July 29.2024
Zarkel Zarh (17)nak Nikhat Ni
Memorial of Saints Martha, Mary, and Lazarus
Lectionary: 401/607
Bawipa nih a ka thawh i, "Va kal law puan biar vaa cawk law na tai ah i kaih, sihmanhsehlaw ti tawnghter hlah," a ti. 2 Cucaah Bawipa bia bang cun kaa cawk i ka tai ah kaa kaih. 3 Cun Bawipa bia cu a voi hnihnak ka sinah a ra ṭhan i, 4 "Tho law Zufrates tiva ah va kal tuah. Khika ah na tai i naa kaihmi na biar kha lungkak chungah va thup tuah," a ti. 5 Cucaah ka tho i Bawipa nih nawl a ka pek bangin Zufrates tiva pawngah ka va thuh. 6 Cun caan saupi hnuah khin Bawipa nih a ka thawh i, "Tho law, Zufrates tiva ah khan va kal tuah, cun khika ah va thup tiah nawl ka rak in pekmi biar kha va la," tiah a ti. 7 Cun Zufrates tiva ah cun ka va kal i ka thuhnak hmun kha ka va zoh, sihmanhsehlaw ka vun lak tikah, biar cu a rawk dih cang, zeihmanh ah a ṭha ti lo. 8 Cun Bawipa nih cun a ka chawnh ṭhan i a bia cu hi bangin a si: 9 Hi bantuk hin Judah aa porhlawtnak a nganmi le Jerusalem aa porhlawtnak a nganmi kha ka hrawh lai. 10 Hi miṭhalo hna nih hin ka bia ngaih kha an duh lo; pathian dang kha an zulh hna i an rian an ṭuan hna i an kunhnawh hna. Cucaah annih cu, zeihmanh ah a ṭha ti lomi biar bantuk hi an si lai. 11 Biar cu tai ah hren chih a si bantukin Israel mi vialte hna le Judah mi vialte hna cu an ning piin keimah ah kaa hren chih hna. Zeicahdah mahtin ka tuah ti ahcun, annih kha ka mi an si i ka caah min ṭhatnak le sunparnak an chuahpi nakhnga, ti caah a si; sihmanhsehlaw ka bia cu ngaih an duh lo.
Responsorial Psalm
R.An hringtu Lungpi kha na ruat lo i An sortu Pathian kha na philh.
18 An hringtu Lungpi kha na ruat lo i An sortu Pathian kha na philh. 19 "Bawipa nih a hmuh i a hlawt hna, A fapa hna le a fanu hna nih a thin an phawh caah.
20 Amah nih, 'An sinin ka hmai ka thuh lai, An donghnak kha zeidah a si lai ka zoh lai, Zeitintiah annih cu milotlau chan; Zumhawktlak lo fa an si. 21 Pathian a si lomi thil in ka nahchuahnak an tuah i An siasal in ka thin an ka phawh, Cu bantukin miphun a si lomi in an nahchuahnak ka tuah ve lai i, A hrutmi miphun in an thin ka phawh ve hna lai.
R. Alleluia, alleluia. Jn 8:12
Jesuh nih annih cu a thawh ṭhan hna i, "Kei cu vawlei ceunak ka si. Keimah a ka zummi paoh cu nunnak ceunak kha an ngei lai i mui lakah an vai lai lo," tiah a ti.
Thawngthabia, John 11:19-27
Judah mi mi tampi kha an ṭa a thih ca i anmah ṭhutpi awkah khan an ra. 20 Jesuh a ra lio ti kha Martha nih a theih tikah lampi in va don awkah a kal; Mary tu cu inn ah khan a rak um. 21 Martha nih khan Jesuh cu, "Bawipa hika ah hin rak um law cu, ka ṭa hi a thi hnga lo. 22 Sihmanhsehlaw atu zongah hin na halmi paoh cu Pathian nih an pek lai ti kha ka hngalh,' tiah a ti. 23 "Na ṭa cu a tho ṭhan lai," tiah Jesuh nih a ti. 24 Martha nih cun, "Asi, a tho ṭhan lai ti cu ka hngalh ko, sihmanhsehlaw ni hmanung bik thawhṭhannak ah pei a si ko lai cu," tiah a leh. 25 Jesuh nih Martha cu, "Keimah hi thawhṭhannak le nunnak cu ka si. Keimah a ka zummi paoh cu a thih hmanh thi seh law a nung lai; 26 Cun ahohmanh a nung i keimah kha a ka zummi cu an thi bal lai lo. Hihi na zum maw?" a ti. 27 Martha nih, "Asi, ka zumh, Bawipa nangmah cu Pathian Fapa Messiah, vawlei cung i a rung ding cu na si ti kha ka zumh," tiah a leh.