
Hi bia hi Bawipa sinin Jeremiah sinah a rami bia a si. 2 Bawipa inn kutka ah khan va dir law khika ah khan va thanh tuah: Bawipa biak awkah hi kutka hna chungah a lutmi Judah mi vialte hna, Bawipa bia hi thei tuah u, va ti. 3 Hi bia hi Ralkapbu Bawipa, Israel mi Pathian bia cu a si: Nan umtuning le nan thil tuahmi kha i remh u law hi hmun ah hin kan umter hna lai. 4 Nannih nih nan i thawh i, 'Hi hmun hi Bawipa biakinn a si,' Bawipa biakinn a si, Bawipa biakinn a si,' tiah nan ti lengmang,' hi bia lih a simi hi i bochan hlah u. 5 Nan umtuning le nan thil tuahmi kha i remh u law, pakhat le pakhat ṭhalo piin i ti hlah u law, 6 ramdangmi le ngakṭah le nuhmei kha dekhleng hna hlah u law hi hmun ah hin a sual lomi thisen kha chuah hlah u law nanmah lila fahnak ding caah pathian dang kha zul hna hlah u. 7 Khi tikah hlanlio piin nan pupa hna sinah zungzal in co awkah ka pekmi hna ram ah hin nannih cu kan umter ko hna lai. 8 Hi hlennak bia kha nan i bochannak thawng in zeihmanh ṭhathnemnak nan hmu lo. 9 Nannih nih nan fir, lai nan nawng, va cung in pa nan i duh i lih in tehte nan cang, Baal sinah raithawinak nan khangh, nan hngalh lomi pathian kha nan dawi hna. 10 Cun ka sinah nan ra i ka min in kawhmi hi inn chungah hin keimah hmaiah nan dir i, 'Kan him ko,' nan ti, hi thil fihnung vialte hna tuah awkah hin kan him ko, tiah nan ruah. 11 Hi inn keimah min in kawhmi inn hi, mifir hna kua ah maw nan ruah? Hi thil vialte hi, keimah hrimhrim nih ka hmuh, tiah Bawipa nih a ti.
R.Bawipa biakinn chung tual cu ka ngai hna. A nungmi Pathian cu ka nunnak dihlak in hla in ka thangṭhat.
3 Pithlung hmanh nih bu an i sak i pele hmanh nih anmah innte an ngei; an fano cu na biakṭheng pawngah an chiah hna, maw Lianngan Bik Bawipa, kan siangpahrang le kan Pathian. 4 Na biakinn chungah a ummi cu zeitluk in dah an i lawmh, nangmah thangṭhatnak hla a sa zungzalmi hna cu zeitluk in dah an tha a nuam!
5 Nangmah sinin thazang a hmumi hna cu zeitluk in dah an i lawmh, Zion Tlang i va kal a duhmi hna cu zeitluk in dah an i lawmh. 6 A ro a carmi nelrawn kha an tan tikah cerhti put tamnak hmun ah a cang; 8 Maw Lianngan Bik Bawipa Pathian, ka thlacamnak kha ka theihpiak tuah,
11 Bawipa cu a kan hupphengtu le a sunglawimi kan siangpahrang a si, amah nih thluachuah a kan pek i vel le thangṭhatnak kan hmuh. A dingmi thil a tuahtu paoh cu thil ṭha kha pe loin a um hna lo.
R. Alleluia, alleluia. Jas 1:21bc
Na chung i tuhmi bia kha toidor tein cohlang ko ,cun nan nunnak a khamh khawh hna.
Thawngthabia:Mt 13:24-30
24 Jesuh nih tahchunhnak bia dang pakhat a chimh ṭhan hna. "Vancung Pennak cu a lo chung i thlaici ṭha a tuhmipa bantuk a si. 25 Zan khat cu ral pakhat kha a ra i mi an i hngilh karah rawl ci lakah cun belh ci a vorh i lo diam in a kal. 26 Rawl kung cu an hung ṭhang i rawl cu an hung vuih tikah belh zong cu an hung lang. 27 Cu pa salle hna cu an ra i, 'Bawipa, na lo chung i na tuhmi kha thlaici ṭha an si ṭung, khuazei in dah belh hi an rat kun?' an ti. 28 'Hi a tuahtu cu kan ral kha a si,' tiah a leh hna. Annih nih, 'Belh cu kan va bawt hna lai maw?' tiah an hal. 29 Anih nih, 'Bot hlah, zeicahtiah belh nan bawhpah ah khan rawl kung zong kha nan bawh chih sual hna lai. 30 Rawl kung le belh cu hmunkhat ah rawl ṭuan caan tiang ṭhang ṭi ko hna seh. Cun khi tikah rawl ṭuantu pawl cu ka thawh hna lai i: Belh kha bawt hmasa hna u law mei chung i paih awkah tom hna u; cun rawl kha ṭuan hna u law ka buk chungah rawn hna u, ka ti hna lai,' a ti," tiah a ti.